VOV4.Jarai - Ƀơi mông jơnum lok 8, Jơnum min khua apăn bruă git gai pơ ala mơnuih ƀon sang dêh čar pơƀut bơkơtuai hăng tŭ ư bruă kiăng pơtrun tơlơi phiăn kơ bruă dưi ngă, bruă kiăng ngă, mơnuih ngă bruă mơng Anom djru bruă kơ khua mua pơ ala mơnuih ƀon sang đah mơng djơ̆ hăng tơlơi kiăng pơplih phrâo hơdră ngă bruă, ngă bruă tŭ yua mơng Ƀirô khua git gai pơ ala mơnuih ƀon sang, hơdôm anom bruă mơng Ƀirô khua pơ ala mơnuih ƀon sang dêh čar.

Tŭ ư hăng bruă pơhrua tui tơlơi kiăng ngă bruă mơng Anom djru bruă khua mua pơ ala mơnuih ƀon sang kơ bruă mă mơng Jơnum min khua pơ ala mơnuih ƀon sang, bruă ruah khua yua Jơnum min khua apăn bruă pơ ala mơnuih ƀon sang dưi ngă đah mơng pơsit rơđah hloh tơlơi dưi ngă mơng Anom djru bruă khua pơ ala mơnuih ƀon sang, sa, dua tơlơi pơgôp hiăp ăt kiăng pơkă rơđah bruă kiăng ngă, tơlơi dưi mơng Anom djru bruă khua pơ ala mơnuih ƀon sang hăng tơlơi dưi mơng hơdôm anom bruă bơdjơ̆ nao đah mơng huăi bơrơkua nao rai.

Pơčrông sai kơ bruă Anom djru bruă khua pơ ala mơnuih ƀon sang ngă hrŏm  hăng Jơnum min Tơlơi phiăn pơphô brơi, djru Jơnum min khua apăn bruă pơ ala mơnuih ƀon sang amăng bruă pơgôp tơlơi pơhiăp hăng bruă mă, krư̆, ngă kơđi khua pơ ala mơnuih ƀon sang dêh čar, hyu hơduah ĕp anih dŏ, anih mă bruă mơng mua pơ ala mơnuih ƀon sang lơ̆m pô khua anun hơmâo tơlơi soh, tui hăng Khua Jơnum min Mơnuih mơnam mơng Ƀirô khua git gai pơ ala mơnuih ƀon sang dêh čar yă Nguyễn Thuý Anh, anai lĕ tơlơi dưi ngă mơng Jơnum min Tơlơi phiăn:

“Bruă hyu ĕp, sem lăng, mă pơkŏng khua mua, Jơnum min Tơlơi phiăn khŏm sem lăng hră pơ-ar, hơdră ngă bruă hă ƀŭ. Bruă mă pơkŏng djơ̆ tơlơi phiăn hă ƀŭ. Anun lĕ bruă mơng Jơnum min Tơlơi phiăn ƀu djơ̆ bruă mă mơng Anom djru bruă khua pơ ala mơnuih ƀon sang ôh”.

Jơnum min khua apăn bruă pơ ala mơnuih ƀon sang lăi, bruă pơhrua tui bruă mă, tơlơi dưi ngă phrâo lăi nao pơmut amăng Tơlơi pơtrun lĕ lăp djơ̆ hăng tơlơi kiăng mơng bruă ruah mă yua mơnuih mă bruă. Laih dong tŭ ư hrŏm kiăng Anom djru bruă git gai amăng tơlơi jao bruă anai, djơ̆ hăng bruă ruah, jao bruă kơ khua mua hăng anŏ ječ ameč mơng bruă mă anai tui tơlơi phiăn tơgŭ kơđi.

Jơnum lok 8 pơgôp hiăp sem lăng tơlơi pơtrun pơkă hơdră ngă bruă mơng Jơnum min Khua apăn bruă pơ ala mơnuih ƀon sang dêh čar.

Ding kơna Jơnum min khua apăn bruă pơ ala mơnuih ƀon sang ăt rơkâo, pơhrua tui hơdôm tơlơi hơduah tơña, pơphun ngă bruă bơdjơ̆ nao bruă wai lăng mơnuih mă bruă hăng ƀing khua pơ ala mơnuih ƀon sang bruă mă gơñu gơgrong; bruă pơkôl pơkă, pơtô ba hăng pơphun bruă apah bơni, djru prăk kăk hăng hơdôm tơlơi pơkă pơhlôm brơi pơkŏn dong hăng ƀing khua pơ ala mơnuih ƀon sang đah mơng djơ̆ lăp.

Khua git gai pơ ala mơnuih ƀon sang dêh čar ơi Vương Đình Huệ kiăng pơkôl pơkă rơđah bruă mă, tơlơi dưi hăng ngă rơđah tơlơi gơgrong bruă mơng Anom djru bruă khua pơ ala mơnuih ƀon sang amăng rim bruă mă, biă ñu bruă prăp rơmet, gum djru khua mua mơng hrơi ruah khua pơ ala mơnuih ƀon sang truh hrơi ƀing khua pơdơi thun tha:

“Bruă ruah khua ƀơi anai pơkă rơđah Anom djru bruă djru kơ Khul ruah khua Dêh čar hăng Jơnum min khua apăn bruă pơ ala mơnuih ƀon sang hơdôm bruă hơget? Lăng glăi anŏ hơget Anom bruă git gai, anŏ hơget kiăng gum hrŏm ngă bruă? Hăng hơdră djru ba mơng khua mua pơ ala mơnuih ƀon sang dêh čar hăng ƀing khua yua Jơnum min khua apăn bruă pơ ala mơnuih ƀon sang wai lăng? Bruă dưm dăp ruah mơnuih ngă bruă kâo kiăng dong mơng hrơi phrâo akŏ pơdong mơtăm, mơng mông jơnum blung a hăng tơdơi anai ăt kiăng jao kơ sa anom bruă pơtruh brơi anun lĕ Anom djru bruă khua mua pơ ala mơnuih ƀon sang. Hơdôm Jơnum min mơng Ƀirô khua pơ ala mơnuih ƀon sang, Khul wai lăng Djuai ania, hơdôm Jơnum min pơphun bruă ngă tui hơdôm tơlơi pơkôl pơkă rua khua mua sem lăng, pơsit ngă hơdôm tơlơi anai”.

Ăt ƀơi mông jơnum lok 8, Jơnum min khua apăn bruă pơ ala mơnuih ƀon sang, khua pơ ala hơmâo pơgôp hiăp kơ Tơlơi pơtrun pơplih pơkra Tơlơi phiăn ngă bruă mơng Jơnum min khua apăn bruă pơ ala mơnuih ƀon sang. Ƀing khua tŭ ư hăng 3 mơta tơlơi git gai kơ bruă pơkra ming tơlơi phiăn ngă bruă đah mơng djơ̆ hăng tơlơi kiăng pơplih phrâo hơdră ngă bruă, pơđĭ tui anŏ klă, anŏ tŭ yua mơng Ƀirô khua git gai pơ ala mơnuih ƀon sang, hơdôm anom bruă mơng Ƀirô khua pơ ala mơnuih ƀon sang. Ƀing khua kiăng pơkra glăi Tơlơi phiăn, tơlơi pơkôl pơkă ngă bruă mơng Jơnum min khua apăn bruă pơ ala mơnuih ƀon sang dêh čar lăp djơ̆ hăng hrơi mông pơplih phrâo mơng anom bruă kơđi čar, pơtrut mă yua mrô, akŏ pơdong Anom bruă khua pơ ala mơnuih ƀon sang mă yua điện tử, dưi ngă bruă hơdeč hmar, tŭ yua amăng hrơi mông tơnap, biă ñu hơdôm tơlơi truh aka ƀu phiah hơmâo djơ̆ ôh kah hăng klin Covid-19...Rơngiao kơ anun, kiăng pơsit rơđah tơlơi pơmin lĕ Tơlơi phiăn ngă bruă ƀu pơkă ôh tơlơi dưi phrâo mơng Jơnum min khua apăn bruă pơ ala mơnuih ƀon sang dêh čar, kơnong pơkôl pơkă akŏ tlôn hơdră ngă bruă, hră pơ-ar ngă bruă rơđah rơđông đah mơng ngă hơdôm tơlơi dưi ngă hơmâo pơkă amăng tơlơi phiăn, tơlơi pơtrun mơng Ƀirô khua git gai pơ ala mơnuih ƀon sang dêh čar, Jơnum min khua apăn bruă pơ ala mơnuih ƀon sang dêh čar.

VOV1: Čih - Siu H’Mai: Pơblang