Đĭ pơhiăp hruă kjăp tơlơi pơmĭn pơplih phrâo kơ bruă čih pơkra tơlơi phiăn pơlir hăng bruă mă yua tơlơi phiăn, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm hơdôm anom bruă mơng Kơnuk kơna, mơng Ƀirô Khua pơ ala mơnuih ƀôn sang dêh čar hăng hơdôm anom bruă bơdjơ̆ nao hơmâo ječ ameč prap lui, djru brơi Kơnuk kơna gum hrŏm hăng Jơnum min apăn bruă Khua pơ ala mơnuih ƀôn sang dêh čar hmao tlôn pơphun jơnum hruă kjăp, pok pơhai mă yua hơdôm tơlơi phiăn, tơlơi pơtrun hơmâo Khua pơ ala mơnuih ƀôn sang dêh čar tŭ yap amăng jơnum lok 8, Khua pơ ala mơnuih ƀôn sang dêh čar tal XV, kiăng tañ ba hơdôm tơlơi phiăn, tơlơi pơtrun hơmâo Ƀirô Khua pơ ala mơnuih ƀôn sang dêh čar ngă tui amăng tơlơi hơdip mơda. Khua git gai pơ ala mơnuih ƀôn sang dêh čar ơi Trần Thanh Mẫn pơsit tong:

“Jơnum min apăn bruă Khua pơ ala mơnuih ƀôn sang dêh čar lăng yôm bruă Khua dêh čar ječ ameč hơmâo tơlơi pơsit ba tơbiă hơdôm črăn hăng pơpha bruă mă brơi hơdôm anom bruă čih pơkra hră pơ-ar pơkă tong ten hăng hơdôm črăn tơlơi phiăn, tơlơi pơtrun hơmâo Ƀirô Khua pơ ala mơnuih ƀôn sang dêh čar tŭ yap amăng jơnum lok 8. Yua mrô boh tơhnal, hră pơ-ar pơkă tong ten kiăng ba tơbiă dŏ lu, hăng 18 tơlơi phiăn, Kơnuk kơna, djop ding jum kiăng ba tơbiă 127 pok hră pơ-ar, sa, dua tơlơi phiăn, tơlơi pơtrun dưi mă yua dong mơng akŏ thun 2025, rơkâo djop ding jum, anom bruă hơmâo jao git gai čih pơkra kiăng djơ̆ hăng tơlơi rơkâo amăng tơlơi pơsit mơng Khua dêh čar, đing nao git gai kiăng pơjing, ba tơbiă hră pơ-ar djơ̆ hrơi mông, pơhlôm brơi kơ klă hloh”.

Jơnum lok 8, Khua pơ ala mơnuih ƀôn sang dêh čar tal XV hơmâo tŭ yap lu tơlơi phiăn, tơlơi pơtrun hơmâo 18 tơlơi phiăn, 4 tơlơi pơtrun djơ̆ tơlơi phiăn hăng 17 tơlơi pơtrun wai lăng bơwih ƀong huă, mơnuih mơnam hăng hơmâo tơlơi tŭ ư mơng khua mua. Amăng anun. Lu tơlơi phiăn, tơlơi pơtrun bơdjơ̆ nao amăng djop bruă yôm phun amăng tơlơi hơdip mơda anun lĕ: Tuh pơ alin, prăk kak, ngăn drăp, mă jia; djru mơnuih mơnam, pơgang rơnuk rơnua. Tui Khua dêh čar ơi Phạm Minh Chính, boh than anai pơdah tơlơi gir run prong hloh, ngă bruă khut khăt, lăp djơ̆ mơng Ƀirô Khua pơ ala mơnuih ƀôn sang dêh čar, kơnuk kơna, hơdôm anom bruă, khul grup bơdjơ̆ nao amăng bruă pơjing, pơgiong hơdră bruă, tơlơi mut hrŏm mơng mơnuih ƀôn sang, anom bơwih ƀong sĭ mơdrô; tŏ tui pơsit tong tơlơi gum hrŏm jai hrơi tŭ yua, kjăp phik kơplah wah Khua pơ ala mơnuih ƀôn sang dêh čar, kơnuk kơna.

“Tui sit nik brơi ƀuh hrơi blan rơgao hơdôm hơdră bruă anai hơmâo ngă tui amăng tơlơi hơdip mơda hăng tŏ tui boh tŭ yua ăt jing tơlơi lông prong mơn. Tơdơi kơ tal jơnum ƀing gơmơi hơmâo ba tơbiă akŏ bruă hăng phrâo rơgao hơmâo tơlơi git gai kiăng prap lui jơnum pơ anăp. Pơ anăp anai, hơdôm bruă mă kiăng mơ-it Khua pơ ala mơnuih ƀôn sang dêh čar, ƀing gơmơi hơmâo prap lui laih, pơhhmutu lĕ tơlơi phiăn pơphun bruă mă Kơnuk kơna, tơlơi phiăn pơphun bruă gong gai ƀon lan, tơlơi phiăn pơtrun hơdôm hră pơ-ar djơ̆ tơlơi phiăn, anai lĕ hơdôm tơlơi phiăn juăt mă yua kiăng ƀing ta dưi pok pơhai bruă mă pơ anăp anai”.

Khua dêh čar ơi Phạm Minh Chính brơi thâo, bruă kiăng ngă tui pơ anăp lu biă mă, Kơnuk kơna, Khua dêh čar, hơdôm anom bruă gơgrong ba tơbiă 130 hră pơ-ar hăng 569 boh tơhnal jao tơlơi pơkă tong ten. Bruă pok pơhai hơdôm tơlơi phiăn, tơlơi pơtrun hơmâo Ƀirô Khua pơ ala mơnuih ƀôn sang dêh čar tŭ yap amăng jơnum lok 8, tơlơi anai kiăng đing nao, gir run prong hloh mơng djop ding jum, gơnong bruă, gong gai ƀon lan.

Kơ bruă hrưn đĭ boh tŭ yua amăng bruă gum hrŏm mơng pok pơhai mă yua tơlơi phiăn, Khua dêh čar rơkâo: Djop anom bruă mơng Ƀirô Khua pơ ala mơnuih ƀôn sang dêh čar, ƀing khua mua tŏ tui gum hrŏm kjăp hăng Kơnuk kơna, ding jum, gơnong bruă mơng rơwang blung a amăng bruă čih pơkra tơlơi phiăn, pơhlôm brơi lăp djơ̆ hăng hơdôm tơlơi pơkă amăng hơdôm črăn tơlơi phiăn, tơlơi pơtrun, ngă gêh gal brơi kơ bruă ngă tui lơm tŭ yap mă yua. Khua dêh čar ơi Phạm Minh Chính pơsit tong:

“Ping gah hơmâo git gai, kơnuk kơna hơmâo tŭ yap, Ƀirô Khua pơ ala mơnuih ƀôn sang dêh čar tŭ ư, mơnuih ƀôn sang dong yua, lŏn ia ta dŏ tơguăn, ƀing ta kiăng tañ ba hơdôm tơlơi phiăn, tơlơi pơtrun mut amăng tơlơi hơdip mơda, djơ̆ hăng tơlơi čang rơmang mơng mơnuih ƀôn sang, pơgôp pơjing Kơnuk kơna tui phaih phiăn xã hội chủ nghĩa hơđong kjăp, ba lŏn ia ta hơđong kjăp yak nao rơnuk pơplih phrâo-rơnuk hrưn đĭ pơdrong asah, hiam klă mơng djuai ania ta”./.