Khul tơhan hơđăp djop tơring glông, plơi prong ƀơi tơring čar Dak Lak hơmâo pơphun jao 200.000 hơdrôm hră čih brơi kơ giăm 15.600 čô čơđai sang hră gưl sa ƀun rin. Mrô hơdrôm hră anai yua kơ Khul mơnuih ngă bruă sĭ mơdrô mơ̆ng tơhan hơđăp Việt Nam djru, tơki kơ hơdră anăn “Sa klăk hơdrôm hră čih brơi kơ čơđai sang hră ƀun rin djop djuai ƀiă ƀơi kual Dap Kơdư hăng tơring čar Bình Phước”.

Anai lĕ gơnam djru yôm pơphăn biă mă pơdah rai tơlơi djru, đing ba mơ̆ng Khul tơhan hơđăp djop gưl pioh kơ djop hnơr rơnuk ană tơčô, čơđai rơnuk anai, ngă gêh găl, lăng ba pơtrut ƀing ană amôn čơđai muai sang anŏ ƀun rin djop djuai ƀiă gir run nao hrăm hră thun phrâo anai.