Amăng mông tơña hăng lăi glăi, Khua pơ ala Phan Thị Hà Phước, Khua nom bơwih ƀong huă-Ngăn drăp Jơnum min pơ ala mơnuih ƀôn sang tơring čar Dak Lak brơi thâo, lu hơnong pơkă bơwih ƀong huă anun lĕ tuh tia pơkra ming, sĭ mơdrô pơ tač rơngiao, tuai čuă ngui hăng mrô anom bơwih ƀong sĭ mơdrô phrâo akŏ pơjing đĭ lu pơhmu tui tơđar, samơ̆ mrô anom bơwih ƀong sĭ mơdrô pơdơi ngă bruă, pơdơi jang jai ăt dŏ lu mơn. Lăi glăi tơlơi tơña mơng khua mua kơ hơdôm gơnong bruă glăk bưp tơnap tap hăng hơdră bruă kiăng pơplih bruă tuh pơ alin, sĭ mơdrô, djru hơnong pơkă pơđĭ kyar 2 mrô, ơi Cao Đình Huy, Khua gơnong bruă prăk kak tơring čar Dak Lak brơi thâo, 6 blan akŏ thun đơ đam tơring čar hơmâo rơbêh 420 boh anom bơwih ƀong sĭ mơdrô pơdơi mă bruă hăng rơbêh 1.200 anom bruă pơdơi jang jai, lu hloh lĕ hơdôm anom bơwih ƀong anet hăng gap ƀrô amăng bruă sĭ mơdrô, man pơdong, sĭ lŏn sang, pơdŭ pơgiăng, sang jưh tuai hăng sang mơñum ƀong. Kiăng pơsir hĭ tơlơi tơnap tap anai, ơi Cao Đình Huy brơi thâo: “Gơnong bruă prăk kak ƀuăn pơ anăp anai tŏ tui lăng tơlơi sit nik bruă mă mơng hơdôm anom bơwih ƀong sĭ mơdrô amăng tơring čar kiăng hmao tlôn pơphô bruă brơi Jơnum min tơring čar hơdôm hơdră pơsir hĭ tơnap tap brơi anom bơwih ƀong sĭ mơdrô; plai ƀiă ƀuh anom bruă pơdơi mă bruă, đĭ tui mrô anom bruă pơwot glăi bơwih ƀong hăng hrưn đĭ klă bruă mă mơng anom bơwih ƀong phrâo akŏ pơjing. Ƀu djơ̆ kơnong pơgôp pok prong bơwih ƀong, ĕp brơi bruă mă hăng đĭ tui prăk pơhrui ngăn drăp đôč ôh mơ̆ ăt pơtrut pơđĭ kyar brơi tơlơi bơwih ƀong huă amăng tơring čar”.

Sa amăng hơdôm tơlơi ngă gun ƀơi Dak Lak lĕ anom bơwih ƀong sĭ mơdrô čan prăk aka ƀu gêh gal. Ơi Nguyễn Kim Cương, Khua sang bruă prăk kơnuk kơna, anom bruă pơdong ƀơi kual 11 brơi thâo, truh rơnuč blan 6, hnưh đôm amăng tơring čar Dak lak giăm 281.700 klai prăk, đĭ rơbêh 21.000 klai prăk pơhmu hăng akŏ thun. Samơ̆, prăk čan brơi anom bơwih ƀong sĭ mơdrô anet hăng gap ƀrô phrâo giăm 13% abih tih hnưh đôm. Tui ñu, bruă anom bơwih ƀong tơnap čan prăk hơmâo lu tơlơi ba truh mơng bruă pơtong rơđah prăk kak hăng pran wai lăng. “Rơkâo pơčlah phara prăk kak mơng anom bơwih ƀong sĭ mơdrô hăng prăk kak mơng sang anŏ, mơng rĭm čô mơnuih ngă bruă sĭ mơdrô kiăng pơdah tong ten bruă mă mơng gơñu amăng hră čih pioh. Sit biă ñu lĕ amăng hrơi mông mơ̆ bruă pơƀuh tong ten amăng hră jŭ yap kah hăng lăi pơthâo kơ bruă duh jia jai hrơi rơkâo tong ten ƀiă. Anai lĕ tơlơi rơkâo kiăng ngă hloh mơ̆ ƀing gơmơi kiăng lăi pơthâo brơi hơdôm anom bơwih ƀong anet hăng gap ƀrô mut hrŏm bruă bơwih ƀong sĭ mơdrô kah hăng čan prăk hăng hơdôm sang bruă prăk”.

Tơdah prăk čan lĕ atur phun kiăng tŏ tui bruă mă, anih sĭ mơdrô lĕ anih kiăng anom bruă pơđĭ kyar. Yua anun, amăng mông tơña, bruă pơsur sĭ mơdrô, pok prong anih anom sĭ mơdrô ăt hơmâo ba tơbiă. Kơ bruă anai, yă Nguyễn Thị Thu An, Khua gơnong bruă sĭ mơdrô hăng tuh tia pơkra ming tơring čar Dak Lak brơi thâo, 6 blan akŏ thun gơnong bruă hơmâo djru brơi giăm 150 wŏt brơi anom bơwih ƀong sĭ mơdrô, anom bruă ngă hrŏm mut hrŏm pơsur sĭ mơdrô, pơlir blơi pơhrui gơnam amăng dêh čar hăng mơng tač rơngiao, laih dong pơtrut sĭ mơdrô amăng plang internet hăng pơplih mrô. Pơ anăp anai, bruă pơsur sĭ mơdrô amra tŏ tui pơplih phrâo tui tơlơi rơkâo sit nik mơng anom bơwih ƀong sĭ mơdrô, sit biă ñu ƀơi hơdôm anih anom sĭ mơdrô amăng jar kmar. “Kơ bruă sĭ mơdrô pơ tač rơngiao, ƀing gơmơi amra kiăo tui tơlơi rơkâo mơng anom bơwih ƀong sĭ mơdrô. Anai lĕ anom bruă sĭ mơdrô kiăng hơget ƀơi anih sĭ mơdrô anun, kiăng djru brơi gơnam hơget, pơlir hiưm pă ñu hăng ƀing gơmơi amra pơjing jơlan hơdră lăp djơ̆ tơlơi rơkâo anun hrŏm anom bơwih ƀong sĭ mơdrô”.

Mông tơña hăng lăi glăi brơi ƀuh tơlơi gir run mơng tơring čar Dak Lak amăng bruă lăng tơpă nao hơdôm anŏ aka ƀu klă amăng tuh pơ alin, sĭ mơdrô. Hơdôm hơdră bruă hơmâo ba tơbiă lêng kơ anăp nao hơnong pơkă pok phư ngăn rơnoh, hơkrŭ glăi anom bơwih ƀong sĭ mơdrô, ngă atur kiăng Dak Lak ngă tui hơnong pơkă pơđĭ kyar dua mrô amăng rơwang pơ anăp./.