VOV4.Jarai - Rơwang hrơi tơjuh rơgao, ƀơi Tal jơnum lok 4, Khul pơ ala mơnuih ƀôn sang tơring čar Daklak tal 10, ƀing khua pơ ala hmâo đing nao bơkơtuai lu bôh yôm bơdjơ̆ nao truh hơdôm bruă ngă tui hơdôm tơhnal pơkă, bruă pơđĭ kyar bơwih ƀong – mơnuih mơnam, pơhlôm pơgang lŏn ia – rơnuk rơnua plơi pla 6 blan rơnuč thun, hơdôm tơlơi bơdjơ̆ nao tơlơi hơdip mơnuih ƀôn sang.

Tơlơi lăi pơthâo glăi tal jơnum, 6 blan akô̆ thun, khă ăt dô̆ gơgrong ba mơn anô̆ bơdjơ̆ nao mơng klin Covid-19, samơ̆ bruă bơwih ƀong Daklak hmâo mơn hơdôm gru nam klă lơm abih bang gơnam him lăng đĭ 7,37%, pơhrui ngăn drăp kơnuk kơna hmâo 4.860 klai prăk, đĭ giăm truh 40% bơhmu hăng thun hlâo; prăk pơhrui glăi mơng gơnam sĭ kơ dêh čar tač rơngiao hmâo 845 klăk dolar Mi, đĭ rơbêh kơ 61%. Hơdôm bruă mă tuai čuă ngui, sĭ mơdrô, bơwih ƀong huă hmâo lu pơplih phrâo. Khă hnun hai, pơsir prăk tuh pơplai bruă hrom ƀiă, kơnong kơ hmâo rơbêh kơ 20%; pơsir bruă mă ngă akă djơ̆ tui kơčăo bruă ba tơbiă, mrô tlâ̆o vaccine pơgang Covid-19 ară tal 3, 4 amăng abih bang mơnuih ƀôn sang ƀiă, hơdôm jơlan hơdră pơkă mơng lŏn ia pok pơhai dô̆ kaih...

Rơgao kơ bơkơtuai, ƀing khua pơ ala phun ñu tŭ ư hrom hăng tơlơi lăi pơthâo glăi bôh tơhnal ngă tui bruă 6 blan akô̆ thun, hrom hăng anun ba tơbiă sa dua tơlơi gum pơhiăp kiăng pok pơhai ba glăi bôh tơhnal bruă mă 6 blan rơnuč thun kah hăng: pơtrut kơtang pơplih pơkra hră pơ-ar hăng ngă pơhư̆č tuh pơplai; đing nao tuh pơplai, pơđĭ kyar jơlan nao rai ha amăng plĕ, phrâo rơnuk anai.... Gah bruă đang hmua, bơdjơ̆ nao bruă sầu riêng Việt Nam sit nik dưi sĭ kơ dêh čar Khač mơng lơ 11/7/2022, khua pơ ala Trần Hồng Tiến, Khua git gai Ping gah tơring glông Krông Pač lăi lĕ: anai jing tơlơi gal rah hăng tơlơi lông rah hăng bruă đang bruă tơring čar pơ̆ anăp anai.

 “Ƀing gơmơi čang rơmang Jơnum min mơnuih ƀôn sang tơring čar hăng hơdôm gơnong bruă pha ra lĕ gơnong bruă đang hmua hmâo hơdôm jơlan gah, hơdôm anô̆ prăp lui djru mơnuih ngă đang hmua, Mơnuih ƀôn sang amăng tơring čar đing nao biă yua kơ ră anai ƀing ta hmâo năng ai ñu 12.000 ektar đang phun sầu riêng hmâo bôh sĭ hăng rơbêh kơ 125.000 tơn bôh ñu amra sĭ hyu tơdah ƀing ta ngă ƀu klă amra jing tơnap biă”.

Đơ đam anih jơnum

Đing nao tơlơi pơđĭ kyar kual neh wa djuai ania ƀiă dô̆, khua pơ ala Y Čar Êñuôl, Kơ-iăng Khua Grŭp djuai ania Khul pơ ala mơnuih ƀôn sang tơring čar Daklak bơngot lơm tui tơlơi pơkă ƀun rin phrâo lĕ mrô sang anô̆ ƀun rin mơng tơring čar đĭ lu biă. Amăng anun, kual neh wa djuai ania ƀiă đĭ truh 65,3%. Khua pơ ala Y Čar Êñuôl rơkâo, khom hmâo hơdôm hơdră bruă đing nao hloh dong truh mơnuih anai:

“Rơkâo Jơnum min mơnuih ƀôn sang lăng ba črâo ba hăng hmâo hơdră bruă khut khăt hloh kơ bruă hrŏ trun ƀun rin. Ngă tui bruă hrŏ trun ƀun rin ba glăi bôh tơhnal, đing nao hơdôm hơdră bruă gum djru kơ kual asuek, ataih kiăng hrŏ trun ƀun rin tañ hăng kơjăp phik. Hrŏ trun mrô sang anô̆ ƀun rin amăng kual neh wa djuai ania ƀiă, biă ñu lĕ sang anô̆ ƀun rin amăng kual djuai ania ƀiă hơđăp ƀơi anai, ngă tui ha amăng plĕ hăng hơdôm jơlan hơdră”.

Ơi Y Vinh Tơr – Ding kơna Ping gah dêh čar – Kơ-iăng Khua Jơnum min djuai ania, Khua Grŭp khua pơ ala mơnuih ƀôn sang tơring čar Daklak pơhiăp amăng mông pok phun Tal jơnum

Bơkơtuai kơ bruă ia jrao, khua pơ ala Nguyễn Ngọc Hùng, Kơ-iăng Khua Grŭp bôh thâo mơnuih mơnam Khul pơ ala mơnuih ƀôn sang tơring čar Daklak bơngot kơ tơlơi ơi ia jrao kual kơnuk kơna rơkâo pơdơi bruă hăng bruă juă nua jrao, gơnam mă yua gah ia jrao kaih, bơbeč truh bruă bơwih brơi tơlơi suaih pral mơnuih ƀôn sang. Yua anun, khua pơ ala rơkâo đing nao lăng ba jơlan pơsir 2 bôh yôm anai.

“Tơdah tơlơi anai ƀu hmâo jơlan gah pơsir pioh mă yua klă pơ̆ anăp anai amra hmâo tơlơi anom ia jrao kơnuk kơna, biă ñu gah tơring čar amra ƀu hơđong ôh mrô mơnuih mă bruă. Yua anun, ƀing ta khom hmâo bruă pơsir kiăng ngă hiưm hơpă ƀing mơnuih gum hrom hơdôm bruă mă hơđong pran jua ngă tui hơdră bruă kơnuk kơna hluai tui anun ƀing ta mơng dưi git gai djă pioh klă hơdôm bruă mă”.

Amăng 6 blan rơnuč thun, Jơnum min mơnuih ƀôn sang tơring čar Daklak phrâo đing nao dong bruă pơgang, pơgăn klin Covid-19, laih anun hơkrŭ glăi, pơđĭ kyar bơwih ƀong – mơnuih mơnam. Kiăng ngă giong hơdôm tơhnal ba tơbiă pơđĭ kyar thun 2022, ơi Trần Phú Hùng, Kơ-iăng Khua Khul pơ ala mơnuih ƀôn sang tơring čar Daklak rơkâo Jơnum min mơnuih ƀôn sang tơring čar đing nao pơtlaih hơdôm tơlơi gun, tơlơi tơnap gah bruă prăk kak tuh pơplai bruă hrom:

“Rơkâo jơnum min lơm pơsit hơdôm rơwang bruă, hơdôm ƀirô pơphô brơi khom pel ĕp glăi tŏng ten lơm Khul pơsit hơdră  pơtrut tuh pơplai, khă hnun hai lơm hmâo tơlơi pơtrut pơsit lĕ bưp tơlơi pơplih pơkra rơwang bruă, anun lĕ bruă pơsir anih anom pioh pơkra pơjing kaih. Yua anun rơngiă mông lu biă, rơkâo Jơnum min khom pơplih pơkra bruă anai”.

Hrom hăng bruă pơsit tơlơi, bôh tơhnal ngă tui kơčăo bruă pơđĭ kyar bơwih ƀong – mơnuih mơnam, hơđong pơgang lŏn ia 6 blan akô̆ thun hăng hơdôm bruă pơsir phun 6 blan rơnuč thun, amăng tal jơnum anai, Khul pơ ala mơnuih ƀôn sang tơring čar Daklak hmâo bơkơtuai, pel ĕp glăi lu tơlơi pơtrun pơsit yôm phăn kah hăng: Tơlơi pơtrun pơsit pơkă pơpha bruă mă jia hăng bruă man pơdŏng amăng tơring čar; Tơlơi pơtrun pơsit pơkă rơnoh pơhrui hơdôm djuai prăk apah hăng pơčruh hrom, Tơlơi pơtrun pơsit kơ bruă pơplih pơkra hơdră pơtrun tuh pơplai hơdôm rơwang bruă djru pơđĭ kyar kual guai lŏn ia – Rơwang bruă anet tơring čar Daklak; Tơlơi pơtrun pơsit pơkă kơ phiăn, tơhnal ba tơbiă, rơnoh pơkă pơpha ngăn drăp Kơnuk kơna ngă tui Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng, rơwang mơng thun 2021-2030./.

            VOV Tây Nguyên: Čih – Siu H’ Prăk: Pơblang