VOV4.Jarai - Ƀrô djơ̆ tal hơdor glăi 75 thun Hrơi ling tơhan rơka ruă, pơsăn drơi, lơ 10/7, Ping gah tơring čar, Khul pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring čar Hà Giang prăp lui pơphun ngă lơphet lăi pơthâo hăng ba nao dor tơlang tơleh 10 čô ling tơhan pơsăn drơi amăng rơnuk blah ngă pơgang lŏn ia ƀơi pơsăt Vị Xuyên. Nao pơhmư̆ hrom hmâo Khua mir sir hơđăp dêh čar ta ơi Trương Tấn Sang, Kơ-iăng Khua dêh čar ơi Vũ Đức Đam. Amăng mông dô̆ tơhmit, pơpŭ, ƀing khua pơ ala tuĭ apui hlin, kup akô̆ hơdor kơ pran jua prong prin mơng ƀing ling tơhan pơsăn drơi amăng rơnuk blah ngă hăng pơgang lŏn ia. Anai lĕ ƀing ling tơhan hmâo gum hrom khul ling tơhan hăng mơnuih ƀôn sang djop djuai ania tơring čar Hà Giang gơgrong kơjăp, khin hơtai kơdŏng blah ayăt hăng pơsăn drơi pô, pơsit pran jua djă pioh rim črăn lŏn dêh čar amăng rơnuk blang ngă pơgang guai dêh čar gah Pơngŏ. Amăng mông ngă lơphet, lu mơnuih ƀôn sang hăng ƀing ling tơhan hơđăp, ƀing gŏp mơng pô dưi tum pơƀut ƀơi pơsat tơhan pơsăn drơi lŏn ia Vị Xuyên./.

Siu H’ Prăk: Pơblang