Hăng tơlơi gum hrŏm kơtang mơ̆ng abih bang glông bruă kơđi čar hăng gum pran hrŏm mơ̆ng mơnuih mơnam, tơring čar Lâm Đồng hmâo sut lui laih rơbêh kơ 1000 bôh sang tơ̆i ƀơi tơring čar, djơ̆ tui ha mơkrah kơčăo bruă pơkă. Hơdôm hrơi akô̆ thun 2025, sang anô̆ amai K’Uyên (djuai ania K’ho), ƀơi thôn 3, să Đinh Trang Thượng, tơring glông Di Linh, tơring čar Lâm Đồng hơk mơ-ak lơm nao dô̆ amăng sang phrâo pơdŏng kơjăp phik, pơ ala kơ sang tơ̆i.

Hơdôm hrơi rơgao, rơbêh kơ 1.000 bôh sang anô̆ ƀun rin, sang anô̆ ƀun rin ƀơƀiă hmâo sang anô̆ ƀu rô̆ yâo mơ̆ng tơring čar Lâm Đồng hmâo djru prăk pơdŏng phrâo hăng pơkra glăi sang tơ̆i, amăng anun hmâo 860 bôh sang pơdŏng phrâo hăng 178 bôh sang pơkra glăi, hăng abih bang prăk pơdŏng rơbêh kơ 47 klai prăk. Prăk anai dưi pơpha mơ̆ng “Keh prăk yua kơ mơnuih ƀun rin” yua kơ Jơnum min djop djuai ania mơnuih mơnam dêh čar Việt Nam tơring čar Lâm Đồng tŭ mă mơ̆ng hơdôm khul grŭp, mơnuih, anom bruă, anom bơwih ƀong amăng tơring čar gum hơgôp.

Khul git gai pok pơhai bruă ruh pơkra glăi sang dŏ jang jai, sang tơ̆i rơ̆i tơring čar Gia Lai ba tơbiă hơnong pơkă amra pơgiong bruă ruh pơkra glăi 8.485 boh sang dŏ jang jai, sang tơ̆i rơ̆i amăng 6 blan akŏ thun 2025. Đơ đam tơring čar Gia Lai hơmâo 8.485 boh sang kiăng djru sang dŏ, amăng anun man pơdong phrâo 6.828 boh sang hăng pơkra ming 1.657 boh sang hăng nua ñu him lăng 460 klai prăk.

Amăng anun, ngăn rơnoh mơng gơnong glông djru brơi 241 klai prăk. Ră anai amăng tơring čar Gia Lai glăk đing nao djru brơi mơnuih djru hơkrŭ hăng sang anŏ tơnap tap, laih dong jak iâu pơgôp mơng mơnuih mơnam hăng khul ling tơhan kiăng pơhlôm brơi prăk djru man pơdong sang dŏ. Ơi Hồ Văn Niên, Khua git gai Ping gah tơring čar Gia Lai rơkâo djop ƀôn lan pơsit tong rĭm bruă, hrơi blan ngă tong ten kiăng pơgiong djơ̆ hrơi mông lơm ruh pơkra glăi sang dŏ jang jai, pơdah pran gir run prong hloh mơng tơring čar amăng bruă djru brơi mơnuih ƀôn sang pơplih tơlơi hơdip mơda.