Tui hăng hră lăi pơthâo mơ̆ng anom bruă pơsir anŏ kiăng mơnuih ƀôn sang, khua mua apăn bruă phun Jơnum min pơsir tơlơi kiăng mơnuih ƀôn sang hăng krăp lăng mơ̆ng sang bruă khua pơ ala mơnuih ƀôn sang, rơkâo hăng Kơnuk kơna dêh čar pơtum pơčrâo bruă git gai lu bruă mă ječ ameč kah hăng khom ĕp kơđi tañ, ngă pơrơđah tơlơi hơmâo tal pơplông abih anih 12 tơlơi hrăm jŭ yap Toán ƀuh tơlơi soh ƀu tơpă ƀơi Tuyên Quang; kơtưn pơkơdong hăng tơlơi hơmâo pơkra ming gơnam sĭ mơdrô ngă mă, ƀu tŭ yua, mơnong ƀong huă ƀu hơdjă rơgoh, ia jrao ngă mă ča, hla tui anăn arăng; pơtrut bruă pơhlom, pơgang klin duăm đung drah; pơsir tơlơi soh glăi amăng bruă in pơkra hơdrôm hră pơđok; pơhlom tơlơi rơnuk rơnua pơgang apui ƀong sang, pơčruih apui ƀong sang, truh pơ tơlơi rơnuk rơnua jơlan nao rai amăng ia hăng pơsir khut khăt lu tơlơi ngă hră tơgŭ kơđi lu khul mơnuih, ngă sui thun blan.

Ƀuh rơđah, djop tơlơi rơkâo lêng kơ tơbiă rai mơ̆ng tơlơi bơbeč djơ̆ ƀơi anăp anŏ tŭ yua hăng tơlơi hơdip mơda mơnuih ƀôn sang soh. Amăng anun, tơlơi soh sat pơkra ming gơnam ngă mă ča, hla tui arăng, ia jrao hăng mơnong ƀong huă ƀu sit, ƀu hơdjă rơgoh, ngă kơ lu mơnuih bơngơ̆t bơngañ, bơbeč truh tơlơi suaih pral hăng ngă rơngiă tơlơi đăo kơnang mơ̆ng mơnuih blơi yua, ngă răm ƀăm lup leč kơ sang bruă mơdrô tơpă. Lăp đing nao, tơlơi wai lăng rơnoh sĭ mơdrô amăng anih anom sĭ mơdrô lu khua mua lăi nao. Khua Jơnum min Boh thâo, Ia rơgơi hăng Ayuh hyiăng, ơi Nguyễn Thanh Hải lăi lĕ, kiăng lăi pơthâo rơđah, tong ten hloh hơdôm tơlơi mơnuih ƀôn sang dŏ bơngơ̆t bơngañ tơlơi đĭ trun nua gơnam sĭ mơdrô thun blan laih rơgao.

“Mơnuih ƀôn sang ruah khua lăi pơthâo tui anai. Lơ̆m nua ia săng, ia jâo rŏng lŏn tơnah đĭ, nua gơnam tam sĭ mơdrô amăng anih anom sĭ mơdrô ăt kiăo tui đĭ soh laih anun hmar biă mă…..Samơ̆ nua ia săng trun laih mơ̆, nua gơnam sĭ mơdrô pơkŏn ăt ƀu trun tui ôh ƀudah trun mơ̆n ƀiă đôč, kaih dơ̆ng. Phun ñu mơ̆ng pơpă? Bruă wai lăng rơnoh sĭ mơdrô hiư̆m lĕ, sang bruă kơnuk kơna wai lăng amăng bruă anai rơđah rơđong biă mă ñu hiư̆m pă laih anun tơlơi glăm ba mơ̆ng hlơi?”.

Anai ăt jing tơlơi hơmâo sit nik lu mơnuih ƀôn sang ƀuh hăng mưn rơđah amăng tơlơi hơdip mơda rim hrơi. Rơnoh gơnam sĭ mơdrô, ia săng ia jâo lăng kah hăng anŏ phun blơi pơmut djop bruă mă, pơdŭ pơgiăng, pơkra ming. Samơ̆, lơ̆m nua ia săng trun, ia jâo trun, lu gơnam sĭ mơdrô, mơnong ƀong huă ăt dŏ đĭ pơmă, ngă kơ rơnoh tuh pơplai rim hrơi amăng mơnuih ƀôn sang aka ƀu lăp hăng rơnoh anun ôh. Tơlơi anai, kiăng djop sang bruă khom kơtưn hyu sem lăng anih anom sĭ mơdrô, pơgăn ƀing ba akŏ pơđôm lui gơnam kiăng pơđĭ nua, khom pơhlom bruă sĭ mơdrô pơhno nao rai hăng tơlơi tơpă akŏ pơjing wai lăng tong ten rơnoh sĭ mơdrô.

Sa tơlơi dơ̆ng ngă kơ lu mơnuih đing nao, biă mă ñu tơlơi hmư̆ hing hling hlang puang pơplông abih anih 12 tơlơi hrăm Toán phrâo anai tal pơplông abih anih 12 gưl dêh čar ƀơi Tuyên Quang. Lơ̆m tal pơplông anai, yom pơphăn biă mă hăng hơdôm hơpluh klăk čô čơđai sang hră hăng sang anŏ, djop tơlơi ƀuh anŏ soh glăi anun, khom sem lăng, ĕp tong ten, tơpă ară, rơđah rơđong kiăng pơgang anŏ ngă bơkơnar. Kơ-iăng khua dêh čar ơi Nguyễn Văn Thắng brơi thâo:

“Hăng hơdôm tơlơi pơhing lu mơnuih đing nao bruă pơphun tal pơplông abih anih 12 thun 2026, pơdjơ̆ nao boh tơhnal pơplông tơlơi hrăm Toán ƀơi Tuyên Quang, Kơnuk kơna git gai khut khăt Ding jum Pơtô hăng Pơjuăt hrŏm hăng djop sang bruă hơmâo tơlơi dưi khom ĕp tong ten, pơtong rơđah, tơpă, hlom bom. Tơdah ƀuh ngă soh sit nik khom pơsir tui tơlơi phiăn pơkă, kiăng pơgang anŏ bơkơnar hăng lu čơđai sang hră pơkŏn hăng djă kơjăp tơlơi đăo kơnang mơ̆ng mơnuih ƀôn sang hăng anom bruă pơtô hrăm”.

Tơlơi pơčrâo ba mơ̆ng Kơnuk kơna, kiăng pơƀuh rơđah sa tơlơi ngă djơ̆ tong, ƀu bĕ kơ hlơi ôh, ƀu pơgang ba brơi ngă soh lơi, hơdôm tơlơi pơhing mơnuih mơnam dêh čar đing nao. Yua kơ hrŏm hăng bruă pơsir djơ̆ tơlơi, djơ̆ pô ngă soh, tơlơi yom hloh lĕ, ngă kơjăp tơlơi đăo kơnang mơ̆ng mơnuih ƀôn sang hăng bruă tơpă mơ̆ng tơlơi phiăn laih anun tơlơi bơkơnar pơtô pơjuăt.

Mơ̆ng hơdôm boh yom phun dưi pơčrong sai ƀơi mông jơnum lok 4 Jơnum min apăn bruă phun pơ ala mơnuih ƀôn sang dêh čar ta dưi ƀuh, bruă mă pơsir anŏ kiăng mơnuih ƀôn sang jai hrơi kiăo tui djơ̆ hơdôm tơlơi hơmâo sit nik amăng tơlơi hơdip mơda rim hrơi. Djop tơlơi rơkâo mơ̆ng mơnuih ƀôn sang ruah khua ƀu djơ̆ kơnong lăi pơthâo tơlơi či kiăng, tơlơi čang rơmang mơ̆ng mơnuih ƀôn sang đôč ôh, dŏ jing “gai pơkă” boh tŭ yua amăng bruă git gai wai lăng amăng kơnuk kơna sem tui djop bruă mă.