Amăng 235 boh sang anŏ ră anai glăk dŏ hơdip ƀơi hơdôm kual glăk glêh tơnap bơdjơ̆ nao dŏ hơdip, anun lĕ mơnuih dŏ hơdip kơplah wah să Đăk Nên, tơring glông Kon Plông, tơring čar Kon Tum hăng să Trà Vinh, tơring glông Nam Trà My, tơring čar Quảng Nam hơmâo rơbêh ha mơkrah lĕ sang anŏ ƀun rin. Yua glêh tơnap kơ kual dŏ hơdip, neh met wa ƀu dưi tŭ mă rơnoh tuh pơ alin dăng nao hrĕ apui lơtrik, man pơkra jơlan glông, sang hră; ƀu dưi ngă hră pơ-ar lŏn mơnai…yua ƀu dưi tŭ mă hơdôm tơlơi dưi pơđĭ kyar tơlơi bơwih ƀong huă, pơplih tơlơi hơdip mơda. Ơi Phan Quốc Vũ, Khua anom bruă wai lăng glai rưng Thạch Nham, tơring čar Kon Tum brơi thâo, anom bruă čang rơmang jao glai rưng brơi mơnuih ƀôn sang, mơnuih mơnam wai lăng glai rưng, samơ̆ yua kual glai rưng ƀơi tơring čar Kon Tum bơ mơnuih ƀôn sang yua tơring čar Quảng Nam wai lăng yua anun ƀu dưi jao glai. Yua anun mơnuih ƀôn sang ƀu dưi jao glai wai lăng kiăng hơmâo dong prăk pơhrui bơ tơhan wai lăng glai rưng tŏ tui bưp tơnap tap amăng bruă wai lăng:

“Bruă wai lăng glai rưng amăng kual anai tơnap tap biă mă. Kơ bruă mă ƀơi anai lĕ kual aka ƀu hơmâo apui lơtrik kah hăng ƀu dưi yua măi telephôn hăng hơdôm anih anom, jơlan glông aka ƀu pơkra yua anun ngă tơnap tap amăng tơlơi hơdip mơda, bruă mă mơng tơhan wai lăng glai. Kual anai kual lŏn mơnai glai rưng gah tơring čar Kon Tum wai lăng samơ̆ mơnuih ƀôn sang gah tơring čar Quảng Nam. Bruă ngă glêh tơnap hloh lĕ bruă pơtô pơblang, pơtrut pơsur mơnuih ƀôn sang wai lăng glai rưng”.

Ră anai, amăng kual lŏn mơnai, plơi pla kơplah wa să Đăk Nên, tơring glông Kon Plông, tơring čar Kon Tum hăng să Trà Vinh, tơring glông Nam Trà My, tơring čar Quảng Nam, aka ƀu man pơkra anih anom, jơlan glông tuh pơ alin mơng ngăn drăp kơnuk kơna. Tơlơi anai ngă tơlơi hơdip kơ mơnuih ƀôn sang bưp tơnap tap. Yă Y Thị, Kơ-iăng Khua git gai Ping gah tơring glông Kon Plông, tơring čar Kon Tum brơi thâo:

“Bruă tuh pơ alin kiăng pơsir hĭ tơnap tap amăng tơlơi hơdip mơda kơ mơnuih ƀôn sang kah hăng tuh pơ alin man pơkra hơdôm ring bruă hăng hơdôm hơdră bruă mơnuih mơnam ƀơi să Trà Vinh, tơring glông Nam Trà My aka ƀu dưi pơsir hĭ yua tui tơlơi phiăn ƀu dưi tuh pơ alin rơngiao kơ kual lŏn mơnai wai lăng. Tơdơi kơ lu wŏt gong gai 2 boh să Đăk Nên-Trà Vinh hăng 2 boh tơring glông Kon Plông-Nam Trà My mă bruă ăt aka ƀu dưi pơsir hĭ bruă anai”.

Ƀơi anăp kơ tơlơi tơnap tap mơng 235 boh sang anŏ, giăm 1.100 čô mơnuih ƀôn sang amăng kual bơdjơ̆ nao kơ kual lŏn mơnai, găn rơgao 3 thun rơgao, lu tal jơnum kơplah wah gơnong bruă bơdjơ̆ nao hăng gon gai ƀon lan djop gưl mơng 2 boh tơring čar Kon Tum hăng Quảng Nam hơmâo pơphun samơ̆ hơdôm tơlơi gun ăt aka ƀu dưi pơsir hĭ yua 2 bơnah aka ƀu hơmâo tơlơi tŭ ư hrŏm. Ơi Đặng Quang Hà, Khua Jơnum min mơnuih ƀôn sang tơring glông Kon Plông, tơring čar Kon Tum rơkâo:

“Čang rơmang anom bruă bơdjơ̆ nao sem lăng pơsir hĭ hơdôm tơlơi glêh tơnap bơdjơ̆ nao kual lŏn dŏ hơdip ngă gun sui laih. Mơng anun hơdôm boh ƀon lan hơmâo tơlơi gal kiăng tuh pơ alin man pơkra anih anom, bơwih brơi tơlơi hơdip kơ mơnuih ƀôn sang, pơhlôm brơi mơnuih ƀôn sang gêh gal amăng bruă yua lŏn mơnai, kơ sang dŏ, ngă đang hmua mơng anun mơnuih ƀôn sang dưi pơhlôm hơđong tơlơi hơdip, bơwih ƀong huă”.

Tơdơi kơ hơdôm tal pơbưp kơplah wah dua bơnah, tơring čar Quảng Nam ăt gơnong tui hlâo anun mơn djă bong glăi mơnuih ƀôn sang hăng jao kual lŏn mơnai gah tơring čar Kon Tum brơi gơñu. Samơ̆ gah tơring čar Kon Tum brơi thâo kiăng pioh kual lŏn mơnai tui hơdăp hăng amra jao glăi giăm 1.100 čô mơnuih ƀôn sang mơng Quảng Nam brơi kơ Kon Tum. Amăng thun 2023, 2 boh tơring čar tŭ ư akŏ pơjing 2 grup hyu mă bruă nao pel ĕp tơl kual anai, laih dong ƀơk hră pơ-ar kiăng mơnuih ƀôn sang čih tơlơi pơgôp hiăp hăng 2 hơdră “Pơplih hĭ kual lŏn mơnai hăng pơplih hră akŏ sang, akŏ mơnuih”.

Tŭ hơduah ĕp amăng 2.240 čô mơnuih hơmâo mă tơlơi pơgôp hiăp hơmâo 882 čô, dưm dưm rơbêh 37% rơkâo pơplih kual lŏn kơplah wah dua boh tơring čar; 1358 čô; dưm dưm rơbêh 60% rơkâo pơplih glăi hră akŏ sang, akŏ mơnuih ƀơi să Trà Vinh, tơring glông Nam Trà My glăk dŏ hơdip amăng kual lŏn dŏ gun, jing mơnuih ƀôn sang tơring čar Kon Tum. Samơ̆ truh ră anai, tui pel ĕp tong ten kơplah 2 boh tơring čar ăt aka ƀu ba glăi tŭ yua sit nik. Tơring čar Kon Tum hăng Quảng Nam ăt aka ƀu tŭ ư hrŏm hăng mơnuih ƀôn sang ăt tŏ tui hơdip kơƀah, tơnap tap. /.