Jơnum bơkơtuai amăng črăn tơlơi phiăn lŏn mơnai (čih pơkra glăi), yă Lê Thị Song An, mơng Long An rơkâo sem lăng kiăng tañ ƀiă pơhrui glăi lŏn mơnai. Yua tơlơi pơkă lăi pơthâo brơi mơnuih arăng pơhrui glăi lŏn, ƀing hơmâo gơnam tam amăng lŏn, mơnuih hơmâo tơlơi dưi hăng tơlơi gơgrong bơdjơ̆ nao, kaih hloh 90 hrơi hăng lŏn ngă đang hmua hăng 180 hrơi hăng lŏn ƀu djơ̆ pioh ngă hmua lĕ aka ƀu lăp djơ̆.

“Hrơi mông lăi pơthâo tui anun lĕ sui đơi, lơ̆m anun bruă lăi pơthâo pơhrui glăi lŏn lĕ kiăng mơnuih yua lŏn thâo tơlơi dưi mă yua lŏn mơng ƀing gơñu amra pơhrui glăi kiăng kơ yua man pơdong ring bruă. Bruă sui đơi lăi pơthâo ƀu lăp djơ̆ hăng mơnuih yua lŏn tŭ ư hăng hơdră pơhrui lŏn. Anai lĕ 45 hrơi hăng lŏn ngă hmua wŏt lŏn ƀu hơmâo ngă hmua”.

Bơ tui Khua pơ ala mơnuih ƀon sang Mai Văn Hải, mơng Thanh Hóa, ƀu kiăng pơkă tơlơi anăp nao amăng dưm dăp mă yua lŏn mơnai gưl tơring glông kiăng pơhlôm lăp djơ̆ hăng tơlơi pơkă dưm dăp man pơdong. Laih dong rơkâo kiăng ngă rơđah djop mơta kiăng pơkă tơlơi anăp nao dưm dăp mă yua lŏn mơnai.

“Bruă dưm dăp hluai tui hơdôm hơdră pơđĭ kyar bơwih ƀong mơnuih mơnam, samơ̆ tơlơi anăp nao amăng mă yua lŏn mơnai aka ƀu tong ten, amuñ ba truh tơlơi pơtah tai, ƀu kjăp phik. Hơnong pơkă pơsit bruă mă yua lŏn mơnai gưl tơring glông, gưl să amăng dưm dăp man pơdong gưl tơring čar kiăng tong ten ƀiă dong, sit biă ñu lŏn ngă hmua, rông hlô mơnong, lŏn man pơdong anih anom…”

Khua pơ ala mơnuih ƀon sang Sùng A Lềnh (mơng Lào Cai) lăi pơtong, mơng krăo lăng hăng pel ĕp ƀơi ƀon lan brơi ƀuh bruă pơkă tơlơi gơgrong mơng Kơnuk kơna aka ƀu tong ten amăng tơlơi sit nik glăk ƀuh ră anai lơm mơnuih ƀon sang kiăng pơplih mă yua lŏn mơnai, ngă hră pơ-ar mă yua lŏn mơnai, hơmâo rơkâo hơdôm anom bruă kah mơng pok pơhai ngă tui. Ơi Sùng A Lềnh brơi thâo anai lĕ tơlơi soh glăi amăng tơlơi phiăn, ngă gêh gal kiăng ba truh hơdôm tơlơi soh, ƀuh rơkâo kah mơng brơi, tơlơi anai amra ngă hưp ƀong kông ngăn ƀơi hơdôm boh ƀon lan, sit biă ñu gưl ƀon lan ƀuh hơdôm bruă djru brơi mơnuih jing hơdôm bruă hưp ƀong hajăn pô. Khua pơ ala mơnuih ƀon sang rơkâo kiăng pơhrua tơlơi gơgrong mơng anom bruă hăng ƀing mơnuih mă yua lŏn mơnai amăng bruă pơtô pơblang, pơtrut pơsur, črâo ba, gum djru mơnuih ƀon sang mă yua lŏn mơnai  dưi ngă hră pơ-ar, pơhlôm brơi tơlơi dưi mơng Kơnuk kơna, mơnuih ƀon sang hăng pơgăn hơdôm tơlơi ngă soh hăng tơlơi phiăn lơ̆m mă yua lŏn mơnai.

Ƀing khua mua ăt brơi thâo, bruă pơhrui lŏn mơnai yua soh hăng tơlơi phăn anun lĕ amăng črăn tơlơi phăn amăng ƀu tong ten, kiăng kơsem min kah hơmâo tơlơi pơkă tong ten ƀiă dong. Khua pơ ala mơnuih ƀon sang Nguyễn Đại Thắng, mơng Hưng Yên rơkâo kiăng pơsit tong bruă mă yua lŏn mơnai mơng hơdôm akŏ bruă man pơdong plơi prong, anih bơwih bơwang sĭ mơdrô kiăng pơhrui glăi:

“Hơdôm ring bruă man pơdong plơi prong, anih bơwih bơwang sĭ mơdrô hăng bruă mă yua lŏn mơnai mơng 100 ektar pơ glông kiăng kơ jao Kơnuk kơna pơhrui glăi lŏn mơ̆ anăm ngă tui hơdră pơkôl pơkă. Tơdah ngă tui tơlơi pơkôl kiăng hơmâo hơdră wai lăng bruă pơkôl anai. Kơnuk kơna gơgrong pơhlôm brơi tơlơi dưi hăng tơlơi bơwih ƀong mơng mơnuih ƀon sang lơm pơhrui glăi lŏn. Samơ̆ mơnuih ƀon sang ăt kiăng pơyơr lŏn brơi hơdôm ring bruă kiăng pơđĭ kyar bơwih ƀong mơnuih mơnam, pơhlôm bruă pơgang rơnuk rơnua, hơđong lŏn ia”.

Amăng mông jơnum, Kơ-iăng Khua dêh čar, Khua ding jum wai lăng rơhuông adai lŏn mơnai Trần Hồng Hà brơi thâo, hrơi blan laih rơgao, bruă pơphun mă tơlơi pơgôp hiăp mơng mơnuih ƀon sang hơmâo pơphun khut khăt, tơpă sit, lăp djơ̆, pơhlôm sit nik hăng tŭ yua hăng lu lu mởa, jing bruă jơnum pơƀut abih bang, bruă kơđi čar-tơlơi phiăn yôm phăn. Hơmâo laih giăm 11 klăk 700 rơbâo tơlơi pơgôp hiăp amăng črăn tơlơi phiăn. Hơdôm  tơlơi pơgôp đing nao kơ bruă pơhrui glăi lŏn, gum djru, man pơdong plơi pla phrâo, jao lŏn, hơmâo laih hră pơ-ar rơkâo mơnuih ƀon sang tŏ tui pơgôp hiăp hăng anom bruă čih pơkra tơlơi phiăn amăng hrơi mông tơlơi phiăn hơmâo Khua pơ ala mơnuih ƀon sang tŭ yap, kiăng tŭ mă djop, djơ̆ hloh.

Hră lăi pơthâo mơng Ding jum wai lăng rơhuông adai lŏn mơnai ăt brơi ƀuh, kơ hơdôm bruă pơhrui glăi lŏn kiăng pơđĭ kyar bơwih ƀong-mơnuih mơnam, tŭ mă hơdôm tơlơi pơgôp hiăp, anom bruă čih pơkra hơmâo pơplih abih bang boh tơhnal amăng črăn 75 tui jơlan gah Kơnuk kơna pơhrui glăi lŏn kiăng ngă tui hơdôm akŏ bruă pơđĭ kyar bơwih ƀong mơnuih mơnam yua kơ tơlơi dưi lŏn ia, mơnuih mơnam kiăng mă yua tơlơi dưi mơng lŏn mơnai, hrưn đĭ klă dong amăng bruă mă yua lŏn, pơđĭ kyar man pơdong anih anom pioh bơwih ƀong huă mơnuih mơnam tui jơlan pơplih phrâo, ngă tui hơdră djru mơnuih mơnam, pơgang rơhuông adai lŏn mơnai hăng djă pioh gru grua./.