Grup hyu mă bruă hơmâo jao gơnam têt kơ 200 boh sang anŏ mơnuih djuai ƀiă să Ia Rvê, kiăng pơtrut pran jua mơnuih ƀôn sang čơkă têt mơak mơai, trơi pơđao, kơjăp tơlơi đăo kơnang hăng pran jua hrưn đĭ amăng tơlơi hơdip mơda.

Ơi Hoàng Duy Chinh lăi pơtong, Ping gah, kơnuk kơna hăng khua pơ ala mơnuih ƀôn sang dêh čar đing nao biă mă kơ tơlơi hơdip mơda mơnuih djuai ƀiă, ĕp hơdră pơsir brơi tơlơi bơwih ƀong huă amăng kual giăm guai dêh čar; rơkâo tơring čar ăt đing nao djru ba tơlơi hơdip mơda mơnuih ƀôn sang, pơđĭ tui tơlơi gum pơgôp djuai ania, djă pioh gru grua hiam đưm djop djuai ania. Hrơi anun mơ̆n, grup nao čuă, pơpŭ thun phrâo ƀing khua mua, ling tơhan puih kơđông pơgang guai dêh čar Yok M’Bre. Ơi Hoàng Duy Chinh čih pioh, lăng yom tơlơi gir run mơ̆ng djop puih kơđông tơhan pơgang guai dêh čar, wai lăng tơlơi dưi pô lŏn ia, tơlơi rơnuk rơnua dêh čar hăng ngă hrŏm akŏ pơdong bruă kơđi čar ƀơi plơi pla, djru ba tơlơi hơdip mơda mơnuih ƀôn sang amăng kual.