Hơdôm hrơi anai, hơdôm bruă pioh hơdor tơngia pơphun amăng đơ đam tơring čar Dak Lak Ƀơi 12 anih mă drah asar ADN mơng pô sang tơhan djai pơsăn drơi yua Kông ang tơring čar Dak Lak pok pơhai, bruă mă drah asar pơphun ječ ameč, lăp djơ̆. Đại tá Võ Hùng Tường, Khua anom bruă tơhan pôlih wai lăng bruă pơhlôm hơđong mơnuih mơnam, kông ang tơring čar Dak Lak brơi thâo, rơngiao kơ 12 anih tŭ mă dŏ hơđong, anom bruă ăt pơkiăo nao 12 grup nao tơl sang ƀing pô sang tơhan lĕ mơnuih tha rơma, ƀing ƀu-ai buai, mơnuih ƀu anăm nao rai kiăng kơ mă drah asar. “Ƀing gơmơi pok pơhai na nao amăng 4 hrơi, mơng kơnôl 23/7 truh kơnôl 26/7, kơnong hrơi blung a pok pơhai, hăng tơlơi gir run ngă tui mơng hơdôm anom bruă, ƀing gơmơi hơmâo mă glăi 928 drah asar, amăng anun hơmâo 15 čô mơnuih arăng mă ƀơi sang anŏ pô tơhan. Mrô blung a lĕ 2.886 čô hăng dŏ rơbêh 2 hrơi dong, mrô dŏ glăi ƀing gơmơi amra đing nao pơgiong bruă mă drah asar kiăng pơhlôm 100% tui mrô pơkă”.

Hrŏm hăng bruă mă drah asar ADN pơphun ječ ameč, bruă man pơdong sang djru brơi ană bă tơhan djơ̆ jrao hret kah hơmâo pok pơhai khut khăt amăng blan 7 anai. Tal anai, tơring čar Dak Lak pok pơhai man pơdong 22 boh sang hăng pơkra ming 20 boh sang brơi hơdôm boh sang anŏ. Bruă man pơdong, pơkra ming him lăng pơgiong amăng kơnôl 27/7 anai. Ƀơi phương Ea Kao, ƀon lan rơkâo man pơdong 2 boh sang hăng djru pơkra ming 1 boh sang. Thiếu tá Đỗ Anh Dũng, kơ-iăng Khua anom bruă git gai tơhan phương Ea Kao brơi thâo, hăng tơlơi mut hrŏm khut khăt mơng anih anom kơđi čar, bruă mă hơmâo pơgiong laih. “Hluai tui hơdôm anom bruă djru man pơdong, pơkra ming brơi ƀing ană bă mơnuih djru hơkrŭ djơ̆ jrao hret, Anom bruă git gai tơhan phương hơmâo pơjing akŏ bruă pơhô brơi Jơnum min mơnuih ƀon sang phương pok pơhai ngă. Ƀing gơmơi juăt gum hrŏm sang anŏ, ƀing man pơdong djru brơi hơdôm boh sang anŏ”.

Tal hơdor glăi 79 thun hrơi tơhan rơka-tơhan djai pơsăn drơi thun, Jơnum min mơnuih ƀon sang tơring čar Dak Lak hơmâo kah pơpha 21,5 klai prăk mơng ngăn drăp, akŏ pơjing 15 grup mă bruă pơphun nao čuă, jum alum hăng jao gơnam brơi 36.000 boh sang anŏ tui hơdră djru. Laih dong, Dak Lak ăt ngă tui bruă jao mơng Khua mir sir truh 27.200 hăng ƀing mơnuih tui hơdră djru amăng đơ đam tơring čar, hăng abih tih 8,23 klai prăk. Ơi Phan Đại Thắng, kơ-iăng Khua gơnong bruă wai lăng bruă mă tơring čar Dak Lak brơi thâo, abih tih gơnam djru hơmâo mơ-it nao Jơnum min mơnuih ƀon sang 102 boh să, phương kiăng jao tơl hơdôm boh sang anŏ tui hơdră djru. Laih dong, gơnong bruă gum hrŏm hăng hơdôm anom bruă bơdjơ̆ nao pok pơhai ha amăng plĕ lu jơlan hơdră pioh hơdor tơngia kơnôl 27/7. “Djop gưl Ping gah, gong gai amăng tơring čar Dak Lak amra pơphun nao tŭi ñang pioh hơ-ŭ hơdor kơ tơhan djai pơsăn drơi ƀơi pơsat dor tơhan; pơkra ming hơdôm ring bruă Kơnuk kơna pioh hơdor amăng đơ đam tơring čar. Kơ hơdră bruă 500 hrơi mlăm, kiăng klơi pơƀut, ĕp brơi anăn krăn pô tơlang tơhan, gơnong bruă wai lăng gum hrŏm kjăp hăng anom bruă git gai ling tơhan tơring čar hăng hơdôm boh ƀon sang pơphun pơsit brơi anăn, klơi pơƀut kah hăng hyu ĕp tơlang tơhan”.