Ƀơi 11 bit anih ƀut pơsat dor tơhan djai pơsăn drơi jăn yua kơ lŏn ia, ƀing tơhan djop sang bruă gah kơnuk kơna tơring čar Lâm Đồng hơmâo rŭ kuai 4.776 akŏ pơsat aka ƀu thâo anăn krăn pô. Mơ̆ng anun, pơhrui mă 3.625 čơđeh meh tơlang pioh pơčrang.

Hơmâo rơbêh 1100 boh akŏ pơsat aka mă meh čơđeh ƀudah aka ƀu djop anŏ gêh găl pioh pơčrang ADN. Lơ̆m mă bruă hyu kuai, mă čơđeh meh tơlang čih pioh dưm mrô dưi ngă hmar biă mă, tong ten, djơ̆ rơ-ua, mơ̆ng bruă duñ, jŭ yap, dăp glăi, pơtong anih anom, mă čơđeh, drah mơnuih dŏ hơdip hăng tơlang tơhan pơsăn drơi ba pơčrang pơhno djơ̆ thâo krăn kơnung djuai sang anŏ, bơwih brơi pơčrang kiăng thâo anăn krăn pô tơhan pơsăn drơi tui tơlơi phiăn pơkă. Lu tơhan ngă hrŏm, hơmâo ngă bruă tơpă hnơ̆ng djơ̆ tơlơi thâo jao ngă, laih dơ̆ng pơpŭ pơyom hăng djop akŏ pơsat hăng tơhan, mơnuih rơngiă anun.