Amăng anun, lăp đing nao lĕ Tơlơi pơtrun pơsit pơplih pơkra hăng pơpha kơčăo bruă prăk tuh pơplai pơđĭ kyar ngăn drăp dêh čar hăng ngăn drăp tơring čar ngă tui Jơlan hơdră pơkă mơng dêh čar hrŏ trun ƀun rin kơjăp phik, kơčăo bruă thun 2022; Tơlơi pơtrun pơsit pơpha kơčăo bruă prăk tuh pơplai pơđĭ kyar ngăn drăp Kơnuk kơna rơwang 5 thun (2021-2025) ngă tui jơlan hơdră Rơwang bruă mrô 2, 4, 5, 6, 10 gah Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng kơ hơdôm ƀirô, anom bruă, plơi pla.

Pơhiăp pơđut tal jơnum, yă Huỳnh Thị Chiến Hoà, Khua Khul pơ ala mơnuih ƀôn sang tơring čar Daklak lăi lĕ, hơdôm tơlơi pơtrun pơsit dưi pel ĕp lĕ hơdôm tơlơi pơtrun pơsit yôm phăn, kiăng pơplih phrâo hơdră bruă, tơlơi phiăn mơng Kơnuk kơna djơ̆ hăng tơlơi hmâo sit mơng plơi pla, pơjing gru than djơ̆ phiăn pioh hơdôm gưl, hơdôm gơnong bruă pơphun pok pơhai ngă tui. Biă ñu lĕ tơlơi pơtrun pơsit kơ jơlan hơdră pơkă mơng lŏn ia thun 2022 hăng rơwang 2021-2025./.