VOV4.Jarai - Kơđi tơlơi 42 čô mơnuih Việt Nam tlaih đuăi mơng casino ƀơi guai kơplah wah dêh čar Kur hăng Việt Nam hăng hơdôm tơlơi lăi pơthâo mơnuih mă bruă ƀu djơ̆ phiăn nao mă bruă pơ̆ dêh čar tač rơngiao jê̆ hăng anai dưi hmâo lu mơnuih đing nao. Amăng mông jơnum hăng mơnuih mă tơlơi pơhing phrâo tui tơđar Ding jum pơtom hiăp pơphun amăng rơnuč rơwang hrơi tơjuh rơgao, mơnuih truh pơhiăp mơng Ding jum pơtom hiăp dêh čar Việt Nam yă Lê Thị Thu Hằng pơsit, hơdôm bôh ƀirô gơgrong gah bruă anai hăng hơdôm plơi pla khom lăi pơtă hlâo, pơđĭ tui tơlơi pơmin mơng mơnuih mơnam, mơng mơnuih ƀôn sang pioh kơ bruă nao mă bruă pơ̆ dêh čar tač rơngiao, amăng anun hmâo dêh čar Kur.

Ƀơi anăp tơlơi jai hrơi jai hmâo kơ tơlơi mơnuih Việt Nam hmâo ƀing hyu plư ba mơnuih nao mă bruă pơ̆ dêh čar Kur ƀu djơ̆ phiăn hăng hmâo tơlơi tơnap lom mơnuih mă bruă nao mă bruă, mơnuih truh pơhiăp mơng Ding jum pơtom hiăp Lê Thị Thu Hằng brơi thâo:

“Anai lĕ tơlơi ƀing gơmơi gleng nao lu mơn. Ding jum pơtom hiăp, hơdôm bôh ƀirô pơ ala kơ dêh čar Việt Nam ƀơi dêh čar Kur gum hrom kơjăp hăng hơdôm ding jum, gơnong bruă, plơi pla amăng dêh čar, biă ñu hơdôm plơi pla giăm ha mơguai hăng dêh čar Kur hăng gum hrom hăng hơdôm ƀirô gơgrong pơsir tơlơi anai pơ̆ dêh čar arăng kiăng thâo, pơsit rơđah, pok pơhai, bruă pơgang ba mơnuih hăng hmao djru hơdôm mơnuih tơnap, bưp tơlơi ƀu klă. Phrâo tom adih anai, hơdôm bôh ƀirô pơsir kơđi tơlơi anai hmâo pơtlaih brơi laih hăng ba glăi Việt Nam năng ai ñu rơbêh kơ 500 čô mơnuih mă bruă glăi pơ̆ dêh čar pơhlôm, djru ngă hră pơ-ar kơ hơdôm rơbâo čô mơnuih pơkon”.

Amăng 6 blan akô̆ thun anai, Ding jum kông ang hmâo phă prai lu khul mơnuih, mă pơkŏng lu mơnuih ba mơnuih nao mă bruă ča pơ̆ dêh čar Kur hăng pơpha hyu hră lăi pơtă mơnuih bơdjơ̆ nao tơlơi anai. Tui hăng Pô pơtruh pơhiăp mơng Ding jum pơtom hiăp dêh čar ta, lom hơdôm mơnuih mă bruă dêh čar Việt Nam nao mă bruă pơ̆ dêh čar Kur, lu mơnuih bưp tơnap lom dô̆ mă bruă. Samơ̆, lom pok pơhai bruă pơgang ba mơnuih, hơdôm bôh ƀirô pơ ala kơ Việt Nam ăt bưp mơn sa dua mơta tơlơi gun. Yă Lê Thị Thu Hằng brơi thâo:

“Blung hlâo, anun lĕ bruă ngă juăt djru pơtlaih kiăng hmâo tơlơi gum hrom kơjăp mơng ƀirô gơgrong pơsir tơlơi anai pơ̆ dêh čar arăng. Lu mơnuih mă bruă ƀu hmâo hră pơ-ar djă ba amăng drơi, ƀu hmâo hră pơ-ar mut tơbiă yua kơ găn rơgao dêh čar arăng ƀu djơ̆ phiăn, yua anun rơngiă lu mông pioh pơsit rơđah tơlơi pơhing pô sang ăt kah hăng ngă truh lu tơlơi tơnap ngă gun lom jao bruă, tŭ mă. Hơdôm bôh ƀirô pơ ala kơ dêh čar Việt Nam ƀơi dêh čar Kur hmâo gir run gơgrong hlâo dưm dăp hơdôm bruă mă, pơbưp hăng djă pioh bruă lăi pơthâo nao rai hăng bơnah dêh čar Kur kiăng pơsir tơlơi anai”.

Yă Lê Thị Thu Hằng ăt pơsit mơn, pơ̆ anăp anai, Ding jum pơtom hiăp hăng hơdôm bôh ƀirô pơ ala kơ Việt Nam ƀơi Kur amra gum hrom hăng hơdôm ƀirô pơsir tơlơi anai, hơdôm bôh plơi pla amăng dêh čar hăng bơnah gah dêh čar Kur kiăng pok  pơhai hơdôm bruă mă ăt kah hăng kơtưn bruă git gai, pơgang ba mơnuih ƀơi Kur, ba glăi pơ̆ dêh čar pô hơdôm mơnuih hmâo arăng plư nao mă bruă, ƀing lăi pơthâo mơnuih mă bruă ƀu djơ̆ phiăn, pơhlôm tơlơi dưi djơ̆ phiăn, lăp djơ̆ mơng mơnuih dêh čar Việt Nam. Hơdôm anih anom ăt kơtưn lăng tui mơn, lăi pơtă mơnuih ƀôn sang plơi pla lom nao mă bruă pơ̆ dêh čar arăng.

Amăng mông jơnum hăng mơnuih mă tơlơi pơhing phrâo, lăi nao kơ kơđi tơlơi hơdôm pluh čô mơnuih Việt Nam găn ia krông, đuăi dop mơng casino ƀơi guai dêh čar Kur hmâo mă bruă hăng hơdôm ƀirô gơgrong pơsir tơlơi anai pơ̆ dêh čar arăng, rơkâo tañ pel ĕp, ngă rơđah bôh than ba truh hăng bruă gơgrong mơng hơdôm bơnah amăng kơđi tơlơi truh. Ră anai tơlơi suaih pral mơng hơdôm mơnuih anai hơđong hăng hmâo bôh tơhnal pơčrang lăng brơi ƀuh lĕ leng kơ ƀu ƀuh hŏt jrao ôh./.

            VOV1: Čih – Siu H’ Prăk: Pơblang