Ngă tui Akô̆ bruă 214 kơ lơm lui sang tơ̆i, Jơnum min mơnuih ƀôn sang tơring čar Dak Lak jao kơ Kông ang tơring čar git gai, gum hrŏm hăng Gơnong bruă man pơdŏng, Gơnong bruă prăk kak, hơdôm tơring glông, plơi prong hăng hơdôm bôh anom bơdjơ̆ nao črâo ba pơdŏng 4.285 bôh sang dô̆ pioh jao kơ hơdôm bôh sang anô̆ ƀun rin, ƀun rin ƀơƀiă amăng tơring čar thun 2025. Amăng mrô anai hmâo rơbêh kơ 1.650 bôh sang neh wa djuai ania ƀiă hơđăp ƀơi anai.

Abih bang prăk pơdŏng pơkra sang lĕ 342,8 klai prăk. Rơnoh djru pơdŏng phrâo rim bôh sang lĕ 80 klăk prăk. Hơdôm tơring glông, plơi prong, grŭp, gơnong bruă ƀơi Dak Lak lăi pơhing klă dong, pơsur mơnuih mơnam pơplih phrâo, djru dong prăk pơdŏng, gơnam man pơdŏng, hrơi bruă pioh pơdŏng hơdôm bôh sang klă hiam hloh hăng pơhlôm djơ̆ rơnoh, djru hơdôm bôh sang anô̆ tơnap tap tañ hơđong tơlơi hơdip mơda./.