Kơčăo bruă pơdong plơi phrâo ƀơi să Đăk Long, tơring glông Đăk Hà, tơring čar Kon Tum hơmâo pơphun mơ̆ng rơnuč thun 2009, amra ngă hơđong tơlơi hơdip kơ năng ai 300 boh sang anŏ hăng 1.500 čô mơnuih. Khă hnun, truh ră anai, tơdơi kơ giăm 14 thun kơnong kơ hơmâo 84 boh sang anŏ đôč nao dŏ pơ plơi pơdong phrâo laih anun 42 boh sang anŏ mah hơmâo mă laih lŏn dŏ, lŏn ngă hmua samơ̆ ƀu nao dŏ pơ anun ôh. Phun ñu lĕ yua bruă dưm dăp prăp rơmet anih dŏ, anih hơdip ƀu lăp djơ̆; kơƀah ia yua, kơƀah lŏn ngă hmua, bruă djru mơnuih ƀôn sang hơđong tơlơi hơdip mơda aka ƀu lăng ba djơ̆ ôh.

Ơi Nguyễn Minh Vương, Kơ-iăng khua Jơnum min mơnuih ƀôn sang tơring glông Đăk Hà brơi thâo, bruă pơsir brơi hơdôm tơlơi aka ƀu djơ̆ ƀơi plơi phrâo pơdong anai bưp lu tơnap tap biă, laih anun hơmâo mơn bruă ƀu thâo anŏ ngă dong tah yua hơdôm tơlơi pơplih mơ̆ng Tơlơi phiăn lŏn tơnah.