VOV4.Jarai - Tô̆ tui jơlan hơdră jơnum tal 14, čơtlăm kơ 11/8, Jơnum min apăn bruă Khua pơ ala mơnuih ƀôn sang dêh čar pel ĕp Tơlơi pơtrun pơsit kơ tla dong prăk djru kơ mơnuih mă bruă bơbeč djơ̆ klin Covid-19. Kiăo tui anun, Jơnum min apăn bruă Khua pơ ala mơnuih ƀôn sang dêh čar tŭ ư mă yua năng ai ñu 1 rơbâo 155 klai prăk mơng Keh prăk pơgang rơngiă bruă mă truh abih thun 2021 kiăng tla kơ mơnuih mă bruă dưi čơkă mă tui Tơlơi pơtrun pơsit. Hrơi pơsir prăk djru kơ mơnuih mă bruă giong kaih hloh amăng lơ 10/9/2022. Tơlơi pơtrun pơsit jao kơ Kơnuk kơna pok pơhai ngă tui bruă pơsir prăk djơ̆ hrơi pơkă hăng lăi pơthâo glăi kơ Jơnum min apăn bruă Khua pơ ala mơnuih ƀôn sang dêh čar bôh tơhnal ngă tui Tơlơi pơtrun pơsit amăng mông jơnum blan 9 pơ̆ anăp. Pơhiăp klah čun mông jơnum tal 14, Khua git gai wai lăng pơ ala mơnuih ƀôn sang dêh čar ta lăi rơđah, tơdơi kơ 2 hrơi ha mơkrah mă bruă, Jơnum min apăn bruă Khua pơ ala mơnuih ƀôn sang dêh čar hmâo ngă giong laih 7 bruă mă prong hăng dua mơta bôh yôm. Rơkâo Khua čih pioh, Khua Anom bruă Khua pơ ala mơnuih ƀon sang dêh čar, kiăo tui hơdôm tơlơi klah čun kiăng mă yua lăi pơthâo tơlơi klah čun, tañ ngă giong pioh lăi pơthâo kơ Khua git gai wai lăng pơ ala mơnuih ƀôn sang kĭ 4 Tơlơi pơtrun pơsit./.

Siu H’ Prăk: Pơblang