Sang phrâo prong rơhaih rơbêh 50 met karê kơ sang anŏ amai Dương Thị Thành, să Ia Phĭ, tơring čar Gia Lai glăk yak nao hơdôm hrơi pơgiong. Ama ñu đưm hlâo adih ngă tơhan djơ̆ jrao hret, bơ ñu pô ăt djơ̆ jrao hret mơn lơm ñu tơgu rŏng mơng muai. Găn rơgao rơbêh dua hơpluh thun rơgao, tlâo amĭ ană dŏ hơdip amăng sang tơ̆i phŏ. Truh ră anai yua hơmâo Kơnuk kơna hrŏm hăng ƀing apăn bruă, ling tơhan Khul tơhan mrô 17, Trung đoàn 48, Sư đoàn 320, Quân đoàn 34, tơlơi čang rơmang hơmâo sa boh sang sir kjăp dưi laih. Amai Dương Thị Thành ol kơdol brơi thâo: “Ling tơhan glăi man pơdong sang brơi sang anŏ tơnap tap kar hăng sang anŏ gơmơi hăng tơlơi čang rơmang hơmâo sa boh sang sir kjăp tơdơi anai. Sang anŏ gơmơi hok mơ-ak biă, bơni kơ Ping gah hăng gong gah hơmâo djru brơi amĭ ană gơmơi kiăng kâo hăng ană kâo hơdôm tơlơi hơdip jơnap ƀiă kơñ pơgi”.

Ƀơi să Ia Ly, sang anŏ ơi Nguyễn Văn Tân ăt glăk dŏ tơguăn mut dŏ sang phrâo. Anai lĕ mơnuih djru hơkrŭ djơ̆ jrao hret, ƀing ană bă ñu ăt bơdjơ̆ nao mơn yua anun lêng ƀu-ai buai soh. Sang dŏ hơđăp pơdong 30 thun laih yua anun răm rai, tơ̆i phŏ samơ̆ hơdôm thun rơgao sang anŏ ƀu hơmâo prăk kak kiăng kơ pơkra ming. Ră anai, hăng tơlơi gum tơngan hrŏm mơng Kơnuk kơna, ling tơhan, mơnuih ƀôn sang, kơnung djuai hăng neh met wa jum dar, sang phrâo glăk ječ ameč man pơdong giong hlâo bơyan hơjan hlim. Ơi Nguyễn Văn Tân ol kơdol brơi thâo: “Sang hơđăp hơmâo man pơdong mơng thun 1996, ră anai tơ̆i phŏ laih. Ăt bưng băi hơmâo Ping gah, kơnuk kơna hăng ling tơhan djru man pơdong sang prong rơhaih ƀiă. Bơni kơ Ping gah, gong gai ƀon lan hăng ling tơhan hơmâo djru brơi sang anŏ gơmơi hơmâo sang dŏ sir kjăp lơm ƀiă truh hơjan hlim, tơlơi anai brơi ƀuh ƀu hơmâo hlơi dŏ glăi pơ tlôn”.

Gah tlôn kơ tơlơi hok mơ-ak mơng hơdôm boh sang anŏ lĕ hơdôm hrơi mă bruă ƀu hŭi pơ-iă hang, hơjan hlim mơng ling tơhan. Mơng ruh hĭ sang sô hơđăp, klơi luh, tuh lŏn, pơdŭ pơgiăng gơnam truh pơ bruă man pơnăng, tuh ƀêtông…Djop mơta bruă lêng kơ hơmâo tơhan djru brơi, tơlơi anai ngă plai ƀiă prăk apah arăng mơng sang anŏ. Thiếu tá Phạm Văn Tạo, Khu grup tơhan mrô 17 brơi thâo: “Ngă tui jơlan hơdră ruh hĭ sang dŏ jang jai, sang tơ̆i phŏ brơi mơnuih ngă hơkrŭ hơmâo ană bă djơ̆ jrao hret, Trung đoàn 48 pơpha rĭm boh sang amra hơmâo 7 čô mơnuih apăn bruă, ling tơhan djru man pơdong. Ƀing gơmơi gir run pơgiong tañ ƀiă tui hrơi mông pơkă, găn rơgao djop tơlơi tơnap tap kiăng pơgiong klă bruă jao”.

Ngă tui tơlơi črâo trun mơng Kơnuk kơna kơ bruă ruh hĭ sang dŏ jang jai, sang tơ̆i phŏ brơi ană bă mơng djru hơkrŭ djơ̆ jrao hret, đơ đam tơring čar Gia Lai hơmâo 79 boh sang anŏ arăng djru man pơdong sang phrâo hăng pơkra ming. Rĭm boh sang glăk ƀơƀrư̆ pơgiong jing hơmâo dong sa boh sang pơdong rai mơng pran khăp pap kơplah wah ling tơhan-mơnuih ƀôn sang.

Ơi Võ Lê Xuân Thiện, Khua Jơnum min mơnuih ƀon sang să Mang Yang brơi thâo, mơng bruă man pơdong sang, hơdôm boh ƀon lan ăt pơsit anai lĕ tơlơi yak nao blung kiăng hơdôm boh sang anŏ tui hơdră djru hơđong tơlơi hơdip mơda, ƀơƀrư̆ pơđĭ kyar bơwih ƀong huă tơdơi kơ hơmâo anih dŏ hơđong. “Amăng să Mang Yang tơdơi kơ pơmut hrŏm hơmâo 169 boh sang anŏ tui hơdră djru, mơnuih ngă hơkrŭ. Truh ră anai hơdôm boh sang anŏ hơmâo sang dŏ hơđông laih. Thun 2026, ƀon lan glăk gum hrŏm man pơdong 2 boh sang tui jơlan hơdră mơng Anom bruă git gai ling tơhan tơring čar. Tơdơi kơ mơnuih ƀôn sang hơmâo sang dŏ hơđong, să amra tŏ tui đing nao djru pơđĭ kyar bơwih ƀong huă, hrưn đĭ tơlơi hơdip mơda”.

Mơng tơlơi đing nao anun, tơlơi hok mơ-ak lơm hơđong anih dŏ glăk ƀuh ƀơi hơdôm boh sang anŏ. Ƀơi să Mang Yang, sang prong rơhaih 65 met karê kơ sang anŏ ayong Nguyễn Văn Dũng-ană mơnuih djru hơkrŭ djơ̆ jrao hret man pơdong ƀiă giong laih. Hăng sang anŏ hơmâo 5 čô mơnuih, anai ƀu djơ̆ lĕ anih pơging pơ-iă hơjan đôč ôh ăt lĕ anih gơnang nao kiăng dua rơkơi bơnai ñu gir bơwih ƀong, ană bă hơmâo djop tơlơi gal hrăm hră klă ƀiă. “Dua rơkơi bơnai gơmơi bơni biă mă lơm Ping gah, kơnuk kơna hăng gong gai ƀon lan hơmâo djru man pơdong sang dŏ brơi gơmơi, kiăng gơmơi hơđong pran jua bơwih ƀong hăng ană bă hơmâo dŏ sir kjăp kiăng gơñu gir run hrăm hră, tơdơi anai jing mơnuih hơdip him djru brơi plơi pla, lŏn ia”.

Tơlơi blah wang pơđut hĭ sui laih samơ̆ hơdôm tơlơi bơdjơ̆ nao ăt dŏ mơn amăng tơlơi hơdip rĭm boh sang anŏ. Yua anun, rĭm boh sang phrâo hơmâo man pơdong ƀu djơ̆ kơnong djru brơi mơnuih ƀôn sang hơđong tơlơi hơdip đôč ôh ăt pơdah gru hơdip “Mơñum ia hơdor kơ pô klơi”. Pran hơdor tơngia glăk ƀuh amăng rĭm boh sang, rĭm čô mơnuih hơmâo pơtrut brơi pran đăo gơnang hăng tơlơi čang rơmang hiam klă./