Phrâo anai, ƀơi să Ia Chía (tơring glông Ia Grai), anom bruă git gai ling tơhan tơring čar Gia Lai hơmâo pơphun ƀơk gơnam tam, djru duh prăk hrăm hră, hră čih, gơnam yua pơkŏn amăng akŏ bruă “Ling tơhan čung čơđai nao sang hră”. Ngă tui akŏ bruă anai, anom bruă git gai ling tơhan wai pơgang guai tơring čar Gia Lai hơmâo djru brơi 193 čô čơđai mơng anih 1 truh 12 amăng hơdôm boh să giăm guai ƀơi Gia Lai. Ƀrô tal anai, hơdôm puih kơđông tơhan rôk guai lŏn ia amra jao prăk kak hăng gơnam brơi ƀing čơđai sang hrăm amăng jơlan hơdră anai, hơmâo 2 klăk prăk blơi hră čih, gơnam yua pơkŏn, sum ao hlâo kơ hrơi mut sang hră hăng 6 blan djru brơi prăk ƀong huă. Abih tih prăk ngă tui akŏ bruă anai lĕ rơbêh 1 klai prăk, pơgôp djru brơi ƀing čơđai sang hră ƀơi kual giăm guai hrưn đĭ găn rơgao tơnap tap. Amai Nguyễn Thị Dung, dŏ amăng plơi Beng, să Ia Chía, anai lĕ amĭ ama ƀing čơđai pơbưp hrŏm amăng hrơi ƀơk gơnam, ñu brơi thâo:

“Bơni kơ ƀing ling tơhan hăng djop gưl gong gai hơmâo lu gơnam djru brơi sit nik brơi ană plơi pla rôk tui jơlan guai să Ia Chía, hơdôm gơnam anai yôm phăn biă mă, djru brơi ƀing gơmơi plai ƀiă glêh tơnap amăng bơwih ƀong huă mơng anun dưi djru brơi ƀing čơđai nao sang hră”.

 Akŏ thun phrâo, anom bruă git gai ling tơhan wai pơgang guai tơring čar Kon Tum brơi thâo, abih tih prăk giăm 2 klai djru brơi ƀing čơđai sang anŏ tơnap tap rôk jơlan guai lŏn ia hơmâo hơdôm grup djru bruă mơng anom bruă git gai ling tơhan hăng hơdôm anom bruă ƀơi ƀon lan hơmâo jao tơl tơngan ƀing čơđai. Mrô prăk aka djru brơi 253 čô čơđai gah akŏ bruă “Ling tơhan čung čơđai nao sang hrăm”. Ƀing čơđai lêng sang anŏ tơnap tap ƀơi 13 boh să giăm guai ƀơi 4 boh tơring glông amăng tơring čar Kon Tum, hơmâo Đăk Glei, Ngọc Hồi, Sa Thầy hăng Ia H’Drai. Hrŏm hăng anun lĕ 74 čô čơđai, amăng anun hơmâo 6 čô ƀơi kual giăm guai hăng dêh čar Lao hăng Kur tui jơlan hơdră “Čung čơđai nao sang hră” hơmâo anom bruă git gai ling tơhan tơring čar Kon Tum djru brơi 110 klăk prăk.

Ƀrô hrơi ƀing čơđai yak nao thun hrăm phrâo 2023-2024, hơdôm puih kơđông tơhan rôk tui jơlan guai hăng Lao laih dong Kur ară găn nao tơring čar Kon Tum ăt ƀơk gơnam hrăm hră brơi 15 čô čơđai “Ană rông puih kơđông ling tơhan” kiăng pơ alum pran jua ƀing čơđai hur har pran jua yak nao thun hrăm phrâo 2023-2024.

Hăng tơlơi pơsit “jao boh hră, lar hyu tơlơi hiam klă”, thun hrăm anai, anom bruă git gai ling tơhan pơgang guai tơring čar Dak Nông tŏ ngă tui jơlan hơdră “Čung ba čơđai nao sang hră”. Đại tá Bùi Đức Chính, Kơ-iăng khua anom bruă wai pơgang guai tơring čar Dak Nông brơi thâo, truh ră anai, hơmâo laih 222 čô čơđai sang hră ƀơi 7 boh să giăm guai amăng tơring čar Dak Nông hăng 12 čô čơđai amăng tơring čar Mondulkiri (dêh čar Kur) hơmâo ling tơhan tơring čar Dak Nông djru brơi. Hăng tơlơi gum djru nao sang hră. Abih tih prăk djru brơi ƀing čơđai sang anŏ tơnap tap lĕ giăm 4 klai 5 klăk prăk, mơng prăk pơgôp mơng abih bang ling tơhan pơgang guai tơring čar Dak Nông. Hăng tơlơi gir run mơng abih bang, ƀing čơđai hơmâo gir run ƀu pơdơi kiăng găn rơgao tơnap tap, kơƀah djop mơta amăng tơlơi hơdip mơda kiăng jing čơđai săng, hrăm hră rơgơi. Lu čơđai lêng kơ gir kơtir kiăng jing ƀing čơđai hrăm hră rơgơi hloh.

“jơlan hơdră “Čung čơđai nao sang hră-Ană rông puih kơđông tơhan” hăng akŏ bruă “Ƀing apăn bruă, ling tơhan čung čơđai nao sang hră” pơsit tong tơlơi hiam klă, gum pơgôp, pơlir hơbit kơplah wah ƀing apăn bruă, ling tơhan hăng mơnuih djuai ania ƀiă ƀơi kual giăm guai. Laih dong, hluai tui jơlan hơdră hơmâo pơtrut pơsur ƀing apăn bruă, ling tơhan ƀu pơdơi hrưn đĭ, thâo gum pơgôp hăng mơnuih ƀon sang, pơjing pran khăp pap kơplah wah mơnuih djuai ania ƀiă ƀơi kual giăm guai, pơgôp ngă hiam tui pran hơdip hăng gru grua “Ling tơhan rơnuk wa Hô", “Ling tơhan buh ao mơta” amăng rơnuk phrâo”.

Hơdôm jơlan hơdră “Čung čơđai nao sang hră”, “Ană rông puih kơđông tơhan” mơng ling tơhan wai pơgang guai djru brơi ƀing čơđai kual giăm guai hơdôm boh tơring čar kual Dap kơdư dưi nao sang hră hăng hrưn đĭ găn rơgao tơnap tap. Rup rap ling tơhan buh ao mơtah jai yôm phăn ƀơi kual giăm guai tơnap tap. Hơdôm bruă mă yôm phăn anai ba glăi tơlơi sit nik, anun lĕ ngă pơlir hơbit, khăp pap kơplah wah “Ling tơhan rơnuk wa Hô” hăng mơnuih ƀon sang kual giăm guai./.