VOV4.Jarai - Lơ 19/8, Khul pơ ala mơnuih ƀon sang tơring čar Dak Lak tal X, rơwang thun 2021-2026 pơphun Jơnum tal 5 kiăng kơ sem lăng, pơsit mă yua hơdôm tơlơi pơtrun yôm phăn. Amăng tal jơnum anai ƀing khua mua sem lăng, tŭ mă yua 12 tơlơi pơtrun yôm phăn, amăng anun hơmâo 7 tơlơi pơtrun bơdjơ̆ nao 3 hơnong pơkă dêh čar kơ bruă pơđĭ kyar bơwih ƀong huă, mơnuih mơnam kual mơnuih djuai ania ƀiă hăng kual ataih, jơlan hơdră pơhrŏ trun ƀun rin hơđong kjăp, man pơdong plơi pla phrâo rơwang thun 2021-2025. Sit biă ñu, tơlơi pơtrun kơ bruă pơđĭ kyar bơwih ƀong huă mơnuih mơnam kual mơnuih djuai ania ƀiă hăng kual ataih, asuek thun 2022, tơring čar amra hrŏ 3,5% mrô sang anŏ ƀun rin. Abih tih rơnoh prăk mă yua tui hơnong pơkă anai lĕ rơbêh 433 klai prăk.

Mông jơnum

Tơlơi pơtrun ngă tui jơlan hơdră tui hơnong pơkă dêh čar amăng man pơdong plơi pla phrâo, truh thun 2025, Dak Lak gir run hơmâo 4 boh tơring glông, 100 boh să dưi ngă pơgiong đĭ plơi pla phrâo. Kiăng kơ ngă tui hơnong pơkă anai, Khul pơ ala mơnuih ƀon sang tơring čar Dak Lak tŭ ư hăng rơnoh prăk tuh pơ alin pơđĭ kyar mơng ngăn drăp Kơnuk kơna rơwang 5 thun mơng 2021-2025 lĕ 1.557 klai prăk, amăng anun ngăn drăp mơng gơnong glông lĕ 657 klai prăk, ngăn drăp amăng tơring čar lĕ 900 klai prăk.

Siu Đoan: Pơblang