Ƀing khua mua pơtong glăi yua ră anai, kông ngăn ia yua jai hrơi hrŏ hĭ amăng gŭ lŏn, ƀu djop pioh yua amăng bruă pơđĭ kyar bơwih ƀong huă mơnuih mơnam lĕ, Tơlơi phiăn pơgang kông ngăn ia yua čih pơkra glăi, pơhrua phrâo, ngă tui djơ̆ tơlơi pơkă pơgang anŏ tŭ yua kơ abih bang, đing nao bruă pơgang kông ngăn yôm ia yua, kiăng pơhrua nao dơ̆ng anăn pioh jŭ yap, čih pơsit kông ngăn ia yua amăng gŭ lŏn djơ̆ găl hăng tơlơi phiăn. Pô pơ ala yă Lê Thị Ngọc Linh, grup khua mua pơ ala mơ̆ng tơring čar Bạc Liêu lăi:

“Ră anai tơlơi mă yua hơduah ĕp ia amăng gŭ lŏn hơdơ̆ hor ƀu hơmâo pơkă hnong pơgang pioh ba truh tơlơi huač ia laih anun ngă hơƀak jrak anih ia rô amăng gŭ lŏn. Ƀơi glông 2 mơta tơlơi 52 tơlơi phiăn pơkă, mă yua ia amăng gŭ lŏn mơ̆ng djop sang anŏ pioh yua rim hrơi ƀong mơñum, khom jŭ yap tong ten mơ̆n djŏ. Tui hăng mrô rơnoh jŭ yap anun bruă kơnuk kơna thâo hơdră wai lăng pơtô ba hmao kru pơsir hơdôm tơlơi pơdjơ̆ nao hnoh, ia yua mơ̆ng gơñu đah mơ̆ng pơgang pioh djơ̆ găl”.

Lăi nao bruă ia yua rim hrơi, lu khua mua pơ ala rơkâo hơmâo tơlơi pơkă rơđah rơđong hloh hơdră pơgang djop ring bruă ia yua. Yua kơ boh tŭ yua ia yua rim hrơi ăt pơdjơ̆ nao kơ tơlơi suaih pral mơnuih ƀôn sang mơ̆n. Pô pơ ala Huỳnh Thị Phúc rơkâo:

“Tơdah hơmâo hơdôm tơlơi kiăng ječ amăng bruă hơdip mơda dŏ dong ƀong huă mơnuih ƀôn sang kiăng yua lu, bơhmutu adai không phang kơsing pah prong, pơđiă kơtang sui hrơi blan, rơnoh ia či yua lu tui khom pơđĭ mơ̆n lu hloh anŏ pơkă tơđar. Kâo rơkâo khul čih pơkra tơlơi phiăn kơsem min pơhrua nao thim hơdôm tơlơi pơkă rơnoh ia či yua, ba yua ia tui hluai anŏ kiăng gêh găl ayuh hyiăng adai pơblih laih anun tơlơi hơmâo sit nik amăng tơlơi hơdip mơda sĭ mơdrô ăt kah hăng bơwih brơi tơlơi hơdip mơda mơnuih ƀôn sang”.

Tơlơi phiăn čih phrâo pơkă anŏ či hơmâo, pơpha yua ia, lơ̆m anun ră anai ia jai hrơi ƀiă, adai không phang pơ-iă kơtang amra kơƀah ia yua rim thun, tui hăng pô pơ ala yă Nguyễn Thị Thu Thủy, grup khua mua pơ ala mơ̆ng tơring čar Bình Định kiăng čih pơkă lăng hlâo lăp đah mơ̆ng hơmâo hơdră ƀư̆ pơkra djơ̆:

“Khul čih tơlơi phiăn kiăng hơmâo tơlơi pơkă 2 thun 1 wơ̆t dăp lăng hơdră bong glăi anŏ hơmâo kông ngăn ia yua pioh bơwih brơi ia yua amăng plơi prong yua adai pơblih ayuh hyiăng. Hơdră dăp hlâo brơi kơ plơi prong bơbeč djơ̆ ia yua ia mơsin hram bơbeč mơ̆ng anŏ pơblih ayuh hyiăng ngă; pel ĕp tong ten anŏ pok pohai ia djah, anŏ ngă hơƀak jrak hram amăng ia yua, pioh ƀôp brơi kơ plơi prong yua, yua ia djah mơ̆ng djop anih tuh tia pơkra pơjing sa ƀut bơbeč ƀu ƀiă ôh kơ ia yua mơ̆ng djop tơring čar dŏ pơ hlao ia krông, ia ania, kơsem min lăng anŏ či truh sat ngă amăng hnoh ia tơdah kơƀah ia yua”.

Lăi pơthâo tơlơi hơmâo sit nik ƀơi lu tơring čar, brơi man pơdong anŏ pơkă lăng kông ngăn ia yua, tơlơi pơhing, mrô rơnoh pơtong glăi kông ngăn ia yua, pô pơ ala yă Vương Thị Hương, grup mơ̆ng Hà Giang rơkâo:

“Kâo tŭ ư hăng bruă mă akŏ pơdong anom bruă pơkă lăng tơlơi pơhing mrô rơnoh kông ngăn ia yua amăng dêh čar pioh kơ ƀing ta thâo tơlơi pơhing hrŏm sa hnong hloh. Khă tui anun, tơlơi phiăn anai pơkă aka ƀu rơđah ôh. Yua kơ anun kâo rơkâo pơhrua dơ̆ng hrơi blan pơkă, bruă či ngă tui ngă pơgiong čih pioh jŭ yap mrô rơnoh kông ngăn ia yua dêh čar bơwih brơi kơ bruă wai lăng, pơgang pioh ia tui hăng boh thâo ia rơgơi phrâo pơkă mrô pơtum ƀơi dêh čar hăng tơring čar”.

Ƀơi anăp kơ tơlơi pơblih tơnap dưi thâo hlâo mơ̆ng ayuh hyiăng, adai hlim hơjan ƀu lê̆ anŏ, pô pơ ala Nguyễn Hữu Thông, grup mơ̆ng tơring čar Bình Thuận lăi lĕ, pơkă tum teč hloh kơ bruă ba yua boh thâo ia rơgơi, wai lăng, pơgang, mă yua, hơduah ĕp kông ngăn ia, pơhlôm hlâo anŏ ngă bơbeč sat kơ ia yua:

“Kâo rơkâo pơhrua dơ̆ng bruă kơsem min hơdră ba yau boh thâo ia rơgơi pơsir djong ia ia rơsĭ dưi mơñum pioh pơjing bruă mă pơkra rai ia hơdjă dưi mơñum ăt kah hăng pơhlôm djop ia yua boh nik ñu ia ƀlang ia tơba bơwih brơi tơlơi dŏ dong ƀong huă hăng ngă hmua pla pơjing mơ̆ng mơnuih ƀôn sang, boh nik ñu mơnuih ƀôn sang dŏ pơ bul pơtâo plao ia rơsĭ pơmut tơlơi pơkă puang g, glông 1, mơta tơlơi 6 amăng kơčăo bruă tơlơi phiăn anai.