VOV4.Jarai - Tlam lơ 10/1, Kông an tơring čar Gia Lai hơmâo pơpŭ bơni kơ 35 čô mơnuih rơgơi mơbruă amăng bruă pơgang rơnuk rơnua lŏn ia rơwang thun 2020-2021. Hrơi blan rơgao, kông an tơring čar Gia Lai hơmâo tơlơi djru ba mơnuih arăng đăo gơnang amăng plơi pla djuai ƀiă. Rơđah biă ñu, hơmâo laih 3.000 wơ̆t čô mơnuih hyu pơtô pơblang, iâu pơthưr mơnuih ƀon sang, pôr pơthâo brơi rơbêh 350 tơlơi pơhing.

35 čô mơnuih arăng đăo gơnang hơmâo mă hră bơni.

Mơng anun, ƀing rơgơi mơbruă amăng plơi pla djuai ƀiă ƀơi Gia Lai hrŏm hăng tơhan wai lăng rơnuk rơnua, gong gai gum hyu pơtô pơblang, iâu pơthưr mơnuih ƀon sang ngă tui tơlơi git gai črâo bruă mơng Ping gah, tơlơi phiăn mơng Kơnuk kơna; iâu pơthưr mơnuih ƀon sang dŏ ƀơi guai pơgang ba guai lŏn ia, gong guai, ƀu dưi găn nao gah guai dêh čar ča čot ôh; pơtô pơblang brơi mơnuih ƀon sang djă pioh gru grua djuai ania, tơlơi đăo ngă yang rơbang hiam.

Siu H’Mai: Pơblang