Anăp nao kơ tơhnal pơkă anai, djop gưl anom bruă ping gah mơ̆ng plơi prong truh pơ phường hăng khul ping gah plơi Ôp hơmâo git gai ƀing apăn bruă plơi hăng ană plơi pla ngă tui hơdôm bruă mă tong ten hloh.

-Ơ ơi Rčom Thot-Khua git gai ping gah plơI Ôp-phường Hoa Lư, plơi prong Plei Ku, ră anai, Plơi Ôp ta hơmâo tơlơi gêh găl hơgĕt pioh man pơdong plơi pla phrâo hăng pơđĭ kyar tuai čuă ngui amăng plơi pla lăng gru grua hiam djuai ania Jrai (Jarai) ta?

-Rčom Thot: Ră anai plơi Ôp hơmâo lu tơlơi gêh găl hăng pơđĭ kyar. Blung hlâo lĕ, plơi hơmâo 2 boh sang rung; tơlơi gêh găl bơwih ƀong huă pơđĭ kyar mơ̆n, laih anun yua giăm plơi prong giăm sang ia jrao, sang hră, jơlan nao rai hơmâo apui bơngač tơlơi hơdip mơda nao rai amuñ hloh. Plơi Ôp ră anai, hơmâo 125 boh bơbung sang hăng rơbêh 600 čô mơnuih, amăng anun Jrai rơbêh 80 boh sang hăng Bahnar 20 boh sang, dŏ glăi Yuan. Yua thâo gum pơgôp nao rai anun yơh djop mơnuih, tơlơi hơdip mơda, mă bruă ƀrư̆ hrơi đĭ tui, dưi ngă djơ̆ tơhnal pơkă plơi pla phrâo. Ƀing gơmơi juâ̆t pơphun jơnum pơtô lăi, kiăng kơ ană plơi pla thâo gum pơgôp, gum tơngan hrom ngă giong tơhnal pơkă man pơdong plơi pla phrâo, mah dŏ lu tơlơi tơnap tap kơƀah prăk kăk pioh pok prong jơlan nao rai kiăng amuñ hloh.

-Hăng tơlơi git gai mơ̆ng Khul ping gah, mơnuih apăn bruă amăng plơi, hrơi blan rơgao plơi Ôp dưi tŭ mă laih hơdôm boh tơhnal hiam klă pơpă, rơkâo ih lăi pơthâo brơi ?

-Rčom Thot: Ră anai, plơi Ôp hơmâo lu tơlơi pơblih phrâo. Yap mơ̆ng thun 2017 truh thun 2020, tơlơi bơwih ƀong huă đĭ tui, hơmâo lu sang man pơdong hiam, dua lĕ rơdêh kai pioh pơgiăng gơnam mơ̆ng hmua hăng bơwih brơi bruă ngă hmua pla pơjing, klâo lĕ djop sang anŏ hơmâo apui lơtrik laih soh hăng 80% mrô jơlan tuh kơsu gŏ drong, tuh ƀêtông, hăng jĭng čêng (čing hơgor) ăt dŏ djă pioh amăng sang rung. Pă lĕ, amăng plơi hơmâo sang rung prong pioh kơ mơnuih ƀôn sang jơnum plơi, rơma lĕ dŏ djă pioh pin ia pioh ană plơi nao sô̆ ia yua rĭm hrơi hăng pơgang pioh ia hơdjă rơgoh. Plơi Ôp ră anai pơkă tơhnal pơtrun kiăng lu ană amôn hrăm hră truh gưl prong, ră anai dŏ 1,2 boh sang đôč ƀun rin, mơnuih ƀôn sang tơdah duăm ruă nao pơ sang ia jrao, blơi hră pơhlôm nua ia jrao ƀudah kơnuk kơna blơi djru, lu tơhnal pơkă plơi Ôp dưi ngă djop 100%.

-Kiăng kơ plơi Ôp pơđĭ kyar jing plơi pla gru grua hiam tuai čuă ngui ba jơlan hlâo mơ̆ng plơi prong Plei Ku, djop anom bruă ping gah djru hơgĕt brơi ană plơi pla thâo hluh djă pioh gru grua hiam djuai ania Jrai nao hrom hăng bruă khom lui hĭ tơlơi phiăn juâ̆t ƀu klă đưm, kiăng pơgang anih dŏ jum dar?

-Rčom Thot: Khul ping gah, khua plơi, tha plơi pơtrut ană plơi kiăng pơsur pran jua ană tơčô sang anŏ triăng nao hrăm hră. Rĭm blan ƀing gơmơi ăt jơnum git gai mơnuih ping gah djru brơi dưm truă pul apui lơtrik dua bơnah jơlan amăng plơi, dua dơ̆ng lĕ ƀing gơmơi kih rơmet jơlan plơi, lan sang brơi rơgoh mrơ̆k asuk ruk, klâo lĕ pơtrut ană amôn nao sang hră. Ƀing gơmơi hơmâo tơlơi phiăn pơtrun kơ plơi pla, pioh mơnuih ƀôn sang ngă tui jing tơlơi juâ̆t gru grua hiam hơdip hơdjă rơgoh, amra tŭ jum tuai mơ̆ng ataih mut nao ĕp lăng sit djơ̆ hrơi mơak gru grua hiam. Bơ kơ tơlơi djai brŭ, ngui ngor pơdŏ rơkơi bơnai mông jơngum lu mơnuih amăng plơi pơphun rơguăt huăi huač đơi dram gơnam kông ngăn ôh samơ̆ tơlơi phiăn juâ̆t đưm ƀu lui lơi.

Yua kơ anun, khua git gai ping gah plơi, khua plơi, khul wai lăng djop djuai ania, khul grup tơdăm dra mut phung jơnum pơčrông sai tong ten kiăng thâo hơgĕt anŏ ta brơi lui hĭ, hơgĕt ta brơi djă pioh glăi anŏ hiam klă, hơmâo laih tơlơi phiăn, tơlơi ƀuăn pơkôl pơkă pioh kơ ană plơi pla ngă tui 2,3 tơhnal pơkă, hloh kơ anun dơ̆ng ană amôn hrăm hră ƀiă đơi, ƀiă đôč mơnuih hrăm truh gưl prong đại học, ăt khom pơtô lăi ngă hiư̆m pă abih bang djop mơnuih khom thâo hrăm hrăm hmư̆ tơlơi pơtô lăi mơ̆ng mơnuih apăn bruă kơnuk kơna.

-Pơ anăp anai, ăt kơtưn man pơdong plơi pla jing anih pơhưč ƀing tuai nao ngui, ĕp tơlơi phiăn đưm gru grua hiam Jrai, djop gưl anom bruă, gong gai kơnuk kơna hăng mơnuih ƀôn sang plơi Ôp hơmâo akŏ bruă hơgĕt či ngă ơ ơi ?

-Rčom Thot: Bruă mă ƀơi anăp lĕ khom djă pioh gru grua hiam, pơtô lăi kơ ƀing tơdăm dra hlăk ai čơđai muai khom thâo atông čing hăng akŏ pơjing grup atông čing, suang arap amăng plơi, giong anun, djă pioh bruă ngă gŏk, pơjing rup trah, pơjing khul grup mơñam mrai đưm kiăng djơ̆ tơhnal pơtrun kơ plơi pla gru grua hiam. Tŏ tui dơ̆ng, pơtô lăi ană plơi pla ngă tui djơ̆ hơdôm tơlơi pơtrun mơ̆ng Ping gah plơi prong, ping gah phường, ăt kah hăng plơi pla pơtrun ră anai, kơnuk kơna pơtrut mơnuih ƀôn sang ngă bruă čơkă tuai sĭ mơdrô gơnam gru grua hiam kơ tuai kiăng hơmâo prakw pơhrui glăi kơ sang anŏ, bơwih brơi amăng tơlơi hơdip mơda mơ̆ng bruă čơkă tuai, mah dŏ lu tơlơi tơnap tap samơ̆ pơ anăp anai ƀing gơmơi ăt amra gir run hloh ĕp hơdră pơsir.

Phrâo anai, plơi Ôp tŭ mă rơnoh prăk tuh pơ alin pioh pơdong sang rung hăng bê tông samơ̆ bơbung ăt tăm hăng hlang, sit tuai nao ĕp lăng gơñu kiăng lăng djuai ania Jrai atông čing, adoh suang, amăng mông dŏ hơmâo lu tơlơi phara pơkă hăng plơi pla pơkŏn, yua kơ anun ƀing gơmơi kiăng thâo djă pioh, pơdong glăi hrup sang rung khom hơmâo hơgor, khom hơmâo tơlô̆ atông hơgor, hơmâo tơpur, pra apui amăng hrơi ngui ngor thơ pơphun atông čing, rŏm apui ngui ngor mơak amăng plơi Ôp hơmâo 2 grup atông čing, grup čing tha, grup čing đah kơmơi, hơmâo khul suang arap, grup adoh suang pơkŏn gơñu juâ̆t hyu pơdah adoh suang kơ tuai lăng, kâo čang rơmang amra djă pioh na nao bruă ngă anun.

-Hai, bơni kơ ih hŏ ơi Rčom Thot!