VOV4.Jarai - Mơguah lơ 8/3, Grŭp hyu mă bruă mơng Khul djuai ania gah Khua pơ ala mơnuih ƀôn sang dêh čar yua kơ Kơ-iăng Khua Khul djuai ania dêh čar ta, yă Cao Thị Xuân ngă Khua grŭp hmâo laih mông mă bruă hăng Jơnum min mơnuih ƀôn sang tơring čar Daklak kiăng pơsit anô̆ bơdjơ̆ nao truh pơkă kual djuai ania ƀiă tui bôh thâo hră pơđĭ kyar phrâo anai truh bruă ngă tui hơdră bruă djuai ania ƀơi tơring čar.

Yă Cao Thị Xuân Kơ-iăng Khua Khul djuai ania dêh čar ta

Tui hăng tơlơi pơkă phrâo, amăng rơwang 2021-2025, tơring čar Daklak hmâo 54 bôh să kual mrô III, 5 bôh să kual mrô II, 71 bôh să kual mrô I, 519 bôh plơi tơnap tap kual djuai ania ƀiă hăng kual čư̆ siăng. Tui anun, đơ đam tơring čar hmâo 54 bôh să ƀu dô̆ kual djuai ania ƀiă hăng kual čư̆ siăng, 4 bôh să tơtlaih mơng să tơnap tap hăng 143 bôh plơi tơnap tap ƀu dô̆ tơnap tap. Hơdôm hơdră bruă gum djru mơnuih mơnam glăk ngă tui hơdôm bôh să, plơi phrâo lăi anun amra ƀu hmâo ngă tui dong tah. Amăng mông mă bruă, ƀing khua pơ ala bơkơtuai kơ bôh tơhnal ngă tui hơdră bruă hơđong tơlơi hơdip mơda mơnuih mơnam amăng hơdôm bôh să, plơi tơnap tap djuai ania ƀiă hăng kual čư̆ siăng, rơwang 2016-2022; pơsit anô̆ pơtrut mơng Tơlơi pơsit phrâo lom pok pơhai ƀơi tơring čar. Mơng anun, rơkâo Khul djuai ania rơkâo Khua pơ ala mơnuih ƀôn sang dêh čar ta pơsit brơi hơdră pơtrun tuh pơplai hơdră bruă djru pha ra kơ hơdôm bôh să, plơi tơtlaih mơng tơnap tap amăng rơwang 2021-2025 mơ̆ bruă bơwih ƀong mơnuih mơnam dô̆ tơnap tap; brơi ngă tui dong hơdôm hơdră gum djru, kiăng pơhlôm hơđong tơlơi hơdip mơda mơnuih mơnam./.

Siu H’ Prăk: Pơblang