Hơdôm hrơi anai, ƀơi hơdôm boh plơi pơ kual Lý Sơn, tơring čar Quảng Ngãi, bruă pôr pơthâo kơ hrơi ruah khua pơ ala mơnuih ƀôn sang dêh čar hăng khua pơ ala mơnuih ƀôn sang djŏp gưl glăk hơmâo ngă klă, pơƀut ngă rơđah boh pia, anŏ yom, tơlơi dưi hăng bruă kiăng ngă mơ̆ng ƀing nao plĕ hră. Lu mơnuih ƀôn sang lăp đing nao hăng thâo hluh rơđah laih tơlơi gơgrong bruă mơ̆ng ƀing khua pơ ala mơnuih ƀôn sang jing mơnuih pơ ala brơi tơlơi pơmin, tơlơi kiăng khăp mơ̆ng pô. Ơi Nguyễn Văn Huy, Khua kual Lý Sơn, tơring čar Quảng Ngãi brơi thâo, kual hơmâo prăp rơmet djŏp laih tơlơi kiăng, anŏ yom phun lĕ pôr pơthâo kiăng ƀing khua, mơnuih ping gah hăng mơnuih ƀôn sang thâo hluh djŏp anŏ yom mơ̆ng bruă ruah khua; laih dong pơhlom rơnuk rơnua, hơđong kjăp hăng djŏp tơlơi gêh găl kiăng mơnuih ƀôn sang dưi ngă djŏp tơlơi dưi pô, bruă kiăng ngă mơ̆ng pô: “Ră anai, amăng plơi pơphun jơnum pơčrông sai tal sa, tŭ ư hră čih anăn ƀing khua, mơnuih mă bruă hăng hơdôm anom bruă yua Khul apăn bruă phun ping gah kual anai wai lăng, hơmâo tơlơi pơtrun dưi tơbiă anăn ruah khua. Laih dong, pôr pơhing djŏp anih kiăng abih bang ƀing khua pơ ala  mơit hră tơbiă anăn. Jing truh ră anai hơmâo ngă tui djơ̆ hơnong pơkă Jơnum min ruah khua ba tơbiă laih”.

Ƀơi să Nghĩa Hành, tơring čar Quảng Ngãi, bruă jơnum pơčrông sai, mă tơlơi pơgôp hiăp mơ̆ng ƀing khua, mơnuih mă bruă čar hăng ƀing pơ ala mơ̆ng hơdôm boh plơi glăk hơmâo pơphun rơđah rơđông, dưi ngă pô, tui hluai či ruah, djơ̆ hăng tơlơi pơkă. Bruă tơbiă anăn mơnuih čih ruah ngă khua ƀơi hơdôm boh plơi hơmâo prăp rơmet tong ten hăng bruă bơkơtuai rơđah rơđông, tui hluai pô kơ rơnoh pơkă, tơlơi pơmin pran jua, hăng tơlơi rơgơi ngă bruă. Khul wai lăng djŏp djuai ania mơnuih mơnam hơdôm boh plơi hăng Jơnum min ruah khua să Nghĩa Hành hơduah tơña mơnuih ƀôn sang hăng pô hơmâo tơbiă anăn ngă khua.

Ơi Lê Quang Thu, Khua Jơnum min djŏp djuai ania mơnuih mơnam Việt Nam să Nghĩa Hành, tơring čar Quảng Ngãi brơi thâo, anŏ klă, amŏ rơgơi mơ̆ng ƀing khua pơ ala yơh yom hloh: “Kiăng ngă rơđah bruă ba tơbiă anăn khua pơ ala mơnuih ƀôn sang djŏp gưl, anom git gai bruă rim hrơi mơ̆ng hơdôm anom bruă lăi pơthâo rơđah rơđông kơ abih bang ƀing khua, mơnuih mă bruă čar. Hăng mơnuih tơbiă anăn ngă khua amăng plơi pla, Khul wai lăng djŏp djuai ania mơnuih mơnam iâu ƀing plĕ hră hăng hơdôm khul grup či pơthâo rơđah pô hơmâo tơbiă anăn”.

Tơring čar Quảng Ngãi hơmâo 4 anih ruah khua pơ ala mơnuih ƀôn sang dêh čar, ruah 11 čô khua pơ ala; 21 anih ruah khua pơ ala mơnuih ƀôn sang tơring čar, ruah mă 66 čô khua. Ƀơi să, hơmâo tơlơi pơtrun laih kơ mrô anih ruah khua hăng mrô mơnuih hơmâo ruah đĭ, abih tih ñu 683 anih ruah khua. Bruă jơnum pơčrông ruah pô tơbiă anăn tal sa hơmâo ngă djơ̆ tơlơi pơkă hăng hơmâo lăi pơthâo djŏp kơ hơdôm anom bruă dưi wai lăng.

Yă Bích Thọ, Kơ-iăng khua Jơnum min djŏp djuai ania mơnuih mơnam Việt Nam tơring čar Quảng Ngãi brơi thâo, Jơnum min djŏp gưl git gai ngă djŏp, tơpă sit 3 tal jơnum pơčrông sai tui Tơlơi phiăn Ruah khua, pơhlôm dưi ngă pô, rơđah rơđông, mơ̆ng bruă pơƀuh anăn pô či ba ruah mơtăm: “Amăng mông jơnum pơčrông sai, Jơnum min djŏp djuai ania mơnuih mơnam Việt Nam tơring čar Quảng Ngãi lăng yom biă kơ hơnong pơkă, tơlơi pơkă hăng pô tơbiă anăn ba ruah; laih dong pơhlom dăp mrô lăp djơ̆ kơ mrô đah kơmơi đah rơkơi, hnưr thun, djuai ania, tơlơi đăo, bruă ngă amăng mơnuih tơpuôl; pơlir kjăp plah wah hơnong pơkă hăng mrô či ba ruah, kiăng lăng tơlơi rơgơi, tơlơi klă mơ̆ng khua mua yơh phun. Bruă pơgôp hiăp, tơlơi đăo kơnang mơ̆ng mơnuih amăng plơi hăng pơ anih mă bruă yơh yom hloh, pơƀuh tơlơi pơmin, tơlơi kiăng khăp mơ̆ng Mơnuih ƀôn sang”./.