VOV4.Jarai - Mơguah lơ 27/5, ƀơi plơi prong Kon Tum (tơring čar Kon Tum) pơphun Jơnum sang čơ bruă mă kơ mơnuih drơi jăn ƀu hiam, mơnuih rơwen rơwô. Hăng anăn ñu “Ƀing gơmơi kiăng ƀing gơyut”, Jơnum sang čơ hơmâo 10 anom bơwih ƀong pơkra gơnam, sĭ mơdrô hăng anom pơƀuh brơi bruă mă. Ƀơi mông jơnum, giăm 60 čô mơnuih drơi jăn ƀu klă rơkâo ĕp bruă hăng hrăm bruă. Amăng anun, hơmâo ƀing drơi jăn ƀu klă ĕp hơmâo bruă djơ̆ hăng gơñu dưi ngă kah hăng pơkra gơnam hăng tơngan, tơčoh sum ao, măi mok pôr pơhing, tia tơƀañ, bơwih brơi kơ tuai...

Jơnum bơkơtuai ĕp brơi bruă hăng pơtô bruă kơ ƀing drơi jăn ƀu klă.

Tar ƀar tơring Kon Tum ră anai hơmâo rơbêh 7.300 čô mơnuih drơi jăn ƀu klă, rơwen rơwô, amăng anun hơmâo 1.200 čô mơnuih drơi jăn jô găng kơtang biă mă. Lu mơnuih rơwen rơwô jô găng ƀơi Kon Tum lêng gơnang kơ sang anŏ, plơi pla đôč yơh. Jơnum sang čơ ĕp bruă mă “Ƀing gơmơi kiăng gơyut” anăp nao ƀing drơi jăn ƀu klă, djru ba ƀing gơñu hơmâo bruă mă, ăt jing hrơi kiăng ƀing anai pơplih tơlơi pơmin, khin ĕp bruă mă, hrăm bruă, ĕp prăk kơ pô gơñu.

Siu H’Mai: Pơblang