VOV4.Jarai-Mơguah lơ 24/5, jơnum lok 3, khua mua pơ ala mơnuih ƀôn sang dêh čar tal XV hmư̆ hră lăi pơthâo pơtong glăi pơƀut, rơđah abih bang tơlơi pơhing ngă tui Hră pơtrun mrô 66 mơ̆ng khua mua pơ ala mơnuih ƀôn sang dêh čar hăng akŏ bruă pok pơhai kơčăo bruă jơlan Hồ Chí Minh črăn tŏ tui. Hră lăi pơthâo mơ̆ng Kơnuk kơna, truh abih thun 2020 dŏ 6 črăn abih bang anŏ glông ataih  279 km aka pok pơhai čuk pơkra, amăng anun ba yua pơkă hnong rơnoh prăk kơ 3 črăn abih bang 108 km, him lăng ngă giong amăng kơplah rơwang thun 2021-2025.

Truh thun 2021, Kơčăo bruă hơmâo pok pơhai abih bang ngă giong 2.362 km, djop 86% hăng 258 km jơlan klah weh hyu; hlăk dŏ čuk pơkra 211 km; aka ƀu hơmâo prăk pok pơhai čuk pơkra 171 km dŏ glăi pơtruh nao rai abih bang djop arăt jơlan Hồ Chí Minh. Hră lăi pơthâo pơtong glăi mơ̆ng Jơnum min Boh thâo, Ia rơgơi hăng Ayuh hyiăng tŭ ư hăng tơlơi rơkâo  laih anun tŭ ư hăng kơčăo bruă rơkâo čuk pơkra jơlan Hồ Chí Minh čih pơmut amăng Hră pơtrun hrom jơnum lok pơ anăp tui hăng hră lăi pơthâo mơ̆ng kơnuk kơna.

Nay Jek: Pơblang