VOV4.Jarai - Khă giăm hmâo 80 thun laih hăng hmâo amăng drơi pô nam rơka ruă yua kơ blah ngă ba truh samơ̆ ling tơhan Nguyễn Đình Phùng, ƀơi plơi prong Tam Kỳ, tơring čar Quảng Nam ăt abih pran jua hăng bruă pô mă mơn, djru prăk pioh pơdŏng tơdrông toa ƀơi hơdôm kual plơi pla ƀun rin tơnap tap Quảng Nam. Giăm hmâo 30 ƀĕ tơdrông toa hăng prăk yua pơdŏng hơdôm klai prăk, hmâo pơkra mă yua djru mơnuih ƀôn sang hơdôm plơi pla tơnap tap nao rai gêh gal, hơđong tơlơi hơdip mơda. Hơdôm bruă mă mơng ơi Nguyễn Đình Phùng jing laih tơlơi ngă tơglưh pran jua ƀing ling tơhan ƀu klă drơi jăn yua kơ blah ngă, ngă lar hyu gru rŭp wa Hồ amăng rơnuk anai.

Amăng pơ-iă đăng phang waih mơng kual Tŏng Krah dêh čar hơdôm hrơi krah blan 7, ƀơi hơdôm jơlan čơlah amăng hơdôm bôh plơi pla ƀun rin tơnap tap mơng tơring čar Quảng Nam, lu mơnuih ăt juăt ƀuh mơn gru rŭp pô ơi tha hăng rơdêh thut khik thuk hyu hơduah ĕp lăng, ruah anih anom pơdŏng tơdrông toa kơ mơnuih ƀôn sang nao rai. Pô anun lĕ ơi Nguyễn Đình Phùng, ling tơhan 2/4, hăng tơngan rơkă ruă, pơpư̆ tơnap tap biă. Lom hyu hơduah ĕp hmâo anih pơdŏng tơdrông toa lĕ ñu čơphin rŭp mơ-ĭt kơ ană đah rơkơi ñu pioh dăp hơdră, pơphun pơkra. Ơi Nguyễn Đình Phùng brơi thâo, tơlơi mơ-ak prong hloh lĕ hơdôm bôh tơdrông toa mă yua djru bruă nao rai mơng mơnuih ƀôn sang gêh gal hloh, ƀô̆ mơta plơi pla pơplih phrâo hloh.

“Rim wot glăi plơi kâo ƀuh lu tơdrông toa răm rai, nao rai tơnap tap, neh wa rơnuh đih rơka ruă, hmâo mơnuih đa djai hlao mơtăm. Pơphun mơng anun kâo mơng yua prăk pô, gum hrom prăk pơkrem pioh pơdŏng hơdôm ƀĕ tơdrông toa. Rim thun sang anô̆ kâo gir run pơdŏng hmâo ƀiă biă mă ñu 4 bôh tơdrông toa. Hlâo kơ mut Ping gah lĕ kâo ƀuan amra hrưn đĭ truh jua suă tuč rơnuč, khă ră anai tha rơma laih hăng hmâo lu tơlơi ruă amăng drơi jăn samơ̆ amra gir run hơkrŭ pơsir. Kâo ƀuan hăng ƀing ană kâo, gơyut gơyâu kâo hăng ƀing gŏp ling tơhan hmâo rơbuh đih lĕ, lom dô̆ pran jua, dô̆ prăk kak lĕ amra pơkra dong tơdrông toa kơ mơnuih ƀôn sang”.

Tui anun yơh, rơbêh kơ 5 thun rơgao, sang anô̆ ling tơhan rơka ruă Nguyễn Đình Phùng yua prăk pô pioh pơdrŏng giăm truh 30 bôh tơdrông toa. Jê̆ hăng anai hloh lĕ tơdrông toa Phùng Hiệp 28, ƀơi să Tam Phú, plơi prong Tam Kỳ, mă yua djơ̆ tal hơdor glăi 132 thun Hrơi tơkeng Wa Hồ. Yă Dương Thị Nhân, hrom hăng mơnuih ƀôn sang kual plơi prong Ngọc Nam, phường An Phú, plơi prong Tam Kỳ mơ-ak lom bơyan hơjan thun anai nao rai gêh gal hloh:

“Hlâo adih akă hmâo tơdrông toa lĕ nao rai tơnap tap biă, rim wot ia rô juar hă nao rai ƀu thâo dong tah. Ră anai hmâo tơdrông toa laih, kâo nao rai amuñ hloh, pơhlôm hloh hăng mơ-ak hloh”.

Rơngiao kơ bruă yua prăk pô pơdŏng tơdrông toa djru mơnuih ƀôn sang, mơng thun 2014 truh ră anai, ơi Nguyễn Đình Phùng dô̆ gum hrom lu bruă mơnuih mơnam, djru lu mơnuih tơnap tap ƀơi plơi pla. Ơi Nguyễn Quang Vinh, Khua plơi Ngọc Mỹ, să Tam Phú, plơi prong Tam Kỳ pơdah pran jua, gong gai hăng mơnuih ƀôn sang pơpŭ hăng đăo biă pran jua mơng ơi Nguyễn Đình Phùng:

“Hlâo adih lơm ơi Phùng nao pơmin či tuh pơplai pơdŏng tơdrông toa, kâo hmâo tơña kơ ñu iâu pơthưr prăk mơng hơdôm bôh anom bơwih ƀong hơpă thơ lĕ, ñu lăi sang anô̆ rŏng yua prăk pô pơdŏng. Kâo ƀuh đăo biă yua kơ pran jua mơng sa čô ling tơhan wa Hồ thun tha rơma laih samơ̆ ăt gir hyu iâu mơnuih man pơkra mơn, drơi pô lăi tui bruă man pơdŏng tơdrông toa kiăng pơhlôm kơ bruă nao rai mơng mơnuih ƀôn sang”.

Yă Huỳnh Thị Thu, bơnai ling tơhan Nguyễn Đình Phùng ră ruai, dua rơkơi bơnai ñu gum hrom găn rơgao hơdôm tơlơi tơnap amăng thun blan blah wang kơtang tit anun pơpŭ na nao anô̆ yôm mơng tơlơi rơnuk rơnua hăng hơdor tơngia hơdôm mơnuih hmâo rơbuh laih drơi pô kơ lŏn ia. Yă Thu lăi pơthâo, rơkơi bơnai ñu rim blan čơkă mă rơbêh kơ 15 klăk prăk pơdơi thun tha samơ̆ ăt gir run pơkrem mơn, kiăng gum hrom ƀing ană bă pơdŏng tơdrông toa kơ mơnuih ƀôn sang:

“Rơkơi kâo jai hrơi jai tha tui, pran jua tơdu anun rim wot ñu hyu hơduah ĕp pioh pơdŏng tơdrông toa lĕ kâo bơngot biă, djơ̆ hrơi đa ñu hyu jrom djơ̆ rơdêh krua arăng. Kâo bơngot biă samơ̆ ăt pơmin nao mơn yua kơ bruă hrom anun rim wot pơkra giong sa bôh tơdrông toa lĕ sang anô̆ kâo mơ-ak biă”.

Phrâo 19 thun, ơi Nguyễn Đình Phùng djă phao gum hrom blah ayăt Mi, lom tơlơi blah wang ƀơi Quảng Nam amăng rơwang kơtang tit. Tơbiă mơng tơhan thun 1977, amăng drơi pô hmâo lu nam rơka ruă, ơi Phùng dô̆ mă bruă ƀơi Sang phăt kơđi plơi prong Tam Kỳ (ră anai lĕ plơi prong Tam Kỳ, tơring čar Quảng Nam). Mơng hrơi glăi pơdơi thun tha truh ră anai, ñu gum hrom na nao bruă ƀơi Grŭp Ping gah plơi prong hăng Khul ling tơhan hơđăp phường An Xuân, plơi prong Tam Kỳ. Ơi Đỗ Văn Thương, Khua Khul ling tơhan hơđăp phường An Xuân, ƀuh đăo biă tơlơi abih pran jua, pran jua gơgrong, abih jua pô yua kơ bruă hrom mơng ƀing gŏp Nguyễn Đình Phùng:

“Tơlơi čang rơmang mơng ơi Phùng lĕ mă bruă hơget leng kơ pơphun mơng pran jua pô, ƀu hyu pơ-ư pơ-ang ôh, mơng hlâo truh kơ ră anai tui anun na nao. Lơm pơphun nao ngă tơhan truh ră anai ơi Phùng ƀu pơmin nao kơ ha jăn drơi pô ñu ôh mơ̆ biă ñu bơwih kơ bruă hrom, bơwih brơi kơ mơnuih ƀôn sang”.

Giăm hmâo 80 thun, pran jua ƀu dô̆ kơtang dong tah, samơ̆ ơi Nguyễn Đình Phùng ăt dô̆ pơmin mơn hăng hơdôm tơlơi pơmin pơkra tơdrông toa kơ mơnuih ƀôn sang ƀơi kual tơnap tap Quảng Nam. Ơi Phùng mơ-ak biă lơm truh krah blan 7 samơ̆ pơkra giong laih tơdrông toa kah hăng hmâo ba tơbiă amăng thun anai lĕ pơdŏng 4 bôh tơdrông toa. Hmâo laih 28 bôh tơdrông toa yua kơ ơi Phùng pơdŏng djă anăn Phùng Hiệp 1 truh Phùng Hiệp 28. Pơblang kơ anăn Phùng Hiệp, ơi Nguyễn Đình Phùng brơi thâo, Phùng lĕ anăn ñu, bơ̆ Hiệp lĕ anăn sa čô gơyut ñu rơngiă laih, ăt lĕ mơnuih blung a gum pơčruh prăk gum hrom sang anô̆ ñu pơkra tơdrông toa kơ mơnuih ƀôn sang. Ơi Phùng lăng djơ̆ pran biă lơm giăm truh 30 bôh tơdrông toa leng kơ pơkra giong hăng mă yua djơ̆ amăng hơdôm tal hrơi jơnum prong mơng lŏn ia, hăng pran jua čang rơmang gum djru dong pran jua anet mơng ling tơhan wa Hồ kơ tơlơi pơđĭ kyar plơi pla, lŏn ia./.

            Long Phi (VOV kual Tŏng Krah): Čih – Siu H’ Prăk: Pơblang