Mơguah kơnôl 25/6, ding kơna khul git gai ping gah dêh čar, Kơ-iăng khua dêh čar, yă Phạm Thị Thanh Trà, git gai jơnum pơƀut bruă mă 6 blan akŏ thun pok pơhai hyu ĕp, rŭ ba tơlang tơleh tơhan djai pơsăn drơi jăn yua kơ lŏn ia, kiăng pơčrang pơsit anăn pô tơhan pơsăn drơi laih anun pok pơhai bruă mă 6 blan rơnuč thun 2026, ăt hyu sem, hơduah rŭ mă tơlang ƀing tơhan pơsăn drơi yua kơ lŏn ia.

Tui hăng tơlơi lăi pơthâo, mơ̆ng akŏ thun truh ră anai, đơ đam dêh čar hơmâo ĕp laih, pơtum mă abih bang 1.255 per tơlang tơleh tơhan pơsăn drơi hăng  ĕp ƀuh 3 boh pơsat dor lu mơnuih sa bit ƀơi Tuyên Quang; mă meh ba pơčrang rơbêh 93.000 tơlang mơ̆ng tơhan pơsăn drơi, pơmut hrŏm thâo krăn rơbêh 53.000 rơbâo meh tơlang kiăng pơthâo pô. Đĭ pơhiăp ƀơi mông jơnum, Kơ-iăng khua dêh čar yă Phạm Thị Thanh Trà brơi thâo, mơ̆ng ră anai truh abih thun, đơ đam dêh čar gir run hyu ĕp dơ̆ng 3000 per tơlang, tơhan pơsăn drơi, mă meh tơlang pơčrang hăng jao brơi năng ai 110.000 per tơlang, mă ba pơčrang dơ̆ng 100.000 meh tơlang kiăng thâo pô hăng hơdră pơčrang čơđeh AND kơ 9000 rơbâo čô.

Kơ-iăng khua dêh čar yă Phạm Thị Thanh Trà pơtrun hiăp brơi đing nao hlâo djop mơnuih mă bruă kiăng pok pơhai tŭ yua Bruă ngă amăng 500 hrơi mlam, pơtrut hyu hơduah ĕp, rŭ mă tơlang ƀing tơhan djai pơsăn drơi yua kơ lŏn ia.