VOV4.Jarai - Mơguah lơ 14/3, ƀơi Pơsat ling tơhan pơsăn drơi tơring glông Ngọc Hồi, tơring čar Kontum, Ping gah tơring glông, Khul pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring glông Ngọc Hồi pơphun jôk atâo, ba nao hăng dor tơlang tơleh 5 čô ling tơhan pơsăn drơi amăng rơnuk blah ayăt Mi tlaih rơngai lŏn ia.

Ba nao dor tơlang tơleh tơhan pơsăn drơi

Mông ngă yang jôk atâo, lăi pơthâo hăng ba nao dor tơlang tơleh 5 čô ling tơhan pơsăn drơi dưi pơphun amăng tơlơi tơpă sit, pơpŭ pơdah tơlơi hơdor tơngiă dơlăm mơng hơdôm gưl mơnuih ƀôn sang pioh kơ ling tơhan pơsăn drơi yua kơ tơlơi rơngai djuai ania hăng pơgang Lŏn ia Việt Nam mơnuih mơnam dưm kơnar. Hơdôm tơlang tơleh ling tơhan pơsăn drơi dưi hmâo Khul tum pơƀut tơlang tơleh ling tơhan pơsăn drơi Quân đoàn 3 ĕp ƀuh amăng rơnuč blan 2 phrâo rơgao ƀơi să Ia Xiêr, tơring glông Sa Thầy hăng jao kơ gong gai să. Tui hăng tơlơi pơsit blung a Khul tum pơƀut tơlang tơleh ling tơhan pơsăn drơi, Quân đoàn 3, tơlang tơleh 5 čô ling tơhan pơsăn drơi ĕp ƀuh lu ñu đing nao gah Trung đoàn 209, Trung đoàn 66 hăng sa dua bôh anom kơtưn gum hrom blah ayăt hăng pơsăn drơi ƀơi anih blah đưm pơ̆ Dăp Kơdư amăng blan 3/1968./.

Siu H’ Prăk: Pơblang