Git gai bruă plĕ hră ruah khua mua, Khua git gai pơ ala mơnuih ƀôn sang dêh čar ơi Trần Thanh Mẫn rơkâo prap lui klă jơnum lok rơma mơng Khul pơphun plĕ hră ruah khua mua dêh čar, him lăng pơphun hlâo kơ hrơi pơdơi ngui tết tui phiăn juăt. Khul pơphun plĕ hră ruah khua mua tañ hơmâo hră pơ-ar git gai djop ƀon lan pok pơhai bruă plĕ hră bơyan pơdơi tết tui phiăn juăt; pơkă tong ten hơdôm bruă jao kiăng ngă tui mơng gưl ƀôn lan, truh pơ să, phường, tơring čar, ƀôn prong, pơhlôm tơlơi git gai tŏ tui na nao mơng ƀon lan truh pơ gưl tơring čar, anăm brơi ƀuh ngă amưng, gun găn amăng bruă prap lui plĕ hră yua pơdơi ngui ƀong tết.

Ngă tui tơlơi git gai mơng Khua git gai pơ ala mơnuih ƀôn sang dêh čar, phrâo anai grup hyu mă bruă mrô 2 khul pơhlôm rơnuk rơnua, hơđong mơnuih mơnam mơng Khul plĕ hră ruah khua mua yua Thượng tướng Lê Tấn Tới, Khua Jơnum min wai pơgang rơnuk rơnua-hơđong hăng pơtom hiăp mơng Ƀirô Khua pơ ala mơnuih ƀôn sang dêh čar hơmâo mông mă bruă hăng Jơnum min plĕ hră ruah khua mua tơring čar Khánh Hoà kơ bruă pơhlôm rơnuk rơnua, hơđong mơnuih mơnam djru brơi tal plĕ hră ruah khua mua. Thượng tướng Lê Tấn Tới rơkâo:

“Ngă tui tơlơi gơgrong mơng tơhan wai pơgang rơnuk rơnua ƀơi ƀon lan, tơhan wai pơgang mă, anai lĕ tơhan giăm mơnuih ƀôn sang hloh. Kâo rơkâo ƀon lan hơpă juăt ƀuh rung răng, ƀing apăn akŏ kiăng pơkiăo nao tơhan nao tơl ƀon lan mơng anai mơtăm, hlâo hrơi ƀong tết mơtăm. Kiăng giăm mơnuih ƀôn sang, hmư̆ mơnuih ƀôn sang pơhiăp, lăi pơthâo brơi mơnuih ƀôn sang hluh, ngă bruă mơnuih ƀôn sang đăo gơnang. Mơ̆ anăm brơi giăm hrơi plĕ hră ruah khua mua kah mơng pơkiăo nao mơnuih. Sit biă ñu đing nao kual čư̆ siăng, bul pơtâo”.

Ƀơi tơrintg čar Dak Lak, gơnong bruă bơdjơ̆ nao hrŏm mơnuih ƀôn sang glăk gơgrong pơgang pơgăn, pel ĕp, pơgăn hơdôm tơlơi pơhing ča čot, pơgôp wai pơgang kiăng tal plĕ hră jing hrơi jơnum ngui mơng mơnuih ƀôn sang ruah khua ƀơi ƀon lan. Jing kơ-iăng grup pơplih mrô amăng plơi pla, ơi Y Sắc Kbuôr, Khua ƀuôn Cuôr, să Ea Mdroh, tơring čar Dak Lak brơi thâo:

 “Kâo mut amăng Zalo, Facebook ƀuh hơdôm tơlơi pơhing ča čot kơ bruă mơnuih apăn bruă, khua mua mơng Ƀirô Khua pơ ala mơnuih ƀôn sang dêh čar ƀudah khua mua Jơnum min pơ ala mơnuih ƀôn sang djop gưl ƀuh na nao arăng čih pơhing kâo lŏm hĭ mơtăm. Tơlơi yuăn ăt hơmâo, tơlơi Êđê hơmâo mơn. Anai lĕ hơdôm tơlơi pơhing čih ča čot, kiăng ngă rung răng, lơm ƀuh kâo amra lŏm hĭ mơtăm hăng pơtă abih bang ngă tui, anăm brơi ƀing sat pơčut pơčao, bơdjơ̆ nao ta pô hăng sang anŏ”.

Tal plĕ hră ruah Khua pơ ala mơnuih ƀôn sang dêh čar tal XVI hăng khua mua Jơnum min pơ ala mơnuih ƀôn sang djop gưl, rơwang thun 2026-2031, tơring čar Dak lak hơmâo giăm 2,42 klăk čô mơnuih ƀôn sang ruah khua nao plĕ hră. Kiăng tal plĕ hră pơphun rơnuk rơnua, djơ̆ tơlơi pơkă, Jơnum min mơnuih ƀôn sang tơring čar Dak Lak hơmâo akŏ pơjing Jơnum min plĕ hră gưl tơring čar, 102 Jơnum min plĕ hră gưl să hăng hơdôm grup glăm ba; amăng anun tơhan kông ang, ling tơhan ngă akŏ, pok pơhai ha amăng plĕ hơdôm bruă jao pơhlôm rơnuk rơnua, gơgrong pơgang tañ hloh, mơng ataih. Ơi Trương Công Thái, kơ-iăng Khua Jơnum min mơnuih ƀôn sang tơring čar Dak Lak pơsit tong:

“Tŏ tui kơtưn amăng bruă kiăo tui lăng, wŏt amăng plang internet, sit biă ñu lĕ hơdôm tơlơi rung răng, bruă mă mơng ƀing sat, ƀing mơnuih dŏ hơdip pơ tač rơngiao pơčut pơčao ngă rung răng ƀơi tơring čar Dak Lak. Mơng anun hmao tlôn ĕp ƀuh, pơgăn hơdôm tơlơi pơhing soh glăi, ngă luk puk amăng mơnuih mơnam kơ bruă plĕ hră ruah khua mua; laih dong pơphô bruă brơi khul git gai ruah khua mua git gai pơsir hĭ, pơgôp pơhlôm rơnuk rơnua, hơđong amăng ƀon lan, anăm brơi ƀuh tơlơi rung răng bơdjơ̆ nao tal plĕ hră anai”.

Hăng tơlơi git gai khut khăt, ha amăng plĕ mơng gơnong glông, tơlơi mut hrŏm mơng djop ƀon lan hrŏm hăng pran gơgrong prong hloh mơng tơhan akŏ phun hăng mơnuih ƀôn sang, bruă prap lui tal plĕ hră ruah Khua pơ ala mơnuih ƀôn sang dêh čar tal XVI hăng khua mua Jơnum min pơ ala mơnuih ƀôn sang rơwang thun 2026-2031 glăk pok pơhai kjăp phik, klă hloh./.