Bruă anai glăk hơmâo khul apăn bruă ječ ameč ngă bruă ƀơi 11 ƀut pơsat tơhan ƀơi tơring. Truh ră anai, giong laih bruă mă čơđeh tơlang ba pơčrang, pơmut mrô djŏp tơlơi pơhing ƀơi 10 ƀut pơsat: Đức Linh, Čư̆ Jút, Tuy Đức, Dak R’lấp, Krông Nô, Dak Mil, Dak Nông, Bảo Lộc, Di Linh hăng Đà Lạt. Ră anai khul apăn bruă pơƀut ngă bruă ƀơi Pơsat tơhan djai pơsăn drơi Bình Thuận, anih hơmâo lu akŏ pơsat kiăng mă čơđeh ba pơčrang, hơmâo pơmut mrô lu hloh, hăng 3.431 akŏ pơsat.

Thiếu tá Lê Hữu Lập, Khua Grup pơmut boh thâo mrô 3, brơi thâo: Hăng bruă pơmut tơlơi pơhing amăng mrô jing kiăng ngă mơ̆ng ha wơ̆t. Mơnuih amăng grup ngă hrŏm hăng Anom bruă gru grua să, Khul git gai tơhan să, phường nao pơ rim boh pơsat či sem lăng anih dor, ngă tui 8 mơta bruă tui hăng Khul git gai bruă 515 tơring čar pơtô ba. Rơngiao kơ 8 mơta bruă anun, gơmơi ăt pơhmu nao rai ƀơi rim akŏ pơsat. Him lăng abih bang bruă hơmâo ngă giong amăng rơnuč blan 8, tañ hloh kơ 2 blan pơhmu hăng hrơi pơkă năng blung./.