Mơmot lơ 6/4, rơbêh kơ 1.500 čô khua pơ ala hăng ha rơbâo čô mơnuih ƀôn sang tơring čar Dak Lak hmâo lăng ƀuh ƀơi anăp jơlan hơdră adôh suang lăi nao “Tơlơi adôh bơni rơnuk rơnua”, hơdor glăi 50 thun hrơi Tlaih rơngai kual Dơnung dêh čar, pơlir hơbit lŏn ia. Hăng bôh tŭ yua gru grua mơ̆ng bruă tlaih rơngai Buôn Ma Thuột, truh kih pok phun, pơjing yak pok tơbiă kơ Tlaih rơngai prong bơyan bơnga thun 1975, giăm hmâo 250 čô mơnuih hmâo gum hrŏm pơdah hơdôm tơlơi adôh suang hur har mơ̆ng tơlơi Mơ-ak Dap Kơdư tlaih rơngai hăng bruă anăp nao Sài Gòn tlaih rơngai. Amai Nguyễn Thị Thúy Diễm, ƀơi phường Tân An, plơi prong Buôn Ma Thuột lăi pơthâo:

“Jơlan hơdră anai kơdrưh biă hăng rơnoh prong biă. Abih bang hur har nao lăng Jơlan hơdră anai, ƀuh hiam biă hăng djop mơnuih mơ-ak biă, kơdrưh biă”.

Rơngiao kơ lăng tui yak tơkai mơ̆ng grŭp tơhan tlaih rơngai tui tơlơi čih djă pioh, ƀing khua pơ ala hăng mơnuih nao lăng, hmư̆ hơdôm tơlơi lăi pơthâo lu mơta mơ̆ng anih pơdah adôh suang mơ̆ng Trung tướng, Sông kơtang khul ling tơhan mơnuih ƀôn sang Đoàn Sinh Hưởng, Khua Grŭp Đại đội 9 hơđăp, Trung đoàn rơdêh sar 273, mơnuih hmâo ƀơi anăp mơgăt rơdêh sar 980 blah mut sư bộ 23 Việt Nam cộng hòa ƀơi Buôn Ma Thuột, amăng lơ 10/3/1975. Rơdêh sar 980, ră anai jing gru grua pran kơtang đưm, amăng ƀut gong kut Tlaih rơngai Buôn Ma Thuột. Trung tướng Đoàn Sinh Hưởng brơi thâo, ñu ư-ang rah yua kơ gru grua 21 thun blah ayăt pơlir hơbit lŏn ia, laih anun ư-ang rah hơdôm bôh than dưi ngă amăng ha mơkrah rơnuk thun rơgao:

“Ư-ang lĕ pô hmâo gum hrŏm hơdôm tal blah ayăt yôm phăn tui anun hrŏm hăng ƀing gŏp hăng hmâo ngă giong bruă jao. Tơdơi kơ 50 thun pơwot glăi lĕ lŏn ia pô pơplih phrâo laih hăng biă ñu Buôn Ma Thuột ră anai lĕ phara laih, anun lĕ sa tơlơi ư-ang biă”.

Ƀơi Sang hră pơtô bruă tơhan Quân khu 7 (quận 12, ƀôn prong Hồ Chí Minh) ăt phrâo pơphun mơn Jơlan hơdră adôh suang čơkă mơ-ak hơdor glăi 50 thun Hrơi tlaih rơngai kual Dơnung dêh čar, pơlir hơbit lŏn ia hăng anăn ñu “50 thun – Bơyan bơnga lŏn ia”. Jơlan hơdră hmâo pơdah laih bôh tŭ yua, tơhnal ñu, nua gru grua mơ̆ng hrơi Tlaih rơngai kual Dơnung dêh čar, pơlir hơbit lŏn ia. Mơ̆ng anun pơtŏng sit tơlơi git gai thâo mơ̆ng Ping gah hăng Khua mir sir Hồ Chí Minh; pran kơtang hăng pran pơsit, blah khom dưi mơ̆ng Khul ling tơhan hăng mơnuih ƀôn sang Việt Nam, khul gum hrŏm hơbit abih bang djuai ania. Hrŏm hăng anun hơdor tơngia pran jua mơ̆ng ƀing hơdôm khul tơhan hmâo blah ayăt, pơsăn drơi, pơjing tơlơi truh kih prong prin; rŭ tơgŭ pran jua khăp kơ lŏn ia, ư-ang mơ̆ng mơnuih apăn bruă tơhan, ling tơhan, Mơnuih ƀôn sang amăng bruă pơdŏng hăng pơgang lŏn ia, hrơi phun pơdŏng lŏn ia, yak mut rơnuk phrâo hrưn đĭ mơ̆ng djuai ania. Ơi Tô Văn Luận, pô djru bruă pơhrăm mơ̆ng Anom pơphô bruă čar Sang hră pơtô bruă tơhan Quân khu 7 pơdah pran jua:

“Lơ 30/4 pơ̆ anăp hmâo bôh yôm gru grua mơ̆ng abih bang ping gah, abih bang tơhan, abih bang mơnuih ƀôn sang. Mơnuih apăn bruă tơhan amăng khul ling tơhan glăk hur har ngă tui hơdôm bruă hơdor glăi hrơi tlaih rơngai. Sang hră pơtô bruă ling tơhan Quân khu 7 ăt pơphun mơn lu bruă mă, amăng anun hmâo bruă pơhlôm kơ khul gum hrŏm rơbat trui amăng mông ngă lơphet hơdor glăi. Drơi pô kâo ăt kah hăng ƀing apăn bruă tơhan, ling tơhan hăng rơnuk hlăk ai lĕ rơgao hơdôm črăn phim djă pioh ăt kah hăng dưi pơtô pơhrăm, abih bang djop mơnuih leng kơ ư-ang hăng hơdor tơngia rơnuk nao hlâo hmâo tuh drah pơčah asar yua kơ tơlơi rơngai djuai ania”.

Thượng úy Phạm Duy Hưng, Khua Trung đội ling tơhan Kông ƀinh Ƀirô pơtrun bruă ƀôn prong Hồ Chí Minh lăi pơthâo:

“Ol kơdol pran jua lơm giăm truh hrơi jơnum prong mơ̆ng mơnuih ƀôn sang đơ đam dêh čar lăi hrŏm hăng ƀôn prong Hồ Chí Minh lăi ha jăn, hơdor glăi 50 thun tlaih rơngai kual Dơnung dêh čar, pơlir hơbit lŏn ia. Hăng “ling tơhan Wa Hồ” lĕ kâo ƀuh hơdôm hrơi jơnum anai đơ đam dêh čar leng kơ anăp nao ƀôn prong, bruă jao mơ̆ng pô dưi pơđĭ dlông, laih anun pel ĕp pơhlôm kơ hơdôm mông jơnum, pơhlôm rah bruă pơdah gêh gal, ƀu pioh hmâo tơlơi rung răng truh, anun lĕ bruă jao mơ̆ng adơi ayong tơhan công ƀinh ƀôn prong”.

Tui tơlơi lăi pơthâo mơ̆ng Trung tướng Đoàn Sinh Hưởng - pô hmâo ha tal mơgăt rơdêh sar 980 blah mut puih kơđông ayăt ƀơi Buôn Ma Thuột, truh kơ pran jua ol kơdol ư-ang mơ̆ng mơnuih ƀôn sang hăng ling tơhan hlăk ai ră anai, hơdôm jơlan hơdră adôh suang hmâo jing laih jơlan tô nao rai yôm phăn kơplah wah đưm hăng ră anai. Pran jua Ling tơhan Wa Hồ ƀu kơnong kơ hơdip na nao amăng bruă blah gru grua ôh mơ̆ ñu dô̆ lar hyu amăng rim jua pơpư̆ khăp kơ lŏn ia, rim bruă mă sit nik yua kơ tơlơi pơđĭ kyar mơ̆ng lŏn ia ră anai./.