VOV4.Jarai - Jơnum min bôh thâo pơtô pơhrăm Khua pơ ala mơnuih ƀôn sang dêh čar ta, gum hrom hăng Jơnum min tơlơi phiăn hăng Jơnum min mơnuih mơnam mơng Khua pơ ala mơnuih ƀôn sang dêh čar ta phrâo pơphun mông jơnum lăi pơblang kơ bôh yôm “Kơtưn ngă tui hơdră bruă, tơlơi phiăn kơ pơgang, pơgăn tơlơi taih amang čơđai muai”. Amăng mông jơnum anai, ƀing khua pơ ala mơnuih ƀôn sang črâo rơđah hơdôm bôh than ba truh tơlơi bơrơdjơ̆ bơrơsao amăng sang anô̆ hăng tơlơi dŏ dŏng ƀong huă mơng mơnuih prong tơdơi kơ pơtlaih rơkơi bơnai, biă ñu pran jua tơlơi hơdip mơnuih mơnam ƀơƀrư̆ ƀu klă tui mơng sa dua čô mơnuih ngă đĭ tui tơlơi taih amang čơđai muai. Hrom hăng anun hơdôm tơlơi pơsir kiăng pơgang, pơgăn taih amang čơđai muai ăt dưi lăi tơbiă mơn amăng mông lăi pơblang.

“Kơđi tơlơi amĭ neh taih djai ană rơkơi ñu phrâo hmâo 8 thun”; Kơđi tơlơi pô khăp mơng amĭ pơnah 9 mut 9 ară sơđing mut amăng tô akô̆ ană bơnai čơđai 4 thun tơdơi kơ lu wot taih amang, dưm jrao ƀu jing”, “Kơđi tơlơi glom ană anet trun amăng ia krông”... hăng lu kơđi tơlơi ngă sat, kơtư̆ juă čơđai muai păp ñai biă amăng hơdôm hrơi rơgao. Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn lăi rơđah: hơdôm kơđi tơlơi ngă sat čơđai, tơlơi taih amang ƀing čơđai ƀơi rơnoh kơtang hăng brơi ƀuh hơdôm bruă hmâo yua hăng glăk ngă tui bơwih brơi, pơtô juăt hăng pơgang čơđai muai ăt akă djop ôh. Kơ-iăng Khua Jơnum min mơnuih mơnam mơng Khua pơ ala mơnuih ƀôn sang dêh čar ta yă Nguyễn Thị Kim Thúy rơkâo:

“Hơdôm kơđi tơlơi taih amang čơđai muai lu thun ƀu djơ̆ kơnong kơ ƀu hrŏ trun gah mrô ôh mơ̆ jai mơng kơtang tui dong, rơnoh ngă soh tui anun mơn. Bôh than ba truh mơng tơlơi anai lĕ hơget ñu? Ding jum wai lăng mơnuih mă bruă, tơhan rơka ruă hăng mơnuih mơnam; Ding jum kông ang hăng hơdôm bôh ƀirô bơdjơ̆ nao hmâo jơlan gah hơget kiăng pơsir tơlơi anai”.

Khua Ding jum wai lăng mơnuih mă bruă, tơhan rơka ruă hăng mơnuih mơnam, ơi Đào Ngọc Dung lăi mơn hơdôm tơlơi akă gal mơng bôh nik lĕ yua kơ Tơlơi phiăn pioh kơ čơđai muai akă dưi pơtô brơi, lăi pơthâo hmao tlôn. Lăp đing nao ƀu ƀiă anih anom akă đing nao djop bruă bơwih brơi kơ čơđai muai:

“Hơdôm kơđi tơlơi phrâo rơgao lĕ brơi ƀuh rơđah pran jua mơnuih mơnam ƀơƀrư̆ ƀu klă tui. Kâo pơmin lĕ tơlơi bơrơdjơ̆ bơrơsao amăng sang anô̆ hăng tơlơi dŏ dŏng ƀong huă mơng mơnuih prong tơdơi kơ pơtlaih rơkơi bơnai. Abih bang hơdôm kơđi tơlơi phrâo lăi anun leng kơ hmâo mơng sang anô̆ mơ̆ ƀu ĕp jơlan pơsir ba truh bruă ngă ƀu klă tui anun”.

Amăng hơdôm hrơi blan klin Covid-19 ngă răm ƀăm prong, bơbeč truh bruă rô hyu, nao hrom hăng anun lĕ asơi huă añăm ƀong dong, ba truh “tơlơi ƀu mơ-ak amăng sang anô̆”. Lu kơđi tơlơi taih amang lĕ yua kơ ƀing amĭ ama, mơnuih amăng sang anô̆ ba truh. Pơblang dong kơ bruă pơgang pơgăn taih amang čơđai amăng sang anô̆, Kơ-iăng Khua Ding jum wai lăng bôh thâo, bơkơjăp drơi jăn hăng tuai čuă ngui Tạ Quang Đông brơi thâo:

“Phrâo rơgao, ƀing gơmơi hmâo lăi pơthâo Tơlơi phiăn pơgang, pơgăn taih amang amăng sang anô̆ (pơplih pơkra) hăng tui kơčăo bruă amra lăi pơthâo kơ Khua pơ ala mơnuih ƀôn sang lok 3, hluai tui kơ tal jơnum lok 4. Tơlơi phiăn anai tơdơi kơ dưi lăng nao amra jing tơlơi klă hloh amăng bruă kơtưn pơgang, pơgăn taih amang amăng sang anô̆, amăng anun hmâo bruă pơgang pơgăn taih amang čơđai muai lăi ha jăn amăng tơlơi phiăn”.

Gah jơlan gah pơsir abih bang bơwih brơi čơđai muai, amăng anun hmâo tơlơi taih amang amăng sang anô̆, Khua Ding jum Đào Ngọc Dung lăi rơđah:

“Ƀing gơmơi amra đing nao ngă tui tơpă rơđah klă hloh Tơlơi pơtrun pơsit 121, pơkă rơđah bruă gơgrong rim gơnong bruă, rim gưl hăng Jơnum min bơwih brơi čơđai muai. Dong mơng akô̆ thun mơtăm ƀing gơmơi rơkâo Jơnum min mơnuih ƀôn sang hơdôm bôh tơring čar, ƀôn prong lăi pơthâo glăi abih bang tơlơi tuh pơplai; ngăn drăp wai lăng kơnuk kơna, ngăn drăp kơ bruă pioh kơ čơđai muai thun 2022. Hluai tui anun hơdôm anih anom pơpha ƀu pơhlôm, amra pơphun pel ĕp hăng hmâo bruă pơsir djơ̆”.

Hăng bruă gơgrong mơng pô apăn akô̆, gơgrong ba wai lăng kơnuk kơna gah čơđai muai, pơphun ngă tui hăng lăng tui bruă ngă tui tơlơi phiăn bơdjơ̆ nao truh čơđai muai, ơi Đào Ngọc Dung pơsit:

“Hăng sa mơnuih gơgrong ba ƀơi anăp Kơnuk kơna, ƀu djơ̆ kơnong kơ hơdôm tơlơi phiăn amăng gơnong bruă hăng Kơnuk kơna ba tơbiă ôh mơ̆, abih bang hơdôm tơlơi phiăn, hơdôm hră pơ-ar tơlơi phiăn hmâo bơdjơ̆ nao bruă pơgang, bơwih brơi čơđai muai. Pơjing rai rơwang tơlơi phiăn, hluai tui anun pơhlôm tơlơi dưi mơng čơđai, ăt kah hăng hơdôm tơlơi pơkôl jar kơmar. Bruă tal dua, pơtô brơi hơdôm anih anom lăi pơthâo tơlơi thâo thăi, bơwih brơi čơđai muai. Bruă tal 3 dong lĕ, pơtrut kơtang pơplih phrâo mơnuih mơnam, bơwih brơi čơđai muai mơng ngăn rơnoh mơnuih mơnam”.

Khua Jơnum min bôh thâo pơtô juăt mơng Khua git gai wai lăng pơ ala mơnuih ƀôn sang dêh čar ta ơi Nguyễn Đức Vinh rơkâo pơ̆ anăp anai đing nao bruă ngă giong hơdôm tơlơi pơkă kơ pơgang, pơgăn tơlơi taih amang amăng bruă pơplih pơkra Tơlơi phiăn pơgang, pơgăn taih amang amăng sang anô̆. Rơkâo Khul pơsir kơđi Sang phăt kơđi dêh čar mă yua Tơlơi pơtrun pơsit pơtô brơi bruă pơsir hơdôm kơđi tơlơi pơtlaih rơkơi bơnai lom pơsit tơlơi pô rông ană khom pel ĕp tơlơi dưi yua djop mơta mơng pô ană, amăng anun đing nao bruă pơgang čơđai muai huăi hmâo tơlơi sat truh, tơlơi taih amang. Hrom hăng anun kơtưn bruă pơgang pơgăn taih amang ƀơi sang hră tơdơi kơ klin Covid-19 ngă./.

Lại Thị Hoa: Čih – Siu H’ Prăk: Pơblang