VOV4.Jarai - Kơ-iăng Khua git gai pơ ala mơnuih ƀon sang dêh čar Nguyễn Đức Hải phrâo nao čuă, pơpŭ thun phrâo ƀơi Gia Lai. Mă bruă hăng Jơnum min mơnuih ƀon sang tơring čar hăng ƀing khua mua pơ ala mơnuih ƀon sang tơring čar Gia Lai, kơ-iăng Khua git gai pơ ala mơnuih ƀon sang dêh čar ơi Nguyễn Đức Hải hơmâo tŭ yap hăng lăng yôm hơdôm tơlơi dưi ngă amăng djop mơta amăng tơring čar Gia Lai amăng thun laih rơgao. Mah klin Covid-19  ngă tơnap tap, samơ̆ amăng thun 2021, rơnoh phrui ngăn drăp ƀơi tơring čar Gia Lai ăt đĭ lu tui mơn.

Kơ-iăng khua git gai pơ ala mơnuih ƀon sang dêh čar Nguyễn Đức Hải ƀơk gơnam brơi kông nhơn

Tơring čar hơmâo kah mă ngăn drăp rơbêh 28 klai prăk kiăng kơ djru brơi hơdôm sang anŏ kơnuk kơna čem rông ba, sang anŏ ƀun rin hăngbơwih brơi hrơi ngui čơkă thun phrâo mơ-ak mơ-ai. Truh lơ 20/1/2022, tơring čar hơmâo nao čuă, ƀơk giăm 33.000 anung gơnam brơi kơ ƀing mơnuih djru hơkrŭ hăng abih tih prăk mă yua lĕ 8 klai prăk; ƀơk brơi giăm 62.000 anung gơnam ƀong tết brơi ƀing mơnuih pơkŏn hăng abih tih prăk mă yua lĕ 24 klai prăk. Kơ-iăng Khua git gai pơ ala mơnuih ƀon sang dêh čar ơi Nguyễn Đức Hải hok mơ-ak lơ̆m tơring čar Gia Lai hơmâo ngă kiăo tui hơdôm tơlơi pơtrun mơng gơnong glông pơphun bơyan čơkă thun phrâo rơnuk rơnua hăng pơkrem; sit biă ñu djru brơi hơdôm sang anŏ ƀun rin, sang anŏ djru hơkrŭ.

Siu Đoan: Pơblang