VOV4.Jarai - Tŏ tui hrơi mông jơnum lok 16, lơ 12/10, Jơnum min apăn bruă Khua pơ ala mơnuih ƀon sang dêh čar pơgôp hiăp kơ bruă ngă tui tơlơi pơtrun mrô 54 mơng Khua pơ ala mơnuih ƀon sang dêh čar tal 14 amăng ngă tui hơdră bruă phun amăng pơđĭ kyar ƀôn prong Hồ Chí Minh hăng rơkâo pơgiong hơdôm hơdră bruă ngă tui lông lăng ƀơi ƀôn prong Hồ Chí Minh; hră lăi pơthâoklah čun 3 thun ngă tui tơlơi pơtrun mrô 115 mơng Khua pơ ala mơnuih ƀon sang dêh čar tal 14 kơ hơdră bruă prăk kak, ngăn drăp kơnuk kơna brơi ƀôn prong Hà Nội. Sem lăng, tŭ yap tơlơi rơkâo mơng Khua dêh čar kơ bruă brơi pơdơi bruă Khua anih jưh pơ ala dêh čar Việt Nam. Pơgôp hiăp kơ bruă prap lui jơnum lok 4 amăng Khua pơ ala mơnuih ƀon sang dêh čar hăng hơdră pơsir tơlơi gun găn, hơdôm bruă dŏ tơnap ƀơi BOT. Hlâo anun, amăng mông jơnum lơ 11/10, Jơnum min apăn bruă Khua pơ ala mơnuih ƀon sang dêh čar tŭ ư mơ-it Ƀirô Khua pơ ala mơnuih ƀon sang dêh čar hơdră pơplih apah prăk blan, prăk apah ƀing pơdơi bruă thun tha, prăk djru mơng hră pơhlôm nua mơnuih mơnam hăng djru brơi mơnuih djru hơkrŭ thun 2023. Khua ding jum prăk kak Hồ Đức Phớc brơi thâo: bruă pơplih apah prăk blan, prăk apah mơnuih pơdơi bruă thun tha, prăk djru mơng hră pơhlôm nua mơnuih mơnam hăng djru brơi mơnuih djru hơkrŭ pơphun mơng lơ 1/7/2023.

VOV/Siu Đoan: Pơblang