Dak Lak lĕ tơring čar tal 4 ƀơi kual Dap Kơdư dưi hmâo Khul mơnuih bơwih ƀong Ling tơhan hơđăp Việt Nam ƀơk hră čih mơ̆ng jơlan hơdră “Sa klăk pok hră čih kơ čơđai sang hră ƀun rin djop djuai ania ƀiă Dap Kơdư hăng tơring čar Bình Phước”. Jơlan hơdră pơphun mơguah kơ 27/6 ƀơi plơi prong Buôn Ma Thuột, tơring čar Dak Lak.

Grŭp pơphun jơlan hơdră hmâo ƀơk 200.000 pok hră čih pioh brơi kơ giăm truh 15.600 čô čơđai gưl sa ƀun rin amăng đơ đam tơring čar Dak Lak, hăng nua ñu giăm truh 900 klăk prăk. Mrô hră čih anai lĕ bôh tơhnal mơ̆ng jơlan hơdră pơsur “Sa klăk pok hră čih kơ čơđai sang hră ƀun rin neh wa djuai ania ƀiă Dap Kơdư hăng tơring čar Bình Phước” yua kơ Khul mơnuih bơwih ƀong Ling tơhan hơđăp Việt Nam pơphun, ngă tui amăng 2 thun (2023-2024). Anai lĕ bruă mă pơdah tơlơi lăng ba, bơwih brơi mơ̆ng hơdôm anom bruă hăng Khul ling tơhan hơđăp hơdôm gưl pioh kơ rơnuk hlăk ai čơđai pioh djru pơsur, pơtrut, djru brơi čơđai sang hră hmâo dong tơlơi gal nao sang hră amăng thun hrăm phrâo./.