Sang gru grua jơnum plơi Ƀuôn Kđoh dưi ngă hơbô̆ sang gru đưm Êđê. Ring bruă anai amra ngă giong hăng ba yua amăng klâo blan tal III thun 2026.

Laih ngă giong, sang jơnum plơi anai, amra jing anih jơnum plơi, pơphun tơlơi ngui ngor mơak, jơnum lăi pơthâo bruă kơnuk kơna pơtrun, pơphun tơlơi ngui ngor adoh suang amăng plơi sit hơmâo tơlơi mơak; anih pơtô lăi, pok pơblang brơi jơlan hơdră mơ̆ng ping gah, tơlơi phiăn kơnuk kơna kơ ană plơi; djru pơtrut tui bruă mă, tơlơi hơdip mơda hiam mơak, djă pioh gru grua hiam djuai ania ƀiă, laih dơ̆ng bơwih brơi djơ̆ lăp bruă djru wai lăng, pơgang ba tơlơi rơnuk rơnua hơđong kơ mơnuih ƀôn sang. Hrơi anun mơ̆n, ling tơhan kual 5 ăt jơnum pơphun mă bruă man pơdong sang jơnum plơi pla ƀơi thôn 12, să giăm guai dêh čar Ia Rvê, tơring čar Dak Lak. Ring bruă anai, ăt pơdong tui sang jơnum plơi, djru kơ ană plơi pla hơmâo anih mut jơnum pơtum hơđong, pơphun ngui ngor gru grua, mơak ƀơi kual giăm guai dêh čar . Rơnoh prăk man pơdong dua boh sang anai abih tih 5 klai.