Pơđut mông jơnum lăi pơthâo tơlơi phiăn, tơlơi pơsit mơ̆ng Khua mua pơ ala mơnuih ƀôn sang dêh čar tal 15, Khua git gai pơ ala mơnuih ƀôn sang ơi Vương Đình Huệ kiăng Kơnuk kơna pơtrut hloh dong tơlơi gơgrong bruă mă yua Phiah phiăn, tơlơi phiăn, tơlơi pơsit mơ̆ng Khua mua pơ ala mơnuih ƀôn sang; tañ pơtô brơi, hơmâo hơdră ngă bruă tŭ yua hơdôm bruă dŏ gun, pơhlôm djơ̆ hăng tơlơi hơmâo sit nik hăng djơ̆ tơlơi pơkă, tơlơi pơtrun. Pơtrut tui, pơplih phrâo bruă pơtô pơblang tơlơi phiăn lăp djơ̆ hăng rim čô mơnuih, rim kual plơi pla, biă ñu hăng mơnuih ƀôn sang djuai ƀiă laih anun kual čư̆ siăng.

Khua git gai pơ ala mơnuih ƀôn sang kiăng pơƀut pơkra giong hră pơ-ar, pơhlôm klă 83 pok hră pơkôl rơđah rơđông bruă mă yua tơlơi phiăn, tơlơi pơsit mơ̆ng Khua mua pơ ala mơnuih ƀôn sang dêh čar tal 15. Hăng 8 tơlơi phiăn dưi mă yua amăng thun 2024, mrô hră pơ-ar pơkôl pơkă rơđah rơđông hơmâo lu biă mă, 68 hơdrôm hră tơlơi phiăn. Yua hnun, Khua git gai pơ ala mơnuih ƀôn sang dêh čar kiăng:

“Kiăng Kơnuk kơna hơmâo akŏ bruă rơđah rơđông, dưm dăo djơ̆ akŏ tlôn, tuh pơ alin či čih pơkra, pơtrun djŏp, klă djŏp hră pơ-ar, pơhlôm mă yua ha hrơi tŭ yua mơ̆ng tơlơi phiăn, tơlơi pơsit, biă ñu lĕ hăng tơlơi phiăn dưi mă yua mơ̆ng lơ 1/1/2024. Hmao tlôn ƀuh hơdôm tơlơi phiăn aka ƀu gêh gal, pơgăn bruă mă, bơrơkua nao rai či pơkra ming, pơhrua glăi tui hăng tơlơi dưi pơkra ƀudah rơkâo pơplih pokwra, pơhrua tui, pơtrun tơlơi phiăn phrâo, lăi pơthâo hăng khua pơ ala lăng glăi ƀơi mông Jơnum lok 6 (blan 10/2023). Ngă giong tơlơi pơkă, phun akha tơlơi phiăn kơ tơlơi gơgrong bruă hăng bơtơhmal khut khăt, hmao tlôn hơdôm anom bruă, mơnuih pioh hơmâo tơlơi soh amăng bruă čih pơkra, pơtrun tơlơi phiăn”.

Hăng hơdôm anom bruă pơ ala mơnuih ƀôn sang, Khua git gai pơ ala mơnuih ƀôn sang dêh čar pơtă kiăng hơmâo tơlơi glăm ba prong hloh mơ̆ng Jơnum min apăn bruă pơ ala mơnuih ƀôn sang, hơdôm anom bruă pơ ala mơnuih ƀôn sang dêh čar amăng bruă krăp lăng, pơtrut pơsur, hăng wai lăng Kơnuk kơna, hơdôm anom bruă, anom pơtruh brơi pơphun pok pơhai tơlơi phiăn, tơlơi pơsit mơ̆ng Khua mua pơ ala mơnuih ƀôn sang dêh čar. Ngă hrŏm kơjăp hăng hơdôm anom bruă bơdjơ̆ nao amăng bruă čih pơkra, lăng glăi, pơplih tơlơi phiăn, tơlơi pơsit; wai lăng bruă ngă tui djơ̆ “hră pơ-ar pơkă rơđah rơđông khŏm hơmâo prăp lui hlâo hăng pơdah thâo hrŏm hăng tơlơi phiăn, tơlơi pơkă”.

Hơdôm grup pơ ala mơnuih ƀôn sang dêh čar hăng khua mua pơ ala mơnuih ƀôn sang pơtrut wai lăng kơjăp hloh bruă mă yua tơlơi phiăn, pok pơhai djŏp tơlơi phiăn, tơlơi pơsit mơ̆ng Ƀirô khua pơ ala mơnuih ƀôn sang dêh čar ƀơi plơi pla; Jơnum min pơ ala mơnuih ƀôn sang hăng Jơnum min mơnuih ƀôn sang djŏp gưl, biă ñu ƀơi hơdôm boh plơi pla pơphun ngă lăng hlâo hơdôm tơlơi pơsit mơ̆ng khua pơ ala pơtrut tui tơlơi gơgrong bruă, pơčeh phrâo, mă bruă hơdeč biă lơ̆m ngă tui tơlơi phiăn ƀơi tơring.

Khua git gai pơ ala mơnuih ƀôn sang dêh čar ơi Vương Đình Huệ lăi, bruă pơphun Jơnum pok pơhai hơdôm tơlơi phiăn, tơlơi pơsit mơ̆ng Khua mua pơ ala mơnuih ƀôn sang jing tơlơi pơplih phrâo amăng bruă mă mơ̆ng Khua mua pơ ala mơnuih ƀôn sang dêh čar tal 15. Kiăo tui tơlơi hơmâo ngă mơ̆ng mông Jơnum, Kơnuk kơna, hơdôm anom apăn bruă, gong gai plơi pla, kơsem min, pơphun hơdôm tal jơnum ƀudah bruă mă lăp djơ̆ đah mơ̆ng lăi pơthâo rơđah rơđông, tong ten hơdôm tơlơi phiăn, tơlơi pơtrun yua Khua mua pơ ala mơnuih ƀôn sang pơtrun gah tơlơi gơgrong bruă pok pơhai ƀudah bơdjơ̆ nao tơphă hăng hơdôm anom bruă, gong gai amăng plơi pla gơñu wai lăng.

“Lăi pơthâo rơđah tơlơi pơkă ƀơi Tơlơi pơsit mrô 27 “tơlơi dưi kơnuk kơna jing ha amăng plĕ, hơmâo jao bruă rơđah rơđông, ngă hrŏm kơjăp, wai lăng tŭ yua”, kâo kơnang, tơlơi gum hrŏm gơgrong bruă, thâo pơmin mă pô, tŭ yua hăng krăp lăng kơjăp mơ̆ng Khua mua pơ ala mơnuih ƀôn sang, hrŏm hăng tơlơi rơgơi, tơlơi gir mơ̆ng anom bruă mă yua tơlơi phiăn mă bruă klă, pơčeh phrâo mơ̆ng Kơnuk kơna, tơlơi gum ngă kơjăp mơ̆ng hơdôm anom bruă kơnuk kơna, kah hăng hơmâo pơƀuh rơđah mơ̆ng bruă truh kih mơ̆ng mông Jơnum tal anai, amra jing phun tơhnal yôm biă mă či ngă bruă “wai lăng dêh čar pơplih phrâo, tŭ yua”, djru bruă mă yua tơlơi phiăn, tơlơi pơsit amra hơmâo tơlơi pơplih rơđah, hơmâo lu boh than klă hloh amăng hrơi blan pơ anăp, djơ̆ hăng tơlơi kiăng đĭ kyar mơ̆ng lŏn ia, tơlơi čang rơmang hăng đăo kơnang mơ̆ng khua mua pơ ala mơnuih ƀôn sang, mơnuih ruah khua hăng Mơnuih ƀôn sang”.