VOV4.Jarai-Rơwang hrơi tơjuh rơgao, pơphun jơnum lok 7 mơ̆ng Jơnum min apăn bruă phun pơ ala mơnuih ƀôn sang dêh čar, pơgôp hiăp amăng lu bruă mă yôm pioh pơdah đĭ khua mua pơ ala mơnuih ƀôn sang jơnum lok 3, amăng blan 5 pơ anăp. Amăng anun, bruă pơhrua nao dơ̆ng “Miđai Hlăk ai kơsung nao pơ anăp hing ang” amăng tơlơi phiăn Pơplông, apah bơni (čih pơkra glăi) sa boh yôm phun dưi hơmâo ƀing khua mua pơ ala nao jơnum hăng ƀing plĕ hră ruah đing nao.

Jơnum min apăn bruă phun pơ ala mơnuih ƀôn sang dêh čar pơtum brơi pơgôp hiăp hơdôm mơta tơlơi pơprong dŏ hơmâo lu tơlơi kiăng phara đơi pioh pơdah đĭ hăng ƀing pơ ala mơnuih ƀôn sang sem glăi hăng pơsit amăng mông jơnum lok 3 pơ anăp hơmâo hơdôm bruă kiăng ngă: Sem glăi pơhrua dơ̆ng anăn pioh pơpŭ kơ să, phường, tơring kual ba gru hlâo; pơhrua dơ̆ng Miđai Hlăk ai kơsung nao pơ anăp hing ang; gru miđai pơ anăn hơdor pioh bruă mă gưl tơring čar amăng anun hơmâo Khul khua mua pơ ala mơnuih ƀôn sang tơring čar, pơƀut bruă mă apah bơni kơ ƀing hơmâo ngă bruă tŭ yua rơnuk blah ayăt; pơsir kơđi soh glăi apah bơni pơplông mă bruă.

Tŭ ư hăng bruă čih pơhrua dơ̆ng anăn “Miđai Hlăk ai kơsung nao pơ anăp hing ang” amăng Tơlơi phiăn čih pơkra glăi tal anai, Khua grup ĕp lăng bruă kơ ƀing pơ ala mơnuih ƀôn sang dêh čar, yă Nguyễn Thị Thanh lăi, ƀing hlăk ai kơsung nao pơ anăp hơmâo lu bruă mă tuh rơyuh pran jua, pơsăn drơi jăn pô, pơgôp pran jua prong prin kơ bruă mă hrom mơ̆ng djuai ania:

“Amăng hră lăi pơthâo mrô 120 hơmâo lăi rơđah kiăng pơhrŏ ƀiă hơdră apah bơni gưl kơnuk kơna. Kâo pơmin anun lĕ jơlan hơdră djơ̆ biă, samơ̆ kơnong ngă tui kơ bruă pơplông hăng apah bơni amăng bruă mă ră anai hăng tơdơi adih. Bơ hlăk ai kơsung nao pơ anăp lĕ tơlơi phara pơdjơ̆ nao rơnuk blah ngă, bruă mă pioh glăi, dŏ glăi hăng dŏ kơƀah amăng thun blan rơgao ƀing ta aka pơhrua nao hmao kru ôh. Ƀing anai, hnơr, ƀing ơi yă tha rơma laih ră anai đơ đa ƀu dŏ dơ̆ng tah. Kâo pơmin anŏ hơgĕt tŭ yua hloh, klă hloh pơkă khom ngă tong ten pioh pơkă”.

Ơi Vương Đình Huệ Khua git gai pơ ala mơnuih ƀôn sang dêh čar

đĭ pơhiăp ƀơi mông jơnum

Ăt tơlơi kiăng tui anun mơ̆n, Khua anom bruă Jơnum min gru grua hiam, Pơtô pơjuăt mơ̆ng sang bruă pơ ala mơnuih ƀôn sang dêh čar ơi Nguyễn Đăcs Vinh lăi lĕ:

“Anai lĕ tơhan hơmâo lu tơlơi pơyơr pran jua amăng rơnuk blah ngă. Ƀuh lăp yơh pơpŭ. Gah tơlơi phiăn mơ̆ ƀing ta hơmâo laih Miđai prong pioh apah bơni ƀing tơhan rơnuk blah ngă kâo pơmin ăt lăp mơ̆n. Kơnong ƀing tơhan plơi hăng ƀing tơhan djru hrom ƀiă pơkŏn rơnuk blah ngă hơduah ĕp hơdră pơkŏn pioh pơsir apah bơni hăng bơkơnar anai”.

Ƀing khua mua nao jơnum rơkâo kơnuk kơna ăt sem glăi jŭ yap anăn ƀing hlăk ai kơsung nao pơ anăp rơnuk blah ngă đưm aka ƀu tŭ mă hơdră apah bơni lăp tui tơlơi phiăn pơtrun. Tui anun, kiăng huăi lui raih bruă apah bơni ƀing hơmâo djru kơ bruă čar, hơmâo tuh rơyuh pran jua blah ngă rơnuk blah ayăt laih anun git gai djop gưl gong gai kơnuk kơna tơring čar, ngă tui djop jơlan hơdră djru kơ ƀing hlăk ai kơsung nao pơ anăp rơnuk blah ngă, ngă tui klă tơlơi phiăn juăt lăi “Ƀong boh hơdor kơ pô pla”, “Mơñum ia hơdor kơ pô klơi: hơdor tơngia tla pran. Khua Jơnum min Tơlơi phiăn mơ̆ng sang bruă pơ ala mơnuih ƀôn sang dêh čar, ơi Hoàng Thanh Tùng lăi:

“Hơdră apan bơni ƀing ta hơmâo ming pơkra glăi mrô mơnuih aset tui, hnong pơkă prong hloh pioh pơgăn anŏ pleh ploh ƀơk miđai hơdor bruă mă. Hơdor bruă mă kơ tơdăm dra hlăk ai rơnuk Hồ Chí Minh pơpŭ lu hơdră tui hăng anom bruă khul grup kơđi čar-mơnuih mơnam yau anom bruă hlăk apah bơni kơ hlăk ai kơsung nao pơ anăp, ƀu djơ̆ lăi hơdră apah bơni Mi đai gưl kơnuk kơna yua kơ Khua mir sir dêh čar pơsit ôh, prong hloh kơ anai. Dua mơta tơlơi anai ñu phara. Yua kơ anun ƀu lăi ôh hơmâo miđai hơdor pioh laih ƀu hơmâo dơ̆ng tah miđai mơ̆ng kơnuk kơna lŏn ia”.

Ƀơi mông jơnum, Khua git gai pơ ala mơnuih ƀôn sang dêh čar ơi Vương Đình Huệ pơtrun hiăp ngă rơđah hloh hnong pơkă kơ bruă sem lăng pioh apah bơni, laih dơ̆ng dong yua mơ̆n brơi ngă aset ƀiă mrô apah bơni kơnong apah bơni kơ ƀing ngă bruă hur har biă mă, hơmâo boh tŭ yua rơnuk blah ngă:

“Pơtong glăi anŏ ñu bơbeč dơ̆ng. Tơdah ƀing ta pơhret glăi mrô, ƀu djơ̆ lăi abih bang. Abih bang lĕ djơ̆ pơrơkua nao rai miđai hơdor pioh. Kơnong pioh kơ mrô mơnuih ngă hrom rơnuk blah ngă đôč. Anŏ anun djơ̆ hăng bruă ngă tui tơlơi klah čun mơ̆ng Khul khua mua git gai ping gah dêh čar pơsit. Bơ Ding jum kơđi čar lăi hrom kiăng pơhrŏ mrô apah bơni, ƀu djơ̆ lăi ƀu dưi čih pơhrua tui ôh. Dua lĕ, pơtrun dưi mơ̆n ƀu djơ̆ lăi ruah abih bang mơnuih pioh apah bơni sa wơ̆t. Hlơi dưi ruah hlâo ƀu djơ̆ lăi phara hăng sa wơ̆t ôh, aka lăi nao tơdơi anai tơdah hơmâo dơ̆ng mơnuih tui anun hiư̆m ƀing ta ruah dơ̆ng".

Ăt amăng mông jơnum lok 7 mơ̆ng Jơnum apăn bruă phun pơ ala mơnuih ƀôn sang dêh čar, ƀing khua mua rơkâo pơhrua nao dơ̆ng anăn gru “să ba gru hlâo”, “phường, tơring kual ba gru hlâo”, djơ̆ mơ̆n hăng jơlan hơdră pơtrut bruă mă pơkơtưn ngă bruă anăp nao pơ kual plơi pla, să hăng mơnuih mă bruă amăng kual anun. Kơ hơdră pơsir tơlơi soh amăng bruă pơkơtưn pơplông mă bruă, apah bơni ăt lu khua mua lăi nao mơ̆n, rơkâo ngă rơđah hnong ƀing či apah bơni lơ̆m pơkơtưn mă bruă, ƀing hlơi dưi apah bơni hăng anăn apah bơni yôm, ră anai arăng pơtong glăi ngă soh hĭ.

Nay Jek: Pơblang