VOV4.Jarai-Kơthel mrô 4 ngă răm gong apui lơtrik tơring čar Quảng Nam, ngă thăm apui lu anih. Tơdơi kơ hmư̆ tơlơi git gai mơ̆ng Phun kông ty apui lơtrik kual Tong krah, kông ty apui lơtrik Dak Nông hơmâo akŏ pơjing 2 grup kơsung nao djru tơring čar Quảng Nam pioh rŭ glăi pơdong gong apui lơtrik. Tui hăng anun, hơdôm hơpluh čô mơnuih mă bruă ba djop gơnam yua mă bruă, pơhlôm rơnuk rơnua mă bruă nao djru tơring glông Núi Thành, tơring čar Quảng Nam rŭ glăi pơsir tơlơi răm ƀăm yua kơthel ngă.

Ƀơi anih mă bruă, kơthel ngă răm bơrơbuh abih lu gong apui lơtrik, tơ̆i hrĕ, ia ling dăo mlĕp…Lu mơnuih mă bruă nao ĕp, ngă tui lu hơdră, pơpha bruă mă pơgang rơnuk rơnua, pơkra ming glăi hmar hloh. Ƀing mă bruă mơ̆ng PC Dak Nông ƀu kơdun kơ hơjan hlim, tơnap tap ôh mă bruă ƀu pơdơi kiăng rŭ glăi tañ giong, pơkĕ apui lơtrik kơ mơnuih ƀôn sang tơring čar Quảng Nam yua.

PC Dak Nông rŭ glăi hrĕ apui lơtrik ƀơi tơring glông Núi Thành, Quảng Nam

2 grŭp ba jơlan hlâo mơng sang bruă apui lơtrik Daklak hrom hăng djop rơdêh, gơnam tam măi mok nao djru laih tơring čar Quảng Nam rŭ pơsir gong hrĕ apui răm rai tơdơi kơ kơthel tal 4 ngă. Ƀing apăn bruă mơnuih mă bruă hmâo pơphun jing lu grŭp hyu mă bruă rŭ pơkra ƀơi hơdôm tơring glông Tiên Phú, Phú Ninh hăng plơi prong Tam Kỳ, tơring čar Quảng Nam.

Mơnuih mă bruă apui lơtrik Daklak glăk pơdŏng glăi gŏng hrĕ apui lơtrik ƀơi tơring glông Tiên Phước, Quảng Nam

Ƀơi anih hmâo tơlơi truh, ƀing mă bruă hmâo yak rơgao hơdôm tơlơi tơnap gah lŏn drŏn, ayuh hyiăng, pơplih pơdŏng glăi hơdôm gŏng hrĕ apui jôh, dăng hrĕ tơ̆i, rŭ pơkra hơdôm anih anom pơkĕ apui... gir run ngă giong hơdôm bruă dưi jao tañ hloh./.

Nay Jek - Siu H' Prăk: Pơblang