Să Ea Tiêu, tơring glông Čư̆ Kuin, tơring čar Dak Lak ră anai hơmâo giăm 5.400 boh sang anŏ 18 djuai ania dŏ hrŏm amăng 21 boh plơi pla ala ƀôn. Amăng anun mơnuih djuai ƀiă hơmâo giăm 40%. Hơdôm thun rơgao, mơnuih ƀôn sang ƀun rin amăng să hơmâo djru man pơdong brơi 175 boh sang tui Hră pơtrun mrô 167 kơnuk kơna dêh čar brơi hăng rơnoh prăk 6,9 klai; 72 drơi ană rơmô pioh rông; man pơdong 4 boh sang gum pơgôp.

Pơđĭ tui pran jua hiam klă amăng bruă gum pơgôp djuai ania, mơnuih ƀôn sang amăng kual gir run bơwih ƀong huă, pơđĭ kyar ngă hmua, gum pran jua man pơdong plơi pla phrâo. Yua kơ anun, truh ră anai lăng kơ hơbô̆ plơi pla hơmâo lu tơlơi pơblih hiam, rơbêh 98,6% mrô sang naŏ amăng să man pơdong sang kjăp, 98% mrô sang anŏ hơmâo rơdêh thut, rơbêh 90% mrô sang anŏ hơmâo ia yua hơdjă, abih bang sang anŏ hơmâo apui lơtrik yua soh. Amăng să hơmâo 4.000 boh sang anŏ dưi tŭ yap sang anŏ rơguăt, 18 boh plơi, dưi tŭ yap plơi pla rơguăt. Lu mơta gru grua hiam, tơlơi phiăn đưm djuai ania kah hăng čing hơgor, rơwơi mơñam dŏ djă pioh mơ̆n.

Amăng mông jơnum ngui ngor anai, hmư̆ ik jua čing ing jua hơgor hăng adoh suang lu črăn tơlơi adoh suang mơak biă mă mơ̆ng djop djuai ania adơi ayong, ƀing khua mua hơdor glăi gru grua đưm djop djuai Việt Nam, laih anun ngui ngor mơñum tơpai čeh hăng pơplông tăp pơdai, hơdơi braih, ngui ngor gô mơta atông čing, pơplông kơdăt kơplong hrôm tơkai amăng kơsăk hăng pơplông hơdui hrĕ. Ƀuh ƀô̆ mơta mơ̆ng mơguah sing bring mơtam pioh nao jơnum ngui hrŏm, yă H’Ƀel Knul, ƀuôn Kram, să Ea Tiêu lăi: hrơi ngui ngor mơak anai jing mông gêh găl pioh kơ djop plơi pla ala ƀôn bưp nao rai, pơplông lu tơlơi ngui ngor rơjang drơi jăn, kiăng sŭ mơak.

“Mông ngui ngor mơak biă mă djop mơnuih ƀôn sang ngă hrŏm hok kơdok. Lu bruă mă ngui ngor amăng plơi adoh suang, atông čing, hơdui hrĕ, kơplong kơdăt hrôm tơkai amăng kơsăk, tăp pơdai hroh hơdơi braih kâo ngă hrŏm soh”.

Tui hăng ơi Chu Thanh Tấn, Khua Jơnum min djop djuai ania mơnuih mơnam Việt Nam tơring glông Čư̆ Kuin, Hrơi mơak gum pơgôp djop djuai ania jing bruă mă khom ngă na nao re se pơphun amăng blan 11 rĭm thun. Mơ̆ng anun, djru ngă kjăp tui tơlơi jĕ giăm rô nao rai mơak plah wah djop plơi pla. Hrơi jơnum mơak prong anai, djop plơi pla pơphun ngui ngor soh amăng plơi pla gơñu pô laih anun jak iâu pơtum lu mơnuih djru hrŏm kah pơpha hăng djru ba hơdôm sang anŏ tơnap tap:

“Pơkă hăng rim thun lĕ ƀu hơmâo pơphun hrơi jơnum prong ôh, thun anai, lu plơi pla ƀôn ƀut pơphun ngă hrŏm, hơdră pơphun ngui ngor prong hloh. Mơnuih ƀôn sang ƀuh ƀô̆ mơtum jơngum biă mă, hơmâo tơlơi pơtruh brơi djop djuai ania dŏ amăng tơring laih anun mă bruă amăng tơring glông ăt pơtum mơ̆n, mrô mơnuih pơtum jơngum djop plơi pla bơkơnar soh, tơlơi hơdip mơda djru ba hơmâo djop gưl anom bruă đing nao lu hloh”.

Jơnum hrŏm hrơi mơak hơmâo ơi Bùi Văn Cường, Khua čih pioh, Khua anom bruă pơ ala mơnuih ƀôn sang dêh čar bơni biă mă hơdôm boh tơhnal mơ̆ gong gai kơnuk kona hăng mơnuih ƀôn sang să Ea Tiêu dưi ngă laih thun blan rơgao. Pơdah rai pran jua đăo kơnang hăng tơlơi čang rơmang mơ̆ng mơnuih ƀôn sang ăt thâo gum pơgôp nao rai, đăo kơnang kơ ping gah kơnuk kơna git gai, pơđĭ tui tơlơi răng kơđiăng, pơkơdong glăi hăng tơlơi soh sat pơčut pơčao mơ̆ng ƀing ayăt roh, phă pơrai tơlơi gum pơgôp djuai ania. Anai lĕ tơlơi pơtong sit hăng anŏ bang bơngač kơtang amăng hrơi jơnum gum pơgôp djuai ania djop plơi pla.

“Hăng hrơi mông ngui ngor mơak mơ̆ng mơnuih ƀôn sang djop djuai ania ƀiă Việt Nam ƀing ta, sa pran jua gum pơgôp lir hơbit, biă mă ñu lơ̆m hrơi blan tơring glông čư̆ kuin lĕ sa boh tơring glông phrâo găn rơgao tơlơi arăng ngă sat lơ 11/6. Yua kơ anun yơh, tơlơi jơnum, hơdră pơphun laih anun tơlơi hok mơak mơ̆ng mơnuih ƀôn sang jai tŭ yua, mơ̆ng anun, kiăng ngă kjăp glăi tơlơi gum pơgôp plah wah djop djuai ania”.

Ƀrô djơ̆ tal anai, ơi Bùi Văn Cường hăngY Thanh Hà Niê Kdăm hơmâo rơnoh prăk man pơdong sang jơnum plơi kơ 10 boh să Ea Tiêu hăng 2 boh plơi ƀơi să Čư̆ Êwi, sa boh sang jơnum plơi rơnoh 300 klăk prăk, ƀơk gơnam kơ djop plơi pla, sang anŏ hơmâo anăn kơnuk kơna djru, mơnuih arăng đăo kơnang ƀơi tơring glông Čư̆ Kuin, jơnum min mơnuih ƀôn sang djop djuai ania mơnuih mơnam tơring glông Čư̆ Kuin ăt hơmâo jao rơnoh prăk man pơdong 9 boh sang gum pơgôp djuai ania kơ hơdôm sang anŏ ƀun rin ƀơi să.

Hăng bruă pơphun hrơi Gum pơgôp djop djuai ania abih bang mơnuih ƀôn sang amăng kual plơi pla jing hĭ sa gru grua hiam, ba khul bruă gum pơgôp djop djuai ania amăng plơi pla, truh pơ rim sang anŏ djop mơnuih ƀôn sang. Boh tơhnal kiăng dưi ngă amăng hrơi jơnum prong djơh hăng anai lĕ akŏ pơdong, ngă kjăp hăng pơđĭ tui djă pioh na nao tơlơi dưi ngă pô kơ mơnuih ƀôn sang; kơtưn pran jua kơtang amăng khul gum pơgôp djuai ania laih anun pơđĭ tui tơlơi gơgrong mơ̆ng Khul wai lăng djop djuai ania Việt Nam rơnuk phrâo.