Lăi pơthâo amăng mông jơnum, khua jơnum min kơ bruă khua pơ ala Nguyễn Hữa Đông brơi thâo, amăng rơwang ngă bruă rơgao, Jơnum min pơ ala mơnuih ƀôn sang gưl tơring čar đơ đam dêh čar hơmâo pơphun 1.950 mông jơnum. Amăng anun hơmâo 1.281 jơnum tui bruă phara kiăng hmao tlôn pơsir hĭ hơdôm bruă phrâo ƀuh kơ klin kman, ngăn drăp, tuh pơ alin hăng dưm dăp anih anom mă bruă tơdơi kơ pơmut hrŏm. Jơnum min pơ ala mơnuih ƀôn sang djop ƀon lan hơmâo ba tơbiă rơbêh 30.800 tơlơi pơtrun, ngă tơhnal pơkă yôm phăn amăng pơđĭ kyar bơwih ƀong huă-mơnuih mơnam, pơhlôm tơlơi hơdip mơda hăng djru brơi mơnuih ƀôn sang ƀơi ƀon lan. Đơ đam dêh čar hơmâo pơphun rơbêh 4.000 grup krăo lăng, tŭ mă rơbêh 36.000 tơlơi pơgôp hiăp, tơlơi rơkâo đĭ mơng mơnuih ƀôn sang hăng bruă pơsir hĭ truh rơbêh 86%. Bruă tơña hăng lăi glăi jai sit nik, đing nao ngă rơđah bruă glăm ba mơng hơdôm anih anom hăng rĭm čô mơnuih bơdjơ̆ nao. Khua jơnum min kơ bruă khua pơ ala Nguyễn Hữu Đông pơsit tong: “Bruă mă mơng jơnum min pơ ala mơnuih ƀôn sang djop gưl jai hrơi tơpă tong ten, sit nik, klă hăng ba glăi tŭ yua, hơdôm tơlơi pơplih phrâo wŏt amăng tơlơi pơmĭn hăng tơlơi sit nik bruă mă. Mơng anun, tŏ tui pơsit tong kơdrưh ang, tơlơi glăm ba mơng anom bruă kơnuk kơna ƀơi ƀon lan amăng bruă kơđi čar”.

Lăi pơtong nao tơlơi glăm ba wai pơgang mơng Jơnum min pơ ala mơnuih ƀôn sang, ơi Đào Văn Thanh, kơ-iăng Khua git gai Ping gah ƀôn prong., Khua jơnum min pơ ala mơnuih ƀôn sang ƀôn prong Cần Thơ brơi thâo, tơdah bruă mă ƀu dưi wai lăng kjăp amuñ ba truh kơ bruă ngă mă, ƀu glăm ba ƀudah ƀu klă amăng bruă ngă hră pơ-ar. Yua anun, Jơnum min mơnuih ƀôn sang ƀôn prong hơmâo pok pơhai lu hơdră bruă ha amăng plĕ hluai tui bruă ba tơbiă tơlơi pơtrun, krăo lăng, kah gưl, jao bruă hăng bưp mơnuih ƀôn sang ruah khua. “Sit nik bruă mă brơi ƀuh, sa, dua grup khua pơ ala hăng ƀing mơnuih apăn bruă hyu hơduah tơña sit nik sa, dua tơlơi pơgôp hiăp, tơlơi rơkâo đĭ mơng mơnuih ƀôn sang ruah khua tơdơi kơ mông bưp hăng lăi pơthâo brơi anom bruă bơdjơ̆ nao kiăng pơsir hĭ tañ, khut khăt, mơnuih ƀôn sang ăt lăng yôm tơlơi đing nao mơng gong gai djop gưl. Yua anun, hơdôm tơlơi pơgôp hiăp sit nik mơng mơnuih ƀôn sang ăt lĕ bruă wai pơgang brơi tơlơi dưi yôm phăn, kiăng kiăo tui lăng, pơtrut pơsur pơsir hĭ bruă lăp djơ̆, pơgôp hrưn đĭ klă ƀiă, tŭ yua amăng wai lăng kơnuk kơna hăng hơkrŭ pran đăo gơnang mơng mơnuih ƀôn sang hăng gong gai ƀon lan”.

Amăng mông jơnum, yă Phạm Thị Thanh Trà, kơ-iăng khua dêh čar rơkâo 5 grup hơdră bruă phun kiăng hrưn đĭ klă amăng bruă mă mơng Jơnum min pơ ala mơnuih ƀôn sang rơwang thun 2026-2031. Amăng anun lăi pơtong pơplih tơlơi pơmĭn amăng wai lăng tui jơlan gah lăng mơnuih ƀôn sang hăng anom bơwih ƀong sĭ mơdrô lĕ phun; pơtrut kơtang kah gưl, jao bruă pơlir hăng wai lăng bruă mă; pơtrut pơplih mrô, wai lăng amăng anih djă pioh hră pơ-ar hăng AI; pơplih ngă hră pơ-ar; hrưn đĭ klă bruă krăo lăng hăng pơhŭi hlâo tañ ƀiă hơdôm anŏ pơglăi sat amăng pơđĭ kyar. “Bruă krăo lăng mơng jơnum min pơ ala mơnuih ƀôn sang pơplih kơtang mơng krăo lăng bruă mă rĭm hrơi hơdai krăo lăng hơdôm bruă pơđĭ kyar sui pơ anăp, mơng krăo lăng bruă ngă hơdai nao krăo lăng boh than ba glăi, mut dơlăm amăng hơdôm bruă amuñ pơglăi sat mơng bruă tuh pơ alin man pơdong, lŏn mơnai, dưm dăp, pơplih dưm dăp anih anom. Tơlơi yôm hloh lĕ hrưn đĭ bruă pơhŭi brơi tañ ƀiă, tañ ĕp ƀuh, pơsir hĭ hơdôm bruă ngă soh mơng ƀon lan mơtăm”.

Pơđut mông jơnum, khua git gai pơ ala mơnuih ƀôn sang ơi Trần Thanh Mẫn lăi pơtong, amăng rơwang phrâo, jơnum min pơ ala mơnuih ƀôn sang kiăng tŏ tui pơplih kơtang ƀiă dong kiăng lăp djơ̆ tơlơi rơkâo pơđĭ kyar amăng lŏn ia. Bruă mă mơng Jơnum min pơ ala mơnuih ƀôn sang kiăng kiăo tui tơlơi črâo trun mơng Ping gah, tŏ tui pran ngă pô, kơtưn pơgang, pơgăn bruă hưp ƀong kông ngăn, yua gơnam khưi khai, ngă soh hăng lăng djơ̆ pran mơnuih ƀôn sang, anom bơwih ƀong sĭ mơdrô lĕ tơlơi pơkă brơi. “Jơnum min pơ ala mơnuih ƀôn sang djop gưl kơtưn bruă git gai mơng Ping gah hăng bruă pơphun hăng bruă mă mơng Jơnum min pơ ala mơnuih ƀôn sang, anai lĕ yôm hloh. Bruă mă mơng Jơnum min pơ ala mơnuih ƀôn sang amra ba glăi boh tŭ yua sit nik lơm kiăo tui tơlơi črâo trun, tơlơi pơtrun mơng Ping gah, pơjing ngă bruă kơđi čar mơng Ping gah jing tơhnal pơkă, hơdră bruă mơng gong gai ƀon lan. Tŏ tui hruă kjăp hăng pok pơhai tŭ yua tơlơi črâo trun mơng Ping gah amăng pơjing Kơnuk kơna tui hơdră xã hội chủ nghĩa, pơplih phrâo bruă mă ƀơi gong gai ƀon lan hăng tŏ tui ngă pô tui jơlan XHCN. Pơgang hưp ƀong kông ngăn, yua gơnam khưi khai, ngă soh. Ngă djơ̆ pran mơnuih ƀôn sang, anom bơwih ƀong sĭ mơdrô lĕ tơlơi pơkă brơi bruă mă mơng jơnum min pơ ala mơnuih ƀôn sang”./.