Anih anom sang jơnum plơi Đoàn, să guai dêh čar Ia Lôp, tơring čar Dak Lak hơmâo pơhrôp pơkra glăi hiam, rơgoh biă mă. Čih boh hră pôr nao hăng tơlơi pơhiăp: Čơkă hơ̆k mơak tal plĕ hră ruah ding kơna pơ ala mơnuih ƀôn sang dêh čar hăng ding kơna pơ ala mơnuih ƀôn sang djop gưl, rơwang bruă thun 2026-2031” hơmâo akă yôl lui djơ̆ hnơ̆ng ƀơi anăp amăng jang mut nao amăng lan sang jơnum plơi. Ơi Huỳnh Quang Phấn, Khua plơi Đoàn, să Ia Lôp brơi thâo:

 “Plơi Đoàn gơmơi tal anai  amra čơkă rơbêh 300 čô mơnuih ƀôn sang hơmâo anăn ruah khua mut plĕ hră ruah khua  pơ ala mơnuih ƀôn sang dêh čar hăng ding kơna pơ ala mơnuih ƀôn sang djop gưl amăng lơ 15/3 pơ anăp. Kiăng bơwih brơi kơ bruă plĕ hră ruah, plơi gơmơi hơmâo rơkâo să djru prăk pơkra ming, pơhrôp glăi sang jơnum plơi brơi hiam. Khul khua mua wai lăng amăng plơi jak iâu mơnuih ƀôn sang djru hrơi bruă, hrŏm hăng tơhan kông an, tơhan plơi laih anun tơhan pơgang guai dêh čar djru hrŏm mă bruă, ming pơkra glăi sang jơnum plơi, dăp glăi kơƀang grê, kiăng hơmâo anih mut plĕ hră ruah khua ngă djơ̆ tơlơi pơtrun”.

Ơi Bùi Sỹ Đông, dŏ ƀơi plơi Đoàn, kah pơpha, mơ̆ng hrơi pơčlah hĭ plơi pla hơđăp ƀơi tơring čar Bến Tre, nao dŏ pơ anih giăm guai dêh čar tơring čar Dak Lak bơwih ƀong huă, mơ̆ng 30 thun hlâo kơ anai laih, anai lĕ ruah khua tal 5 laih ñu tom nao plĕ hră ruah ding kơna pơ ala mơnuih ƀôn sang dêh čar hăng ding kơna pơ ala mơnuih ƀôn sang djop gưl. Hăng ñu, bruă djru hrŏm pran jua kơ hrơi jơnum prong anai sa tơlơi lăp pơ-ư ang biă mă laih anun mơak mơ̆n:

“Tal jơnum ruah khua pơ ala mơnuih ƀôn sang dêh čar, ding kơna pơ ala mơnuih ƀôn sang djop gưl pơ anăp anai, kâo čang rơmang biă mă ruah đĭ ƀing pơ ala thâo bruă, hơdip tơpă hiam, dưi djru hrŏm bruă git gai ană plơi ba djơ̆ jơlan, pơ ala brơi anŏ kiăng, tơlơi pơmin mơ̆ng mơnuih ƀôn sang, ba boh pơhiăp pơtruh brơi khua mua ping gah, kơnuk kơna thâo, kiăng djop tơlơi mơnuih ƀôn sang rơkâo đĭ, bruă ngă aka ƀu klă amăng plơi pla pơsir hĭ djơ̆ lăp. Laih dơ̆ng, đing nao kơ bruă pơđĭ kyar jơlan glông nao rai ăt kah hăng bruă ia jrao ƀơi kual giăm guai dêh čar tơdơi kơ pơmut anom bruă kơnuk kơna”.

Tal plĕ hră ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang djop gưl, rơwang bruă thun 2026-2031, ƀơi să guai dêh čar Ia Lôp, tơring čar Dak Lak hơmâo 4.600 čô mơnuih ƀôn sang hơmâo anăn plĕ hră ruah khua. Ơi Nguyễn Duy Trung, Kơ-iăng khua git gai ping gah să Ia Lôp brơi thâo, să hơmâo akŏ pơjing 4 anih pơphun plĕ hră ruah khua hăng 10 grup amăng plơi pla, djru prăk kăk pioh ba yua amăng bruă mă, kơtưn ƀing tơhan kông an, tơhan pơgang guai dêh čar, tơhan plơi pla djru pơgang tơlơi rơnuk rơnua amăng kual giăm guai dêh čar, hlâo kơ hrơi amăng hrơi mông hăng tơdơi kơ plĕ hră ruah khua giong, anăp nao kơ bruă kiăng pơphun ruah khua rơnuk rơnua mơak klă.

“Hơmâo  ngă jơlan hơdră, čih boh yom phun pơtô pơblang kơ bruă plĕ hră ruah khua pôr hăng mikrô pơtui jua pơhiăp amăng să, hăng tơlơi pơhing pok pôr hmư̆ dua wơ̆t sa hrơi mơguah hăng či tlam. Akŏ pơjing djop grup pơphun plĕ hră ruah khua, prăp lui djop anŏ gêh găl gơnam yua mă bruă klă hloh kơ bruă plĕ hră ruah khua pơ ala mơnuih ƀôn sang tal XVI hăng khul pơ ala mơnuih ƀôn sang dua gưl pơyŭ rơwang bruă thun 2026-2031 amăng lơ 15/3 pơ anăp”.

Ia Lôp lĕ sa amăng 4 boh să guai dêh čar ƀơi lŏn kơdư hang gah yŭ tơring čar Dak Lak, sô̆ hăng guai dêh čar Kur ƀơi tơring čar Mondulkiri. Ƀơi anih tơhan pơgang guai dêh čar Puih kơđông 735 Ea Hleo, gah anom bruă khua tơhan pơgang guai dêh čar tơring čar Dak Lak mă bruă. Trung tá, Trần Ngọc Kiên, Kơ-iăng khua puih kơđông tơhan pơgang guai dêh čar mrô 735 brơi thâo, hrŏm hăng bruă mă pơgang hơđong kơjăp kơ bruă wai lăng guai lŏn ngă pô dêh čar hlâo, amăng hrơi mông hăng tơdơi jơnum ruah khua ping gah dêh čar ta tal 14, ăt kah hăng plĕ hră ruah khua ding kơna pơ ala mơnuih ƀôn sang dêh čar tal XVI hăng khul pơ ala mơnuih ƀôn sang dua gưl pơyŭ hai khom rơnuk rơnua tong ten.

“Puih kơđông tơhan pơgang guai dêh čar ƀơi Ea Hleo hơmâo lăi pơthâo djop gưl anom bruă ping gah, gong gai kơnuk kơna, brơi hyu ĕp lăng, ruah mă hơdră prăp rơmet djop gơnam yua mă bruă ƀơi anih plĕ hră ruah khua; mơ-it nao ƀing tơhan ngă hrŏm kih rơmet ngă rơgoh, pơhrôp hiam, čih pang bơnal yôl pôr pơthâo bruă ruah khua, pôr amăng mikrô gong phun pơtui jua pơhiăp ƀơi să hmư̆ kơ bruă ruah khua. Hrŏm hăng anun, anom bruă ăt pơtrut hyu pơtô brơi ană plơi pla thâo mơneč soh sat mơ̆ng ƀing pơblư̆ kơnuk kơna lŏn ia yua ƀing ayăt roh pô ngă, mơ̆ng anun kiăng mơnuih ƀôn sang khom răng kơđiăng pơđĭ tui pran jua tơlơi đăo kơnang kơ kơnuk kơna, laih anun pơkơdong glăi tơlơi phă pơrai mơ̆ng ƀing ayăt tŭ yua hloh”.

Tơlơi gum hrŏm mơ̆ng abih bang glông bruă kơđi čar hơmâo tơlơi tŭ ư hrŏm hăng ană plơi pla, bruă mă prăp lui tal ruah khua ƀơi să guai dêh čar či Ia Lôp hlăk pok pơhai ngă tui hmar hăng tañ hloh, djơ̆ tơlơi phiăn. Mơ̆ng bruă pơhrôp hiam, ming pơkra glăi, pơtrut hyu pơtô pơblang kiăng pơhlom tơlơi rơnuk rơnua hơđong, abih bang anăp nao kơ bruă ruah khua lơ 15/3 jing hrơi mơak prong, ba tơlơi čang rơmang ruah djơ̆ mơnuih hơmâo pran jua hiam klă, tơpă hnơ̆ng mă bruă yua kơ ană plơi pla sit nik, tui tơlơi kiăng anŏ čang rơmang mơ̆ng ană plơi ƀơi kual giăm guai dêh čar tơring čar Dak Lak.