Jơnum anai, yua kơ Trần Lưu Quang, Kơ-iăng Khua dêh čar git gai, hơmâo khua mua pơ ala djop ding jum, anom bruă gơnong dlông hăng khua mua pơ ala djop tơring čar, pơčrong sai ĕp hơdră pơsir hăng pơtrut tañ kual Dap Kơdư pơđĭ kyar. Quang Sáng pô čih tơlơi pơhing Gong phun jua pơhiăp dŏ ƀơi kual Dap Kơdư ră ruai.

Khul pơpha hăng git gai bruă amăng kual Dap Kơdư lĕ khul ngă bruă lir hơbit lu anom bruă yua kơ Khua dêh čar pơtrun brơi akŏ pơjing, ngă tui hơdôm bruă kơsem min, git gai, pơpha bruă, pơsir hơdôm tơlơi hơmâo amăng kual, lir hơbit djop anom bruă amăng kual, pơtrut brơi pơđĭ kyar hơđong kjăp ƀơi kual Dap Kơdư.

Jơnum anai hơmâo pioh lu mông pơčrong sai, pơtong glăi, pơsit hơdôm tơlơi phiăn, jơlan hơdră mơ̆ng kơnuk kơna pơtrut pơđĭ kyar bơwih ƀong huă mơnuih mơnam kual Dap Kơdư laih anun rơkâo ngă tui hơdôm mơta bruă, jơlan hơdră tơlơi phiăn pơkă phara hơjăn kơ kual.

Hră lăi pơthâo mơ̆ng Ding jum amn pơphô hăng tuh pơ alin, lăi pơtong: Kual Dap Kơdư lĕ sa boh anih yôm phara kơ bruă kơđi čar, bơwih ƀong huă, mơnuih mơnam, pơgang rơnuk rơnua, hơđong kơ dêh čar, anih hơmâo 6 klăk čô mơnuih ƀôn sang amăng abih bang 54 djuai ania adơi ayong lơ̆m dêh čar dŏ hrŏm. Kual Dap Kơdư hơmâo tŭ mă lu boh tơhnal yôm kah hăng GRDP pơkă bơkơnar rơnoh pơhrui glăi mơ̆ng rim čô mơnuih lĕ thun 2022 đĭ truh 11 wơ̆t pơkă hăng thun 2002, hnong pơđĭ kyar pơkă rơnoh gơnam tam pơhrui glăi mơ̆ng thun 2002-2020 giăm 8% rim thun laih anun lu hloh amăng kual, samơ̆ bruă bơwih ƀong huă amăng kual Dap Kơdư dŏ lu tơlơi kơƀah, tơdu, pơđĭ kyar aka ƀu lăp hăng anŏ gêh găl kông ngăn hơmâo, kah hăng: GRDP dŏ ƀiă pơkă hăng 6 tơring prong bơwih ƀong huă mơnuih mơnam, aka ƀu hơmâo tơring čar pơpă ôh amăng kual pơhrui glăi djơ̆ rơnoh pơkă, ba yua mă pô kơ tơring čar, pơhưč tuh pơ alin mơ̆ng dêh čar tač rơngiao dŏ ƀiă đơi, pơhrŏ ƀun rin aka hơđong kjăp, mrô sang anŏ ƀun rin, giăm ƀun rin dŏ lu, tơlơi či hơmâo ngă ƀun glăi ăt dŏ đôč; anŏ pleh ploh pơdrong hăng ƀun dŏ prong, tơlơi hơdip mơda, anŏ pleh ploh plah wah djuai ania ƀiă hăng lu ăt dŏ hơmâo đôč; tơlơi mơnuih ƀôn sang mơ̆ng anih pơkŏn rŭi nao dŏ pơ kual Dap Kơdư jai hrơi tơnap tap, lŏn ngă hmua pla pơjing, lŏn pơdong sang dŏ plơi brơi kơ mơnuih djuai ƀiă pơsir kaih biă mă. Rơnoh pơgang tơ-ui mơ̆ng kyâo pơtâo glai klô hrŏ kơtang laih anun ngă aka ƀu lăp tơhnal pơkă; glai klô hnong hnăi hrŏ lu, wơ̆t lŏn glai hăng anŏ hiam klă. Ia yua amra či hrŏ, tơlơi truh adai pơ-iă thu krô ăt dŏ hơmâo na nao. Lu mơta gơnam gru grua hiam đưm hlăk rơngiă hĭ, tơlơi phiăn juăt tơpă hiam, gru grua kông ngăn djuai ania đut djuai, aka pơsir klă hiam ôh tơlơi jĕ giăm thâo hluh tơdruă kiăng djă pioh gru ama grua amĭ hiam đưm pioh glăi. Bruă lir hơbit amăng kual aka ƀu tong ten, dŏ ngă tŭ kơ hơmâo, aka djơ̆ hăng anŏ kiăng pơđĭ kyar ôh....

Sa tơlơi dơ̆ng ngă kơ tơring čar Lâm Đồng lăi pha, kual Dap Kơdư hnun mơ̆n ruă akŏ hlao, anun lĕ bruă wai lăng, yua lŏn mơnai mơ̆ng glai klô yua plah anom bruă pơgang glai klô kơnuk kơna ngă pô ăt bưp lu tơlơi tơnap tap hăng aka ƀu găl đơi ôh, ngă rơngiă huač soh sel dram gơnam lŏn glai. Tơlơi anai yơh, kiăng hơmâo tơlơi pơtrun hrŏm djơ̆ găl pioh ngă tui, tŭ ư sa hnong pơsir hĭ. Ơi Trần Văn Hiệp, Khua Jơnum min mơnuih ƀôn sang tơring čar Lâm Đồng lăi:

“Lŏn mơ̆ng plah anom bruă wai pơgang glai klô lăi pơthâo sư̆ rơbư̆ lơ̆m pơsir tơlơi soh. ră anai, mơnuih ƀôn sang jah drôm, kơsing mă lŏn glai, pơdong sang, brơi apah yua lŏn glai tă tăn laih anun jah drôm giong lui ruh jing ksor huač soh sel đôč. Bruă anai, kiăng hơmâo hơdră pơsir khut khăt hloh, pơsir hiư̆m pă djơ̆ găl laih anun abih bang ngă tui sa hnong plah wah mơ̆ng djop tơring čar, anun yơh kiăng hơmâo gơnong dlông hơmâo hră pơtrun, pơtô brơi mơ̆ng Ding jum kông ngăn lŏn glai hăng ayuh hyiăng lăi pơthâo hăng kơnuk kơna, laih anun Ding jum Bruă hmua hăng pơđĭ kyar plơi pla kơsem min thim kiăng gơmơi pơsir khut khăt tơlơi anai, biă mă hăng hơdôm sang anŏ tŭ mă laih bruă jao lŏn glai mơ̆ng hlâo truh ră anai”.

Khul git gai bruă mă amăng kual Dap Kơdư dưi akŏ pơjing lĕ kiăng pơblih phrâo tơlơi phiăn ngă hrŏm amăng kual, pơtrut tơlơi bơwih ƀong huă mơnuih mơnam amăng kual pơđĭ kyar tañ hloh, pơgang ayuh hyiăng anih dŏ jum dar hăng pơhlôm rơnuk rơnua hơđong; sa khul ngă bruă lir hơbit djop anom bruă djru kơ Khua dêh čar kơsem min, git gai, pơpha bruă, pwosir hơdôm bruă yôm pơdjơ̆ nao, kiăng pơtrut pơđĭ kyar kual Dap Kơdư. Hră pơtrun mrô 23/NQ-TW lơ 6/10/2022 mơ̆ng Ding jum kơđi čar hơmâo pơtong pơđĭ kyar kual Dap Kơdư khom ngă tui anăp pơlir hơbit amăng kual, yua kơ anun rơngiao kơ čih pơkra jơlan hơdră tơlơi phiăn sa hnong ngă tui khom lăng nao bruă čuk pơkra jơlan glông, pơpha anih ngă hmua pla pơjing, tuai hyu ngui, gru grua hiam-mơnuih mơnam mơak....djop tơring čar amăng kual kiăng pơtum nao kơ bruă pơđĭ tui boh tŭ yua hiam, pơkă hnong kual, kiăng mă yua ba glăi boh tŭ yua hơdôm kông ngăn, pran jua anŏ gêh găl mơ̆ng tơring čar pô.

Pơhiăp ƀơi mông jơnum, Kơ-iăng Khua dêh čar, ơi Trần Lưu Quang, Khua khul git gai kual Dap Kơdư lăi lĕ, jơnum anai dưi lăng sa bruă pơphun hnang blung, kiăng pơčrong sai bruă ĕp lăng phrâo, čih pơkra, dăp hơdră, bruă ngă tŭ yua hloh, ngă bruă rơnang samơ̆ kjăp. Amăng anun, biă mă ñu kiăng tañ akŏ pơjing bruă mă, tơlơi phiăn pơkă kơ bruă mă đơ đam amăng kual, mơ̆ng anun pơsir abih tơlơi gun, tơnap tap, pơjing pran kơtang pơtrut kual Dap Kơdư pơđĭ kyar.

“Hrŏm hăng abih bang ƀing ta čih pơkra tơlơi phiăn mă bruă phara, hơjăn amăng kual pioh pơsir tơlơi hơđong hăng pơđĭ kyar. Pơtum nao bruă mă ƀơi anăp mơta hơmâo 3 bruă yôm, anun lĕ pơtruh nao rai jơlan glông amăng 5 boh tơring čar hăng kual ieo gah. Dua lĕ ngă hrŏm pơhưč tuh pơ alin kiăng pơgang ba boh tŭ yua amăng kual yơh prong hloh. Bruă tal klâo lĕ đing nao hơdră tơhnal pơkă mơ̆ng dêh čar, amra pơtrut kơtang, đuăi hmar amăng 2 thun dŏ glăi brơi hmao akŏ bruă pơtrun mơ̆ng hlâo”.

Kơ-iăng khua dêh čar ơi Trần Lưu Quang ăt pơtă pơtăn djop tơring čar kiăng ngă tui tañ hnong pơkă ƀơi tơring čar hăng kual, đing nao anŏ pơgang hŭi bơbeč kơ ayuh hyiăng anih dŏ jum dar hăng anŏ pơblih ayuh hyiăng lŏn tơnah. Laih dơ̆ng, pơtrut kơtang bruă mă wai lăng pơgang glai rưng, pơđĭ tui rơnoh jao pơgang glai brơi mơnuih ƀôn sang kiăng hơmâo prăk pơhrui glăi. Đing nao kơtưn pơblih yua mrô, pơtrut sĭ mơdrô, pơkra gơnam sĭ mơdrô mơ̆ng boh troh đang hmua kơnang kơ tơlơi pơhing amăng plang internet.