Kơnôl 20/7, ƀơi phường Tuy Hòa, Jơnum min djop djuai ania mơnuih mơnam Việt Nam tơring čar Dak Lak hơmâo pơphun pơƀut bruă mă tui jơlan hơdră man pơdong 475 boh sang gum pơgôp mơ̆ng rơnoh prăk 38 klai yua ƀôn prong Đà Nẵng, hăng lu sang bruă mơdrô laih anun Anom bruă khua tơhan pơgang guai dêh čar djru. Ƀrô tal anai, tơring čar Dak Lak hơmâo jak iâu djru hrŏm jơlan hơdră man pơdong phrâo 300 boh sang Gum pơgôp, brơi kơ sang anŏ ƀun rin, giăm ƀun rin.

Rơnoh prăk mă mơ̆ng tơlơi djru yua Khua git gai ping gah, Khua mir sir  ơi Tô Lâm brơi kơ Keh prăk “Yua mơnuih ƀun rin” tơring čar. Lơ̆m sa boh sang amra tŭ mă 80 klăk prăk. Kiăng plai ƀiă tơnap kơ sang anŏ, tơring čar ăt jak iâu lu sang bruă, mơnuih tơpuôl, khul grup djru hrŏm, sang bruă mơdrô pơčruh prăk. Jơlan hơdră anai, yom biă mă, sa tơlơi kơnang kơjăp djru ba lu sang anŏ ƀun rin tơnap tap kiăng hơđong anih dŏ, bơwih ƀong huă, pơtrut hmar bruă lŏm lui sang tơ̆i, sang phŏ amăng tơring čar.