Amăng tal pơphun ngă bruă ječ dong mơng kơnôl 23 truh kơnôl 26/7, kông ang tơring čar Lâm Đồng pơphun bruă mă pơhrui glăi 1.521 ADN kơ ƀing mơnuih amăng sang anŏ tơhan djai pơsăn drơi jăn kơnung djai gah amĭ. Bruă mă asar drah hơmâo pok pơhai ha amăng plĕ ƀơi 16 anih pơtum pơƀut amăng tơring čar hăng 3 grup đuăi hyu mă tơl sang ƀing amĭ Việt Nam sông kơtang, ƀing pô sang tơhan djai pơsăn drơi ră anai tha rơma, ƀu-ai buai ƀudah ƀu dưi rơbat nao rai.

Ƀuh ƀô̆ mơta mơng mơguah kiăng kơ mă asar drah, yă Phùng Thị Huệ, pô sang tơhan djai pơsăn drơi Nguyễn Văn Thái, pơdah tơlơi čang rơmang kiăng tañ ĕp ƀuh mơnuih amăng sang anŏ kiăng pô sang hăng ană tơčô pioh anih hơ-ŭ hơdor. “Tơlơi čang rơmang prong hloh mơng sang anŏ lĕ ĕp brơi anăn krăn pô. Ră anai tơlang tơleh hơmâo ba glăi dor pơ pơsat tơhan samơ̆ aka ƀu thâo tong ten. Ƀing gơmơi čang rơmang lơm ană tơčô nao čuh ñang kiăng thâo pơsat, djơ̆ mơnuih kiăng hơ-ŭ hơdor”.

Bruă mă drah asar ADN ƀu djơ̆ kơnong djru pơjing anih djă pioh anŏ pơsit brơi anăn tơhan djai pơsăn drơi jăn đôč ôh ăt pơdah tơlơi glăm ba, pran hơdor tơngia hăng ƀing mơnuih tuh drah pơčah asar yua kơ tơlơi rơngai, rơnuk rơnua lŏn ia. Thượng tá Võ Xuân Bình, kơ-iăng Khua anom bruă tơhan pôlih wai lăng gah bruă pơhlôm hơđong mơnuih mơnam, kông ang tơring čar Lâm Đồng brơi thâo, tơhan kông ang hơmâo pơkiăo nao djop mơnuih mă bruă, gơnam măi mok kiăng ngă gêh gal hloh brơi pô sang tơhan djai pơsăn drơi jăn mut hrŏm bruă mă drah asar. “Kông ang tơring čar hơmâo akŏ pơjing 16 anih mă drah asar AND amăng đơ đam tơring čar hăng 3 grup đuăi hyu mă tơl sang Amĭ Việt Nam sông kơtang, pô sang tơhan djai pơsăn drơi jăn ră anai tha rơma, ƀu anăm nao rai. Ƀing gơmơi gir run pơgiong bruă jao djơ̆ hrơi mông, pơhlôm brơi klă hloh hăng tong ten tơlơi pơhing djă pioh”.

Rĭm asar drah ADN hơmâo pơhrua amra pok rai tơlơi gal kiăng ĕp brơi anăn krăn pô tơlang tơleh tơhan aka ƀu tong ten tơlơi pơhing, pơgôp ngă tui tŭ yua Akŏ bruă pơjing anih djă pioh gen tơhan djai pơsăn drơi hăng lăp djơ̆ tơlơi čang rơmang mơng lu sang anŏ tơdơi kơ hơdôm hơpluh thun dŏ tơguăn kiăng ba tơlang tơleh tơhan glăi pơ plơi pla hăng thâo anăn krăn pô ƀing gơñu./.