Ƀơi pơsat dor tơhan djai pơsăn drơi Bảo Lộc, anih dor 570 čô tơhan djai pơsăn drơi, amăng anun 102 pơsat aka ƀu thâo krăn anăn pô, gong gai ƀon lan gum hrŏm kjăp hăng ling tơhan tơring čar Lâm Đồng pơphun bruă pơčrang brơi. Yă Nguyễn Thị Huyền Phương, kơ-iăng Khua Jơnum min mơnuih ƀon sang phương 3-Bảo Lộc brơi thâo: “Kơ bruă pơphun bruă mă tơlang pioh pơčrang ƀơi pơsat dor tơhan djai pơsăn drơi Bảo Lộc, Jơnum min mơnuih ƀon sang phương hơmâo git gai Khul git gai ling tơhan phương 3-Bảo Lộc pơhlôm djop gơnam măi mok gum hrŏm hăng Anom bruă git gai ling tơhan tơring čar pok pơhai bruă mă tơlang tơhan djai pơsăn drơi, pơgôp amăng bruă ĕp anăn krăn pô tơhan djai pơsăn drơi, ba ƀing gơñu glăi pơ sang anŏ, pơdah gru grua, pran hơdip “Mơñum ia hơdor kơ pô klơi” mơng djuai ania ta.”

Bruă mă hơmâo pok pơhai ha amăng plĕ ƀơi 11 boh pơsat tơhan amăng tơring čar Lâm Đồng. Boh than ba glăi, 4.776 akŏ pơsat tơhan aka ƀu thâo anăn hơmâo klơi rŭ, mă tơlang. Amăng anun, 3.625 akŏ pơsat hơmâo tơlang djop tơlơi dưi kiăng pơčrang lăng ADN. Đại tá Phạm Văn Soái, kơ-iăng Khua anom bruă kơđi čar, Anom bruă git gai ling tơhan tơring čar Lâm Đồng brơi thâo: “Lâm Đồng lĕ sa amăng hơdôm boh tơring čar hơmâo pơgiong tañ bruă mă tơlang pioh pơčrang lăng. Boh than ba glăi tui anai yua hơmâo tơlơi đing nao mơng Khul djru bruă Ping gah tơring čar, Jơnum pơ ala mơnuih ƀôn sang, Jơnum min mơnuih ƀon sang tơring čar, Jơnum min djop djuai ania mơnuih mơnam Việt Nam tơring čar; sit biă ñu lĕ tơlơi gir run mơng ƀing apăn bruă, ling tơhan amăng tơring čar. Mah hơjan hlim, bưp lu tơnap tap, ƀing gơmơi ăt gir run pơgiong bruă jao tañ hloh.”

Tơdah ƀơi hơdôm boh pơsat, tơlơi ngă tơnap tap lĕ rơkâo ngă kjăp kơ bruă mă, hrơi mông, hyu ĕp tơlang tơhan ƀơi hơdôm anih gah rơngiao pơsat tơnap tap ƀiă. Tơdơi kơ hơdôm hơpluh thun, lu kual hơmâo tơlơi pơplih, anih dor đưm hlâo adih ră anai jing glai rưng laih, jing anih ngă hmua, kual plơi pla ƀudah sang păng mơnil pla gơnam. Tơlơi lăi pơthâo lu hloh gơnang nao hră pơ-ar sô hơđăp, tơlơi hơdor glăi mơng ling tơhan hăng mơnuih ƀôn sang, lơm anun ƀing mơnuih dŏ hơdor aset tui. Hơjan sui hrơi ngă kơ bruă hyu ĕp, klơi rŭ đĭ hăng kơčong čư̆, kual đang hmua bưp tơnap tap; đa hơmâo anih khŏm sem lăng lu wŏt, pok prong anih hyu ĕp phrâo kah mơng ƀuh.

Hăng ƀing apăn bruă, ling tơhan pơphun ngă bruă, anai ƀu djơ̆ kơnong lĕ bruă jao đôč ôh mơ̆ ăt lĕ tơlơi glăm ba hăng ƀing mơnuih djai pơsăn drơi jăn. Thượng tá Phạm Ngọc Khánh, kơ-iăng Khua anom bruă git gai ling tơhan kual 1 Đức Trọng, tơring čar Lâm Đồng brơi thâo: “Hăng rĭm čô tơhan lơm arăng jao bruă, hlơi hlơi lêng kơ pơ-ư ang amăng pran jua hăng hluh rơđah bruă jao lơm arăng đăo gơnang jao bruă yôm phăn tui anai.”

Găn rơgao hơdôm hrơi hơjan hlim, Lâm Đồng hơmâo pơgiong tañ ƀiă giăm 3 blan bruă mă tơlang ƀơi 11 boh pơsat. 3.625 ƀĕ tơlang tơhan hơmâo jao glăi djru brơi bruă pơčrang ADN, pok rai dong tơlơi čang rơmang kơ bruă ĕp anăn krăn pô brơi hơdôm boh pơsat aka ƀu thâo anăn, laih dong pơtrut pơsur brơi kơ bruă hyu ĕp, klơi pơƀut tơlang tơhan dŏ đih glăi.

Ƀơi anăp ăt dŏ lu bruă mă, samơ̆ hăng pran gir run hăng tơlơi glăm ba, bruă ĕp brơi anăn tơhan djai pơsăn drơi, ba glăi pơ sang anŏ hăng plơi pla ăt glăk tŏ tui ngă rĭm hrơi./.