Tong krah blan 7, sang dŏ phrâo mơ̆ng yă Nguyễn Thị Nhường, phường Ea Kao hơmâo man giong laih, krĕp hrơi ngă lơphet 79 thun hrơi tơhan rơka, tơhan djai pơsăn drơi. Ñu jing mơnuih ruă djơ̆ jrao hret mơ̆ng ama ñu amăng rơnuk blah đưm, tơlơi hơdip mơ̆ng yă Nhường tơnap biă, ñu dŏ čang kiăng hơmâo sang dŏ kjăp ƀiă đôč: “Hơmâo Ping gah, Kơnuk kơna hrŏm hăng hơdôm anom bruă khul grup djru ba sang anŏ gơmơi sang dŏ phrâo, jing gơmơi mơak biă. Hơdôm thun hăng anai čang rơmang hơmâo sang, jing sit laih. Anai jing tơlơi hiam pơtrut sang anŏ gir run bơwih ƀong, hơdip hiam hloh”.

Tơlơi hok mơak anun jai hiam hloh lơ̆m mơnuih gum djru man pơdong brơi sang ñu lĕ ling tơhan Wa Hồ. Hơdôm hrơi rơgao, 10 čô khua, ling tơhan mơ̆ng Tiểu đoàn Đặc công 20, Lữ đoàn Đặc công bộ 198, Binh chủng Đặc công nao re se pơ anih man pơdong sang. Mơ̆ng bruă pơdŭ pơgiăng pơtâo čuah, pơsơi pơsă, klơi atur truh kơ man pơdong, tơhan hơmâo djru sang anŏ yă Nhường ngă bruă tañ ƀiă, hăng plai mơn apah arăng. Thiếu tá Nguyễn Văn Duẩn, Kơ-iăng khua kơđi čar Tiểu đoàn Đặc công 20 lăi: “Tơdơi kơ hơmâo bruă jao, gơmơi lăi pơthâo kơ abih adơi ayong, khŏm ngă bruă man pơdong djơ̆ hrơi pơkă, djru ba neh met hơmâo sang dŏ kjăp, hiam hloh. Tơdơi kơ man giong, gơmơi rơmet rơmot abih bang anih dŏ kiăng sang anŏ dưi pơdŭ gơnam mut nao dŏ mơak ƀiă”.

Tơdah hăng yă Nhường anai lĕ tơlơi hok mơak yua hơmâo sang phrâo, jing hăng sang anŏ yă Phạm Thị Ngân ƀơi phường Tân An, kơnong kiăng hơmâo anih dŏ huăi ia ƀlĕ lơ̆m bơyan hơjan lĕ mơak biă mă yơh. Rơkơi ñu đưm adih ngă tơhan, nao blah ayăt, dua čô ană đah rơkơi ñu leng kơ ƀă jrao hret soh. Sa čô djai laih, bơ ană ñu ha čô dong rơbêh 40 thun laih, samơ̆ ƀu thâo rơbat hyu, djŏp mơta kơnang kơ amĭ ama soh.

Anih ană ñu đih pit lu thun laih rơgao ƀu kjăp dong tah, pơčah čơđang, ia ƀlĕ, pơbung răm, pơnăng čăt kơmao mơn. Tơdơi kơ giăm ha blan, hơmâo tơhan mơnuih ƀon sang, tơhan wai lăng rơnuk rơnua, Khul mơnuih ngă hmua hăng Khul tơdăm dra djru, sang ñu hơmâo pơkra ming hiam laih mơ̆ng pơbung sang, pơnăng truh kơ lan sang. Yă Phạm Thị Ngân ol kơdol: “Hmư̆ hing ling tơhan djru ba gơmơi pơkra sang dŏ jing gơmơi dŏ kơtuă mơn, yua dah sang anŏ gơmơi pơmin či apah arăng, samơ̆ han kâo nao mă bruă pơ ataih aka ƀu glăi ôh, bưng mơn hơmâo kơnuk kơna djru, jing hok mơak biă yơh”.

Tui hăng ơi Nguyễn Công Thảo, Kơ-iăng khua jơnum min mơnuih ƀôn sang phường Tân An, phường ră anai hơmâo giăm 480 čô mơnuih ngă hơkrŭ. Amăng hrơi ngă lơphet kơnôl 27/7 thun anai, hrŏm hăng bruă hơdor tơngia, phường lăng glăi hăng rơkâo djru pơkra brơi sang dŏ kơ sang anŏ djơ̆ tui hăng hră pơtrun. Kơnong sang anŏ yă Ngân, phường ăt jak iâu mơnuih mơnam, ƀing juăt djru mơnuih tơnap djru ba na nao mơn: “Jơnum min mơnuih ƀôn sang phường lăng glăi abih bang hră pơ-ar, laih anun hơmâo tơring čar, Gơnong dlông kĭ hră brơi pơkra sang dŏ kơ 2 boh sang anŏ, rim boh sang hơmâo 30 klăk prăk či pơkra glăi dua boh sang, pơhlom tơlơi dŏ dong ƀong huă kơ ƀing gơñu, brơi rơnuk rơnua, mơak hloh. Rơngiao kơ anun dong, Ping gah, Jơnum min mơnuih ƀôn sang phường nao čuă sang anŏ hơmâo anăn kơnuk kơna djru, rơngiao kơ prăk brơi mơ̆ng Kơnuk kơna, phường ăt brơi mơn kơ rim boh sang anŏ 200 rơbâo prăk”.

Tơring čar Dak Lăk glăk hơmâo 42 boh sang anŏ jing ană bă mơ̆ng tơhan ngă hơkrŭ đưm djơ̆ jrao hret hơmâo djru ba sang dŏ, hơmâo 22 boh sang man pơdong phrâo hăg 20 boh sang pơkra ming. Kiăng dưi man pơkra giong hlâo kơ kơnôl 27/7, hơdôm anom bruă tơhan nao djru bruă mơ̆ng rơnuč blan 5 laih. Tui hăng ơi Đào Mỹ, Kơ-iăng khua jơnum min mơnuih ƀôn sang tơring čar Dak Lăk, bruă ngă pơgiong hlâo kơ kơnôl 27/7 ƀu kơnong pơhlom djơ̆ hrơi pơkă đôč ôh ăt jing gơnam pơpŭ sit nik kơ ană bă mơnuih ngă hơkrŭ djơ̆ jrao hret: “Ƀing gơmơi gir ngă giong bruă man pơdong sang dŏ anai laih anun ăt či juh alum sang anŏ gơñu plai ƀiă hning rơngôt, pơdah pran jua mơ̆ng Ping gah hăng Kơnuk kơna thâo lăng ba sang anŏ mơnuih ngă hơkrŭ lŏn ia”.

Rim boh sang hơmâo man pơdong giong hlâo kơ kơnôl 27/7, ƀu kơnong djru hơdôm boh sang anŏ hơmâo anih dŏ hơđong hloh đôč ôh, ăt pơsit rơđah tơlơi thâo pơpŭ, hơdor tơngia hăng bruă ngă sit nik, tŭ yua. Lơ̆m sang hơmâo pơdong, tơlơi rơngôt hning, rơngiă rơngom mơ̆ng rơnuk blah wang đưm ăt plai mơn, ngă mơak pran jua ƀiă, kiăng hơdôm boh sang anŏ hơmâo tơlơi rơngôt prong mơ̆ng rơnuk blah wang hơmâo pran jua đăo kơnang, gir run hloh amăng tơlơi hơdip./.